Нуучча тылынанАнал бырайыактар
Тылы уларыт
УРУБИИКИ ТУҺУНАН

Аманатова Варвара Аркадьевна

Аманатова Варвара Аркадьевна (төр. 1973 сыл балаҕан ыйын 7 күнэ, Дьокуускай) — ырыаһыт, СӨ үтүөлээх артыыһа.

Биография

Варвара Аманатова 1973 сыллаахха балаҕан ыйын 7 күнүгэр Дьокуускайга төрөөбүтэ.

1995 сылга Илин Сибиирдээҕи култуура институутун (нууч.) (сах. Улан-Удэҕэ бүтэрбитэ. Үөрэҕин кэмигэр «Сибирский сувенир» норуодунай ансаамбылы кытта Франция, Польша, Германия, Америка бэстибээллэригэр кыттыбыта[1].

1994 сылга «Сахаконцерт» бөлөххө үлэлии киирбитэ[2]. РСФСР уонна Саха АССР үтүөлээх артыыһын, Саха сирин норуодунай артыыһын Юрий Платонов эстраднай ускуустубаҕа Өрөспүүбүлүкэтээҕи айар мастарыскыайыгар киирбитэ.

Бастакы тус кэнсиэрэ «Алаас ырыалара» Уус-Алдан улууһун Танда сэлиэнньэтигэр 1996 сыл олунньу 14 күнүгэр буолбута. Биир ыйынан оройуон киинигэр — Бороҕон сэлиэнньэтигэр «Артыыс буолар алгыстаах аартыгым» диэн кэнсиэринэн тахсыбыта[1].

1997 сылтан «Иэхэй-чуохай» бөлөххө солист.

2000 сылтан Эстрада судаарыстыбаннай тыйаатырын артыыһа.

2001 сыл ыам ыйын 19 күнүгэр Дьокуускайга бастакы тус кэнсиэрэ «Сүрэҕим кистэлин арыйан» Д. К. Сивцев — Суорун Омоллоон аатынан СӨ Опера уонна Балет судаарыстыбаннай тыйаатырын сыанатыгар ааспыта, онно Монголия ырыаһыта Наран кыттыыны ылбыта[1].

2015 сыл муус устар 2 күнүгэр Варвара Аманатова «Махталбын этэбин» кэнсиэригэр «Алаас кыыһа» диэн автобиографиятын сүрэхтээбитэ[1].

Айар үлэтэ

Репертуар

Ырыаһыт репертуара саха литэрэтиирэтин классиктарын — А. И. Софронов (Алампа), А. Е. Кулаковскай, В. М. Новиков (Күннүк Уурастыырап), Сэмэн Данилов, Леонид Попов, Бүөтүр Тобуруокап, Моисей Ефимов, Савва Тарасов, Степан Тимофеев, Иван Николаев (Уххан), Наталья Харлампьева, Наталья Михалева (Сайа), Анна Парникова, Елена Слепцова (Куорсуннаах), Надежда Аржакова (Иванова) айымньыларынан, ону тэҥэ Саха сирин биллэр мелодистарын — Христофор Максимов, Валерий Ноев, Алексей Свешников, Марфа Данилова, Сиэн Тиитэп, Галина Шахурдина, Сергей Попов, Владимир Татаринов, Асколон Павлов уо. д. а. ырыаларынан толорор[1].

Дискография:

  • Дорооболоруҥ, бар дьонум
  • Сайдар сахам ыччата
  • Дьүрүскэн ситим
  • Мүрү, Мүрү барахсан
  • 2022 — Дьоллоох Дьиэ Кэргэн
  • 2023 — Оһуохай

Дьиэ кэргэнэ

Кэргэнэ — Андрей, АБДь кыттыылааҕа[3]. Дьиэ кэргэн икки Андрей уонна Семен диэн уоллаах уонна биир Кристина диэн кыыстаах[4].

Ийэтэ — Роза Васильевна Аманатова, норуот эмчитэ.

Наҕараадалар

  • Саха Өрөспүүбүлүкэтин үтүөлээх артыыһа (2009);
  • Байаҕантай нэһилиэгин ытык олохтооҕо;
  • Баатаҕай нэһилиэгин ытык олохтооҕо;
  • Мүрү нэһилиэгин ытык олохтооҕо;
  • Уус Алдан улууһун ытык олохтооҕо.

Быһаарыылар

  1. ↑ 1 2 3 4 5 Презентация книги Вари Аманатовой. Сигэнии күнэ: 14 Алтынньы 2025.
  2. ↑ Энциклопедия культуры и искусства Якутии. — 2011. — ISBN 978-5-7696-3514-4
  3. ↑ Владимир Индигирский: Вся творческая жизнь Вари Аманатовой посвящена якутской песне. https://sakhalife.ru (12 Ахсынньы 2023). Сигэнии күнэ: 14 Алтынньы 2025.
  4. ↑ Варя Аманатова «Өбүгэ тыына» бырайыакка. Сигэнии күнэ: 14 Алтынньы 2025.

Категориялар