Околович Иван Ильич

1922 сыл бэс ыйын 15 күнүгэр Белоруссия ССР Борисовскай оройуонун Малые Жаберичи нэһилиэгэр элбэх оҕолоох үлэһит дьиэ кэргэҥҥэ төрөөбүтэ^[1]. Омугунан белорус. 1937 сыллаахха 2 нүөмэрдээх оскуоланы бүтэрбитэ. Нижнеудинскай куоракка тимир суол училищетыгар локомотив механик идэтин ылбыта. Иркутскай куоракка ФЗУ оскуолатын бүтэрбитэ. Охотскай Перевозка, өрөспүүбүлүкэ Ыныкчан прииск салайыытыыгар, Саха Сирин Ааллаах-Үүн шахта салайыытын геологическай разведкатыгар үлэлээбитэ.

1943 сыл кулун тутар 23 күнүгэр Саха АССР Ааллаах-Үүн уокуруктааҕы военкоматынан Кыһыл Аармыйа кэккэтигэр ыҥырыллыбыта. 1943 сыл атырдьах ыйыттан Аҕа дойду Улуу сэриитин кыргыһыыларыгар кыттыбыта.

36-с туспа танковай полка разведчига (3-с аармыйа, 1-кы Белорусскай фронт), кыһыл аармыйа саллаата Иван Околович 1944 сыл бэс ыйын 24-26 күннэригэр Белоруссия Гомельскай уобалаһын Рогачевскай районун Коноплицы, Петровка, Фалевичи, Городец дэриэбинэлэрин аттыгар буолбут кыргыһыыларга өстөөх үс саллаатын суох гыммыта уонна иккини билиэн ылбыта, ону таһынан умайа турар танкаттан бааһырбыт офицеры таһаарбыта. Кыргыһыыларга көрдөрбүт хорсун быһыытын иһин 1944 сыл от ыйын 20 күнүгэр кыһыл аармыйа саллаата Околович Иван Ильич 3-с истиэпэннээх Албан аат уордьанынан наҕараадаламмыта. 1944 сыл ахсынньы 15 күнүгэр өссө биир 3-с истиэпэннээх Албан аат уордьанынан бэлиэтэммитэ.

77-с гвардейскай ыарахан танковай полка автоматчиктарын отделениетын командира (28-с аармыйа, 3-с Белорусскай фронт), гвардия младшай сержана Иван Околович 1945 сыл тохсунньу 13-19 күннэригэр Шталлупёнен куорат оройуонугар өстөөх оборуонатын көҥү көтүүгэ бастакылар кэккэлэригэр өстөөх траншеяларыгар киирбитэ.

1945 сыл тохсунньу 14 күнүгэр Альт-Будупёнен нэһилиэнньэлээх пуунун иһин кыргыһыы кэмигэр, гвардия младшай сержана Околович, бааһырбыт командиры солбуйан, стрелковай подразделениены баһылаабыта уонна байыастары атаакаҕа көтөхпүтэ. Кыргыһыыларга көрдөрбүт хорсун быһыытын иһин 1945 сыл тохсунньу 31 күнүгэр гвардия младшай сержана Околович Иван Ильич 2-с истиэпэннээх Албан аат уордьанынан наҕараадаламмыта.

1945 сыл кулун тутар 13-18 күннэригэр Хайлигенбайль куораттан хотугулуу-илин 13 биэрэстэ тэйиччи сытар Ланк, Бладиау нэһилиэнньэлээх пууннарын аттыгар өстөөх төгүрүллүбүт бөлөҕүн суох гынар кэмҥэ, гвардия младшай сержана Иван Околович хас да өстөөҕү суох гыммыта уонна бааһырбыт офицеры быыһаабыта. Бэйэтэ бааһырбытын да иһин кыргыһыы хонуутун хаалларбатаҕа.

ССРС Үрдүкү Сэбиэтин Президиумун 1945 сыл бэс ыйын 29 күнүнээҕи Ыйааҕынан, ньиэмэс-фашистскай халабырдьыттары кытта кыргыһыыларга командование сорудахтарын толорбутун иһин, гвардия младшай сержана Околович Иван Ильич 1-кы истиэпэннээх Албан аат уордьанынан наҕараадаламмыта уонна Албан аат уордьан толору кавалера буолбута.

1946 сыл сэтинньи 26 күнүгэр гвардия старшината И. И. Околович демобилизацияламмыта. 1968 сылтан КПСС чилиэнэ. Иркутскай уобалас Тулун куоратыгар олорбута. Биэнсийэҕэ тахсыан иннинэ мас ууһунан үлэлээбитэ. 1989 сыл алтынньы 13 күнүгэр өлбүтэ. Тулуҥҥа көмүллүбүтэ.

• 1-ы истиэпэннээх Албан аат уордьана (№ 447)
• 2-с истиэпэннээх Албан аат уордьана (№ 9309)
• Икки 3-с истиэпэннээх Албан аат уордьана (№ 185010 и № ?)
• 1-ы истиэпэннээх Аҕа дойду сэриитин уордьана (11.03.1985)
• «Хорсунун иһин» мэтээл
• «Кенигсбери ылыы иһин» мэтээл
• атын мэтээллэр

• Кавалеры ордена Славы трёх степеней: Краткий биографический словарь / Пред. ред. коллегии Д. С. Сухоруков. — М.: Воениздат, 2000. — 703 с. — 10 000 экз. — ISBN 5-203-01883-9
• Костенков А. Г. Славен их путь боевой. — Калининград, 1987.
• Лобода В. Ф. Солдатская слава. — Кн. 1. — М., 1963.
• Навечно в сердце народном / Редкол.: И. П. Шамякин (гл. ред.) и др. — 3-е изд., доп. и испр. — Мн.: Белорусская советская энциклопедия, 1984. — 607 с. — 65 000 экз.
• Сомов В. М. Солдатская доблесть. — Якутск, 1970.