Бубякин Николай Васильевич

1898 сыл балаҕан ыйын 15 күнүгэр Илин Хаҥалас улууһун (билигин Мэҥэ-Хаҥалас улууһа) Иккис Наахара нэһилиэгэр дьадаҥы ыалга төрөөбүтэ. Таҥара дьиэтин оскуолатын түөрт кылааһын бүтэрбитэ.

1916 сыллаахха Бодойбо бириискэтин хонтуоратыгар суруксутунан үлэлээбитэ^[1]. 1918—1919 сылларга Илин Хаҥаласка сир дьаһалтатын чилиэнинэн буола сылдьыбыта. 1920—1924 сылларга Илин Хаҥалас волревкомун сэкирэтээринэн үлэлээбитэ; 1921 сылга аһынан-үөлүнэн нолуогу хомуйуу боппуруоһунан дьарыктаммыта. 1922 сылтан волисполком сэкирэтээринэн, онтон бэрэссэдээтэлинэн талыллыбыта.

1924 сыл ахсынньытыгар Дьокуускай уокурук Сэбиэттэрин сийиэһигэр кыттыбыта, манна кинини Дьокуускай уокурук Ситэриилээх Кэмитиэтин бэрэссэдээтэлинэн талбыттара. Бу солону 1924—1928 сылларга толорбута. 1928—1929 сылларга Саха АССР Киин толоруулаах кэмитиэтин уонна Үлэһиттэр Сэбиэттэрин (Совнаркомун) бэрэссэдээтэлинэн үлэлээбитэ. 1929 сылга Тыа хаһаайыстыбатын норуодунай хамыһаарынан анаммыта.

1930—1931 сылларга Арҕаа Хаҥалас оройуонун исполкомун бэрэссэдээтэлинэн үлэлээбитэ. 1931 сылга Саха АССР Киин толоруулаах кэмитиэтин тэрийэр салаатын сэбиэдиссэйинэн анаммыта. 1932—1935 сылларга Дьокуускай куорат Сэбиэтин бэрэссэдээтэлинэн үлэлээбитэ. 1936—1937 сылларга Саха автономиятын 15 сылын бэлиэтиир үбүлүөй хамыыһыйатын эппиэттээх сэкирэтээринэн үлэлээбитэ; 1937 сылга Саха АССР Үлэһиттэрин Сэбиэтин дьыалатын салайааччытынан анаммыта.

1938 сыл сэтинньи 1 күнүгэр тутуллубута. 1941 сыл балаҕан ыйын 8 күнүгэр НКВД анал сүбэтинэн аҕыс сылга көннөрөр-үлэлэтэр лааҕырга бириигэбэрдэммитэ уонна КрасЛаакка ыытыллыбыта.

1942 сыл ыам ыйын 12 күнүгэр түрмэ балыыһатыгар өлбүтэ. 1956 сыл муус устар 29 күнүгэр Саха АССР Үрдүкү Суутунан өлбүтүн кэннэ реабилитацияламмыта^[1].