Сидорова Софья Петровна

1904 сыл от ыйын 26 күнүгэр (саҥа истиилинэн атырдьах ыйын 7 күнүгэр) Дьокуускайга төрөөбүтэ^[1].

1923—1924 сылларга РКП(б) Дьокуускайдааҕы уокуруктааҕы кэмитиэтин дьахтар салаатын иниспиэктэринэн үлэлээбитэ.

1928 сыллаахха Арҕаа Илиҥҥи дойдулар үлэһиттэрин хомуньуустуу университетыгар үөрэммитэ. Онтон Саха обкомун ВКП(б) дьахталларга уонна бааһынай дьахталларга үлэлиир салаатын салайбыта, оттон 1929—1931 сылларга — Булуҥ уокуруктааҕы ВКП(б) кэмитиэтин култуураны тарҕатар салаатын сэбиэдиссэйинэн үлэлээбитэ. 1930 сылтан ВКП(б) чилиэнэ этэ^[1].

1931—1932 сылларга Саха АССР ЦИК иһинэн дьахтар үлэтигэр-хамнаһыгар хамыыһыйаны салайбыта, 1932—1934 сылларга Саха уобаластааҕы идэлээх сойуустар сэбиэттэрин сэкирэтээринэн үлэлээбитэ. 1934—1937 сылларга Саха АССР Киин ситэриилээх кэмитиэтин (КСК) тэрийэр салаатын сэбиэдиссэйин солбуйааччытынан, онтон — КСК бэрэссэдээтэлин солбуйааччыта буолбута. 1938 сылга ССРС КСК иһинэн Сэбиэскэй тутуу үрдүкү куурустарын бүтэрбитэ уонна Саха АССР бастайааннай бэрэстэбиитэлинэн ВЦИК Президиумугар үлэлээбитэ^[1].

1938 сыл от ыйыттан 1947 сыл кулун тутарга диэри Саха АССР Үрдүкү Сэбиэтин Президиумун салайбыта. ССРС Үрдүкү Сэбиэтин уонна Саха АССР Үрдүкү Сэбиэтин I уонна II ыҥырыылаах дьокутаатынан талыллыбыта.

1947 сыл кулун тутарыгар биэнсийэҕэ тахсыбыта.

1951 сыл тохсунньу 23 күнүгэр Дьокуускайга өлбүтэ^[1].

• Үлэ Кыһыл Знамятын уордьана.

2001 сылга Саха Өрөспүүбүлүкэтигэр Софья Сидорова аатынан Ытык бэлиэни олохтообуттара.