Чернышенко Дмитрий Николаевич

Дмитрий Чернышенко 1968 сыл балаҕан ыйын 20 күнүгэр Саратовка төрөөбүтэ. Майкопка уонна Сочига улааппыта^[5][7].

Москватааҕы «Станкин» судаарыстыбаннай технологическай университеты «автомотазированнай бырайыактааһын систиэмэлэрэ» (САПР) идэтинэн бүтэрэн, систиэмэ инженер-системотехник идэтин ылбыта. «Станкиҥҥа» үөрэнэ сылдьан, МММ рекламатыгар графиканы уруһуйдаабыта, үлэтин иһин бастакы төлөбүрүн 1500 доллары ылбыта^[8][5].

Чернышенко 1989 сылтан 1991 сылга диэри Copris&M Co («Коприс-энд-м ко») телекоммунационнай хампаанньатыгар программистынан үлэлээбитэ.

1993 сыллаахха ИМС базатыгар тэриллибит Media Arts реклама агентствотын соучредителэ буолбута, сотору Media Arts Group диэн реклама холдинг статуһун ылбыта. 1994 сыллаахха айар дириэктэр, онтон 1996 сыллаахха — Media Arts Group вице-президенин дуоһунаһыгар киирбитэ^[8].

1998—2002 сылларга Чернышенко «ДТВ-МА» телевизионнай продюсерскай устуудьуйа генеральнай дириэктэрэ этэ, ол устуудьуйа Media Arts Group холдинг D’Arcy телекомпанияны («Д’Арси ТелеВижн») атыыласпытын түмүгэр үөскээбитэ, ол студия D’Arcy телекомпания рекламаны устубута. «ДТВ-МА» клиеннэригэр аан дойду сүрүн брендтэрэ уонна реклама агентстволара киирэллэрэ. Студия Арассыыйатааҕы уонна аан дойдутааҕы бэстибээллэргэ 30-тан тахса бириэмийэни ылбыта^[9].

2002 сыллаахха Чернышенко Media Arts Group үрдүкү вице-президенэ буолбута уонна холдинг иһигэр спортивнай маркетинг эйгэтигэр үлэлииргэ тэриллибит Sportima хампаанньаны салайбыта^[8].

2005 сыллаахха сэтинньигэ Чернышенко Сочига Олимпийскай уонна Паралимпийскай оонньуулары ыытар быраап иһин хампаанньаны салайан, «Сочи-2014» сыллааҕы сайаапка хамыыһыйатын генеральнай дириэктэрэ буолбута^[10].

2007 сылтан 2014 сылга диэри Чернышенко Сочига ыытыллыбыт XXII кыһыҥҥы Олимпийскай оонньуулар уонна XI кыһыҥҥы Паралимпийскай оонньуулар тэрийэр кэмитиэттэрин бэрэсидьиэнэ этэ^[11][5].

2007 сыл балаҕан ыйын 26 күнүттэн Чернышенко РФ бэрэсидьиэнин иһинэн физическэй култуураны уонна спорду, үрдүк көрдөрүүлээх спорт көрүҥнэрин сайыннарыыга, Сочига XXII кыһыҥҥы Олимпийскай уонна XI кыһыҥҥы Паралимпийскай оонньуулары бэлэмнээһиҥҥэ уонна ыытыыга Сэбиэт президиумун чилиэнэ^[12]. Бастакы сылыгар (2007 сыл балаҕан ыйын 26 күнүттэн 2008 сыл балаҕан ыйын 5 күнүгэр диэри) сэбиэт сэбиэдиссэйинэн үлэлээбитэ^[5].

2007 сыл сэтинньи 12 күнүттэн «Олимпстрой» ГК кэтээн көрөр сэбиэтин бэрэссэдээтэлин солбуйааччыта^[13].

2014 сыл алтынньыттан ахсынньыга диэри Чернышенко урбаанньыт Геннадий Тимченко баайын-дуолун салайар Volga Group инвестиционнай хампаанньаны салайбыта^[14].

2014 сыл сэтинньи 28 күнүттэн Чернышенко Континентальнай хоккей лигатын бэрэсидьиэнинэн уонна сэбиэтин бэрэссэдээтэлинэн үлэлээбитэ^[15].

2014 сыл ахсынньы 23 күнүттэн Арассыыйа хоккей Федерациятын сэбиэтин чилиэнэ.

2015 сыл тохсунньу 13 күнүттэн Чернышенко «Газпром-Медиа Холдинг» генеральнай дириэктэринэн уонна салайыы бэрэссэдээтэлинэн үлэлиир^[16][5].

2016 сылтан Национальнай реклама альянсын дириэктэрдэрин сэбиэтин бэрэссэдээтэлэ^[17]. «Арассыыйа тимир суолларын» ОАО дириэктэрдэрин сэбиэтин чилиэнэ^[18].

