Никитин Андрей Сергеевич

2001 — Салайар судаарыстыбаннай университет (Москва), «Судаарыстыбаннай уонна муниципальнай салайыы» идэтинэн. Үөрэҕин аспирантураҕа салҕаабыта.

2008 — Стокгольм экэниэмикэ оскуолатыгар MBA истиэпэннээх.

Университекка үөрэнэ сылдьан, 1998 сыллаахха РФ Госдуматыгар стажировканы ааспыта, норуоттар ыккардыларынааҕы боппуруостарга кэмитиэт бэрэссэдээтэлин көмөлөһөөччүтэ этэ.

Диплом иннинээҕи практикатын РФ бэрэсидьиэнин Соҕуруу федеральнай уокурукка боломуочуйалаах бэрэстэбиитэлэ Виктор Казанцев аппаратыгар бүтэрбитэ.

2000—2001 — Москваҕа баар «Блок блэк» ААУо генеральнай дириэктэрин солбуйааччыта (компьютернай компоненнары, оргтехниканы производство уонна атыы), онтон Никитин «Теремок» эрэстэрээн ситимин сайыннарыыга генеральнай дириэктэри солбуйааччы этэ^[6][7].

2002 сыллаахха Никитин «Нефтегазинвест» инвестиционнай хампаанньаҕа үлэлээбитэ.

Никитин 2006 сыллаахха «Стратегия организационных изменений как инструмент эффективного управления (теоретический и методологический аспект)» диэн тиэмэҕэ диссертациятын көмүскээн^[8], экэниэмикэ билимнэрин хандьыдаата буолбута.

2008 — Салайыы судаарыстыбаннай университетын (нууч.) (сах. (ГУУ) тэрийии уонна салайыы теориятын кафедратын доцена^[9].

2018 сыллаахха Никитин «Эрэгийиэннээҕи салайар хамаандалары тэрийии уонна көдьүүстээхтик үлэлииллэрин хааччыйыы» диэн тиэмэҕэ экэниэмикэ билимин дуоктарын истиэпэнин ылар диссертациятын көмүскээбитэ^[10].

2002 сылтан 2011 сылга диэри Никитин стекловолокно, композит уонна геосинтетика оҥорор «Рускомпозит» хампаанньалар бөлөхтөрүн салалтатыгар үлэлээбитэ.

2002—2003 уонна 2004—2007 сылларга «Рускомпозит» бөлөх састаабыгар киирэр «„Стеклонит“ атыы-эргиэн дьиэни» салайбыта.

2003—2004 — Комплекснай изоляционнай систиэмэлэр генеральнай дириэктэрэ (гааһы тиэйэр систиэмэлэргэ уонна тэрилтэлэргэ рулоннай изоляционнай матырыйааллар).

2007—2009 — «Стеклонит менеджмент» генеральнай дириэктэрэ.

2009—2011 сс — «„Рускомпозит“ салайар хампаанньа» генеральнай дириэктэрэ.

2011 сыл от ыйын 27 күнүгэр, аһаҕас куонкурус түмүгүнэн, Никитин Стратегическай хамсааһыннар агентстволарын (АСИ) генеральнай дириэктэринэн талыллыбыта^[11].

2011 сыл атырдьах ыйын 11 күнүгэр Арассыыйа бырабыыталыстыбатын дьаһалынан Никитин АСИ салайааччытынан анаммыта.

2017 сыл олунньу 13 күнүгэр Арассыыйа бэрэсидьиэнин ыйааҕынан Никитин Новгородскай уобаласка губернатор эбээһинэһин толорооччунан анаммыта^[12].

2017 сыл балаҕан ыйыгар 10 күнүгэр 67,99 % куолаһы ылан, Никитин Новгородскай уобаласка губернаторынан талыллыбыта^[13].

2017 сыл алтынньы 14 күнүгэр Никитин Новгородскай уобаласка губернатор дуоһунаһыгар киирбитэ^[14].

Губернатор кыттыытынан Угловка сэлиэнньэтин (2018 с.) уонна Боровичи куорат (2019 с.) икки биир хайысхалаах муниципальнай тэриллиилэригэр ТОСЭР статуһа бэриллибитэ^[15], Великий Новгородка бизнес-инкубатор уонна технологическай паарка тэриллибиттэрэ. «Новгородскай» промышленнай-производственнай көрүҥнээх анал экономическай зонаны оҥорорго үлэ бара турар.

2017 сыл сэтинньи 22 күнүттэн 2018 сыл от ыйын 18 күнүгэр диэри уонна 2020 сыл ахсынньы 21 күнүттэн Арассыыйа Федерациятын Судаарыстыбаннай Сэбиэтин президиумун чилиэнэ^[16][17][18].

2018 сыллаахха губернатор Никитин доруобуйа харыстабылын реформатын саҕалаабыта — ороскуоту биллэ кыччатыы, оройуоннааҕы балыыһаларга салаалары сабыы уонна мобильнай мэдэссиинэни киллэрии (мэдэссиинэ комплекстары массыыналарга туруорбуттара). Ол түмүгэр Шимскэй оройуонугар бырачыастар ааспыттара, оттон Окуловка куоракка быраастар итальянскай забастовканы (нууч.) (сах. ыыппыттара^[19]. Реформалар тохтотуллубатахтара.

2022 сыл балаҕан ыйын 11-13 күннэригэр Новгородскай уобаласка губернатор быыбара буолан ааспыттара, онно Никитин иккистээн кыайбыта, 120,5 тыһыынчаттан тахса куолаһы ылан, бу куоластааһыҥҥа кыттыбыт быыбардааччылар ахсааннарыттан 77,03 % тэҥнэһэр^[20].

Арассыыйа бэрэсидьиэнэ Владимир Путин 2025 сыл олунньу 7 күнүгэр Андрей Никитин дуоһунаһыттан уурайарын ылыммыта. Кини биэрбит сайабылыанньатыгар төрүөтэ маннык суруллубут: «атын үлэҕэ көһүүну кытта сибээстээн бэйэм көрдөһөбүн»^[21]. Бу күн Арассыыйа бырабыыталыстыбатын бэрэссэдээтэлэ Михаил Мишустин тырааныспар миниистирин солбуйааччытынан Андрей Никитины аныыр туһунан уураахха илии баттаабыта^[22].

• «Социальнай бэлиитикэ» Судаарыстыбаннай Сэбиэт оробуочай бөлөҕүн салайааччыта этэ^[25].
• Арассыыйа экэниэмикэтин саҥардыыга уонна инновационнай сайдыыга РФ бэрэсидьиэнин аттыгар үлэлиир Сэбиэт президиумун чилиэнэ этэ^[26].
• Саҥа бырайыактары көҕүлээһиҥҥэ стратегическай хамсааһыннар агентстволарын кэтиир сэбиэтин чилиэнэ этэ.
• Федеральнай компетенция киинин кэтээн көрөр сэбиэтин чилиэнэ этэ^[27].
• ЮНЕСКО дьыалаларыгар Арассыыйа Федерациятын хамыыһыйатын чилиэнэ этэ^[28].
• «Деловая Россия» уопсастыбаннай тэрилтэ чилиэнэ этэ. Федеральнай салаалар ыккардыларынааҕы сэбиэт композитнай матырыйааллары оҥорор хамыыһыйатын уонна ыччат урбааныгар кэмитиэтин салайбыта. «Арассыыйа суолларын хаачыстыбата» бырайыак координаторын эбээһинэһин толорбута^[29].