Краснояров Клавдий Карпович

1907 сыллаахха ыам ыйын 30 (бэс ыйын 12) күнүгэр Исаковка дириэбинэҕэ (билигин Омскай уобалас, Горьковскай оройуон сирэ-уота) бааһынай дьиэ кэргэнигэр төрөөбүт. Омугунан нуучча.

Бастакы сүһүөх оскуоланы бүтэрбит, холкуоска үлэлээбит.

1931 сылтан Дьокуускайга олорбут, ЛОРП тэрилтэтигэр үлэлээбит^[1].

1943 сыл олунньутугар Дьокуускай военкоматынан Кыһыл Аармыйаҕа ыҥырыллыбыт, ити сыл муус устарыттан 1181-с стрелковай полк ытааччытын быһыытынан Брянскай уонна Киин фроннарга сэриилэспит. Орел-Курскай дугаларын кыргыһыыларыгар, Днепры туорааһыҥҥа кыттыбыт^[2].

1943 сыл балаҕан ыйын 23 күнүгэр Большая Листвень дэриэбинэ (билигин Украина, Чернигов уобалаһа, Городнянскай оройуон, Великий Листвен дэриэбинэ) иһин кыргыһыыга, бойобуой ботуруоннара бүтэн, бэйэтинэн өстөөх дзотун ытар чуолҕанын саппыт^[1].

Городнянскай оройуон Великий Листвен дэриэбинэтин кылабыыһатыгар көмүллүбүт^[3][4].

ССРС Үрдүкү Сүбэтин Президиумун 1944 сыл тохсунньу 15 күнүнээҕи Ыйааҕынан Чернигов уобалаһын босхолооһуҥҥа хорсун уонна геройдуу быһыытын иһин кыһыл армеец Клавдий Карпович Краснояровка өлбүтүн кэннэ Сэбиэскэй Сойуус Геройун аата иҥэриллибитэ^[5][1].

• «Кыһыл көмүс Сулус» мэтээл (15.01.1944)^[6][7];
• Ленин уордьана (15.01.1944)^[1].

• Краснояров К. К. аатын сүгэллэр:
  • Дьокуускайга уулусса;
  • Өлүөнэ өрүс холбоһуктаах пароходствотын (ЛОРП) теплохода^[1];
  • Омскай уобалас Горьковскай бөһүөлэгин уонна Серебряное сэлиэнньэтин уулуссалара;
• Украинаҕа Великий Листвен дэриэбинэ уулуссата;
• Дьоруой бүүһэ Дьокуускайга туруоруллубут^[8];
• Краснояров бүүһэ Омскай уобалас Горьковскай бөһүөлэгэр, Серебряное сэлиэнньэтигэр уонна Исаковка дэриэбинэтигэр баар^[9].