2020 сыл тохсунньу 21 күнүгэр Чернышенко РФ бырабыыталыстыбатын бэрэссэдээтэлин цифровой экэниэмикэҕэ уонна инновацияҕа, сибээскэ уонна СМИ-гэ, ону тэҥэ култуураҕа, туризмҥа уонна спортка солбуйааччынан анаммыта^[19]. Чернышенко ураты суолталаах спортивнай тэрээһиннэри ыытыыга уонна итэҕэл тэрилтэлэрин кытта үлэлэһиигэ эппиэтинэстээх^[1].

Михаил Мишустин 2024 сыл ыам ыйын 11 күнүгэр Чернышенко кандидатуратын бырабыыталыстыба бэрэссэдээтэлин солбуйааччы дуоһунаһыгар этии киллэрэн туран, судаарыстыбаннай Думаҕа көрүүгэ саҥа бырабыыталыстыба састаабын киллэрбитэ^[20]. Ыам ыйын 13 күнүгэр Госдума кинини бу дуоһунаска бигэргэппитэ^[21]. Ыам ыйын 14 күнүгэр РФ Бэрэсидьиэнэ анааһын туһунан ыйаахха илии баттаабыта^[22][5].

Министиэристибэлэри уонна биэдэмистибэлэри сүрүннүүр:

• Минобрнауки;
• Минпросвещение;
• Минспорт;
• Минстрой («Туризм и индустрия гостеприимства» национальнай бырайыак тэрээһиннэрин);
• Минэкономразвития (туризм эйгэтигэр судаарыстыба бэлиитикэтин олоххо киллэрии);
• Минцифры (маассабай сибээс уонна СМИ хайысхатыгар судаарыстыба бэлиитикэтин олоххо киллэрии);
• Ыччат дьыалаларыгар федеральнай агентство;
• Омуктар дьыалаларыгар федеральнай агентство (итэҕэл тэрилтэлэрин кытта алтыһыы боппуруостарын өттүнэн);
• Үөрэх уонна билим хонтуруолун федеральнай сулууспата^[23].

Чернышенко 2024 сыл балаҕан ыйын 23 күнүгэр АНО «Интернет сайдыытын институтун» хонтуруоллуур сэбиэтигэр Арассыыйа Федерациятын бэрэстэбиитэлинэн анаммыта^[24].

Арассыыйа бырабыыталыстыбата 2025 сыл олунньу 11 күнүгэр Чернышенконы «Физическэй култуураны уонна спорду сайыннарыы» судаарыстыбаннай бырагырааманы олоххо киллэрэр хамыыһыйа бэрэссэдээтэлинэн бигэргэппитэ^[25].

Чернышенко ааҥыл тылы билэр^[26].

Дмитрий Чернышенко кэргэннээх, икки кыыс оҕолоох. Кини альпийскай хайыһары уонна тустууну сөбүлүүр^[5].

Украинаҕа байыаннай дьайыылар саҕаланыаҕыттан Чернышенко Европа сойууһун, Улуу Британия, АХШ, Швейцария уонна Саҥа Зеландия санкцияларыгар түбэспитэ.

• «Аҕа дойду иннигэр килбиэнин иһин» II истиэпиннээх уордьан (2014 сыл кулун тутар 24 күнэ) — Сочига 2014 сыллааҕы XXII уонна XI Паралимпийскай кыһыҥҥы оонньууларга бэлэмнэнии үлэтин тэрийиигэ уонна ыытыыга уонна Арассыыйа талыллыбыт хамаандаларын ситиһиилээх көрдөрүүлэрин хааччыйыыга улахан кылааты киллэрбитин иһин^[27].

• Бочуот уордьана (2007 сыл атырдьах ыйын 6 күнэ) — 2014 сыллаахха XXII кыһыҥҥы Олимпийскай уонна XI Паралимпийскай оонньуулары ыытар Сочи куорат кыайыытын хааччыйар үлэҕэ көхтөөхтүк кыттыбытын иһин^[28].
• Доҕордоһуу уордьана (2019 сыл ыам ыйын 23 күнэ)^[29].
• РФ Бэрэсидьиэнин махтал тыллара (2018 сыл ыам ыйын 30 күнэ) — Арассыыйа уопсастыбатын уопсастыбаннай-бэлитиичэскэй олоҕор көхтөөхтүк кыттыбытын иһин^[30].
• «Арассыыйа спортивнай сулустара» национальнай бириэмийэ лауреата (2008 сыл)^[31].

конфессия

• Сибитиэй благовернай Александр Невскай II истиэпиннээх уордьана (2021 сыл ахсынньы 6 күнэ)^[32].
• Преподобнай Сергий Радонежский II истиэпиннээх уордьана (2014 сыл атырдьах ыйын 28 күнэ)^[33].
• Преподобнай Сергий Радонежский III истиэпиннээх уордьана (2006 сыл тохсунньу 28 күнэ)^[34].

спорт

• Кыһыл көмүс Олимпийскай уордьан (2014 сыл)^[35].