Сэбиэскэй Сойуус Дьоруойа К. К. Краснояров пааматынньык-бюһа

Клавдий Карпович Краснояров Сэбиэскэй Сойуус Дьоруойун аатын өлбүтүн кэннэ ылбыта. Омскай уобалаһыттан төрүттээх, Аҕа Дойду Улуу Сэриитин иннинэ Ленскэй өрүс пароходствотыгар транспорнигынан үлэлээбит. Фроҥҥа рядовой стрелкомунан ыҥырыллыбыта. Курскай кыргыһыы кыттыылааҕа. Тохсунньу 23 күнүгэр 1943 сыллаахха Клавдий Карпович Краснояров сулууспалаабыт байыаннай чааһа Днепры туораабыта. Клавдий Краснояров уонна өссө хас да кыһыл армеец Днепр өрүһү туораан уҥа кытылга тиийбиттэр. Ойуур кытыытынан тахсан алааһы туораан өстөөх бөҕөргөтүүлэрин көрбүттэр. Уҥа флангаҕа кыһыл армеецтар түөрт дзоту уотун тохтоппуттар. Хаҥас флангаҕа утарылаһар соҕотох дзот хаалбыт. Краснояров бу дзотка сыыллан тиийэн, онно противотанковай гранаатаны быраҕар кыахтаммыт. Дзотка ниэмэс пулемета кылгас кэмҥэ тохтообут да, сотору буолан баран уоту сөргүппүт. Краснояров дзоту бэйэтин этинэн-сиинин бүөлээн, дьонугар салгыы кимэн киирэр кыаҕы биэрбит. Бу хорсун быһыытын иһин 1944 сыллаахха Сэбиэскэй Сойуус Дьоруойун аата иҥэриллибитэ. Ол сыл кини аатынан Дьокуускайга Алдан уулуссата ааттаммыта^[2].

Краснояров пааматынньыга хаста да оннуттан көһөрүллүбүтэ. Бастакы сырыыга пааматынньыгы таҥара дьиэтэ тутулларыттан, иккис сырыыга олорор дьиэ тутулларыттан көһөрүллүбүтэ. 2015 сыллаахха балаҕан ыйын 2 күнүгэр Улуу Кыайыы 70 сылын бэлиэтээһин чэрчитинэн Дьокуускай олохтоохторо баалларыгар Краснояров пааматынньыгын хат арыйыы буолбута. Пааматынньык Краснояров уулуссатын уонна Ленин проспегын быһа охсуһуутугар миэстэтин булбута. Онно Краснояровка анаммыт сквер эмиэ аһыллыбыта^[3].