Бястинов Герасим Дмитриевич – Бэс Дьарааһын

1902 сыллаахха сэтинньи 26 күнүгэр Таатта улууһун Соҕуй Амма нэһилиэгэр (билиҥҥитэ — Уус-Амма) дьадаҥы ыалга төрөөбүтэ.

Оскуолаҕа 18 сааһыгар киирбитэ.

1928 сыллаахха Таатта улууһун Уолба оскуолатын, онтон 1931 с. Дьокуускайдааҕы педагогика техникумун бүтэрбитэ.

1931—1932 сс. Нам оскуолатыгар учууталынан үлэлээбитэ.

1934 сыллаахха «Кыым» хаһыакка литературнай үлэһитинэн, Дьокуускайдааҕы кинигэ кыһатыгар үлэлээбитэ.

Ол сыл соһумардык өлбүтэ^[1][2].

1925 сылтан бэчээттэнэн саҕалаабыта. Прозанан суруллубут хоһооннорго майгынныыр новеллалары суруйар эбит.

«Миитэрэй оҕо үөрэммитэ», «Балагыай» новеллаларыгар Саха сиринээҕи бастакы оскуолалар күннээҕи олохторо ойууланар. «Хара сир» кинигэтигэр ааптар билиигэ, тулалыыр эйгэ кэрэтин ситиһиигэ тардыһарын туоһулуур. Үгүс кэпсээннэригэр кини саха кумалааннарын уонна батараактарын хомолтолоох дьылҕаларын көрдөрөрө («Тэлиир уола», «Тибиигэ» уо. д. а.).

«Бойобуой» диэн документальнай сэһэнигэр холкуос үөскээһинэ ойууланар.

Г. Бястинов биир кэрэхсибиллээх айымньытынан «Муммут Сөдүөт» диэн уочарка-кэпсээнэ буолар. Манна дьоруой уруккунан хаалбыт олоҕо дьоннор аныгы сыһыаннарыгар сөп түбэспэт буолуута көстөр^[2].

• Чымынаайы орто оскуолатын иннигэр бүүс пааматынньык туруоруллубут (1992, ааптара М. М. Павлов, саха норуодунай худуоһунньуга)^[2];
• Аатын Таатта улууһун Чымнаайы орто оскуолата сүгэр (1993)^[3].