Иванов Климент Егорович
Климент Егорович Иванов (1936 сэтинньи 10) — сэбиэскэй уонна Арассыыйа судаарыстыбаннай диэйэтэлэ, 1990—1992 сылларга Саха АССР Миниистирдэрин Сэбиэтин бэрэссэдээтэлэ.
Олоҕун олуктара
1936 сыл сэтинньи 10 күнүгэр Сунтаар улууһун Элгээйи сэлиэнньэтигэр төрөөбүтэ[1].
Бүлүүтээҕи педагогика училищетын, Дьокуускайдааҕы тыа хаһаайыстыбатын техникумун бүтэрбитэ, онтон 1968 сыллаахха Хабаровскайдааҕы баартыйа Үрдүкү оскуолатын үөрэнэн бүтэрбитэ.
1956—1959 сылларга Сунтаар улууһун Күндэйэ, Хоро, Элгээйи оскуолаларыгар учууталынан уонна иитээччинэн үлэлээбитэ. Салгыы Сунтаар уонна Орджоникидзе (билигин Хаҥалас улууһа) улуустарын ВЛКСМ кэмитиэттэригэр үлэлээбитэ[1].
1968—1975 сылларга КПСС Абыйдааҕы райкомун иккис, онтон бастакы сэкирэтээринэн үлэлээбитэ. 1975—1983 сылларга Сунтаар улууһун Сэбиэтин исполкомун салайбыта, 1983—1986 сылларга КПСС Үөһээ Бүлүүтээҕи уонна Өлүөхүмэтээҕи райкомнарын бастакы сэкирэтээрдэринэн үлэлээбитэ.
1986—1988 сылларга Саха АССР тыа хаһаайыстыбатын миниистирин дуоһунаһыгар сылдьыбыта, 1988—1989 сылларга АПК «Хоту» тэрилтэни салайбыта[1].
1989—1991 сылларга ССРС Үрдүкү Сэбиэтин чилиэнэ этэ. Ахсынньы 1990 — олунньу 1992 сылларга Саха АССР Миниистирдэрин Сэбиэтин бэрэссэдээтэлинэн анаммыта. Ол кэннэ Саха Өрөспүүбүлүкэтин Үрдүкү Сэбиэтин бэрэссэдээтэлэ буолбута.
1993—1999 сылларга өрөспүүбүлүкэ Арассыыйа Федерациятын Бэрэсидьиэнигэр бастайааннай бэрэстэбиитэлинэн, 1999—2001 сылларга «Саханефтегаз» ННГК ААУо бэрэсидьиэнинэн, кэлин хампаанньа дириэктэрдэрин сэбиэтин салайбыта.
Саха Өрөспүүбүлүкэтин Судаарыстыбаннай Мунньаҕын (Ил Түмэн) дьокутаатынан талыллыбыт[1].
Наҕараадалара уонна ытык ааттара
- Саха Өрөспүүбүлүкэтин Ытык олохтооҕо (2000)[1].