Колбунов Владимир Акимович

1911 сыл от ыйын 27 күнүгэр Омскай уобалас Большереченскай оройуонугар Ростовка дэриэбинэҕэ бааһынай дьиэ кэргэнигэр төрөөбүт. Нуучча. ВКП(б)/КПСС 1943 с. чилиэнэ. Орто ситэтэ суох үөрэхтээх, колхозка үлэлээбит^[1].

1937—1939 сс. Уһук Илин кавалерия полкатыгар сулууспалаабыт.

Сэрии иннинэ Ааллаах Үүн приискаларыгар, Хаҥалас шахтатыгар үлэлээбит.

1941 сыллаахха баҕа өттүнэн фроҥҥа ыҥырыллыбыт.

1942 сылтан - Аҕа дойду Улуу сэриитин кыргыһыыларыгар. Курскай кыргыһыытыгар кыттыбыт. 1943 сыл алтынньытыгар сержант, Киин фронт 61-с аармыйатын 81-с стрелковай дивизиятын 467-с стрелковай полкатын сатыы разведка взводун отделениетын хамандыыра.

Днепр иһин кыргыһыы кэмигэр ураты быһыыламмыт. 1943 сыллаахха алтынньы 1 күнүгэр түүн ударнай бөлөх састаабыгар сылдьан Белорусскай ССР Гомель уобалаһын Лоевскай оройуонун Глушец диэн дэриэбинэтин оройуонугар Днепр нөҥүө туораан арҕаа кытылыгар плацдармы былдьаһар уонна тутар иһин кыргыһыыга актыыбынай кыттыыны ылбыт. Доҕотторун кытта 6 өстөөх контратакатын төттөрү охсон, 60-тан тахса өстөөх саллаатын уонна офицерын суох гыммыт, олортон 9-һун тус бэйэтэ суох гыммыт^[2].

ССРС Үрдүкү Сүбэтин Президиумун 1944 сыл тохсунньу 15 күнүнээҕи Ыйааҕынан бойобуой сорудахтары уһулуччулаахтык толорорун, көрдөрбүт хорсун, геройдуу быһыытын иһин сержант Колбунов Владимир Акимовичка Сэбиэскэй Сойуус Геройун аата иҥэриллибит^[1].

Берлиҥҥэ тиийэ сэриилэспит. 1945 сыллаахха Москваҕа Кыайыы Парадыгар кыттыбыт^[1].

Сэрии кэнниттэн старшай сержант званиелаах демобилизацияламмыт. Саха сиригэр төннөн, «Джугджурзолото» треска Ыныкчаан бириискэтигэр, онтон Бриндакит сир баайын хостуур сиргэ экскаваторщигынан үлэлээбит. Алмаас хостонор сирдэрэ арыллыбыттарыгар, 1957 сыллаахха Колбуновы Мирнэй куоракка көһөрбүттэр, онно кини «Мир» туруупка карьерын экскаваторщигынан үлэлээбит. 1958 сылтан Владимир Акимович олоҕо «Якуталмаз» треһы кытта быстыспат ситимнээх этэ^[2].

Саха АССР Үрдүкү Сүбэтин депутатынан талылла сылдьыбыт.

1998 сыл алтынньы 6 күнүгэр Мирнэйгэ өлбүт^[1].

• «Кыһыл көмүс Сулус» мэтээл (№ 1668) (15.01.1944)^[3][4][5];
• Ленин уордьана (15.01.1944);
• Икки Кыһыл Знамя уордьана;
• Аҕа дойду сэриитин I ст. уордьана (06.04.1985)^[6];
• Икки «Хорсунун иһин» мэтээл (23.08.1942^[7]; 13.09.1943^[8]);
• «Бойобуой өҥөлөрүн иһин» мэтээл;
• «Аҕа дойду Улуу сэриитигэр Германияны кыайыы иһин 1941-1945 сс.» мэтээл;
• «Берлины ылыы иһин» мэтээл;
• ССРС Ытык горняга;
• Саха АССР норуотун хаһаайыстыбатын үтүөлээх үлэһитэ;
• Мирнэй куорат ытык киһитэ^[1].

• Мирнэй куоракка Ленин уулуссатын 10-с нүөмэрдээх дьиэтигэр (олорбут дьиэтэ) өйдөбүнньүк бэлиэ туруоруллубут^[2];
• Омскай уобалас Большеречье бөһүөлэгэр В. А. Колбунов бюһа Өйдөбүл Аллеятыгар туруоруллубут^[2];
• Мирнэйгэ 3 №-дээх байытар фабрикаҕа 1990 сыл ыам ыйын 29 күнүгэр хостоммут 76,15 караттаах бөдөҥ ювелирнай алмаас В.А. Колбунов аатынан ааттаммыт^[2];
• В.А. Колбунов аата Дьокуускай куорат уокуругун Хаҥалас бөһүөлэгин уулуссатыгар иҥэриллибит^[9];
• Герой аатын Омскай уобалас Большереченскай оройуонун Ингалы сэлиэнньэтин орто оскуолата сүгэр^[10].