Нуучча тылынанАнал бырайыактар
Тылы уларыт
УРУБИИКИ ТУҺУНАН

Скрябин Михаил Архипович

УРУБИИКИ иһигэр маннык араспаанньалаах дьон туһунан ыстатыйалар бааллар, көр Скрябин.

Михаил Архипович Скрябин (1946 сыл ахсынньы 28 күнэ, Орджоникидзевскай оройуон, Саха АССР, ССРС — 2011 сыл ыам ыйын 6 күнэ, Дьокуускай, Саха сирэ, Арассыыйа) — тыйаатыр уонна киинэ артыыһа. Саха сирин кинематографистарын сойууһун чилиэнэ.

Олоҕун олуктара

Михаил Скрябин 1946 сыллаахха ахсынньы 28 күнүгэр Орджоникидзевскай оройуон (билигин - Хаҥалас улууһа) Иккис Дьөппөн нэһилиэгэр төрөөбүтэ.

1974 сыллаахха Маалай Тыйаатыр М. С. Щепкин аатынан училищетын Үһүс саха устуудьуйатын бүтэрбитэ (М. Гладков куууруһа). Ньурба тыйаатырыгар 18 сыл үлэлээбитэ, онно 40 тахса оруолу оонньообута. 1992 сыллаахтан Саха тыйаатырын артыыһа (20 оруол).

Саха Сирин кинематографистарын сойууһун чилиэнэ. Балабанов «Кочегар» киинэтигэр сүрүн оруолун иһин Арассыыйа киноведтарын уонна кинокритиктарын гильдиятын «Үрүҥ слон» бириэмийэтигэр номинацияламмыта.

2011 сыллаахха ыам ыйын 6 күнүгэр ыалдьан өлбүтэ[1].

Айар үлэтэ

Киинэҕэ бастакы оруолун 1986 сыллаахха толорбута. Ол сыл Михаил Мишин «Пауза в мажоре» диэн кэпсээннэрин хомуурунньугар киирбит айымньыларынан уһуллубут «Исключения без правил» киинэ-альманахха быстах оруолга оонньообута. 2002 сыллаахха режиссер Алексей Балабановы кытта үлэлэһэн саҕалаабыта, «Река» киинэҕэ уһуллубута. Сүрүн оруолу толорооччу Туйаара Свинобоева массыына саахалыгар өлбүтүнэн сибээстээн хартыына ситэриллибэтэҕэ, устуу тохтообута. Хас да кэм буолан баран эрэ, киинэ ис хоһоонун уларытан, киинэни ситэрбиттэрэ. Михаил Скрябин режиссер Алексей Балабанов «Груз 200» уонна «Кочегар» курдук мөккүөрдээх киинэлэрэ экраннарга тахсыбыттарын кэннэ киэҥник биллибитэ. 2003 сыллаахха Алексей Балабанов «Американец» киинэтигэр уһуллубута, оттон 2007 сыллаахха артыыс элбэх араас сыанабылы ылбыт «Груз 200» драматическай киинэҕэ олус уустук оруолу толорбута[2].

Фильмографията

  • 1986 — «Исключения без правил» киноальманах
  • 2002 — Бог[3]
  • 2002 — Река — Джанга
  • 2004 — Американец — тофалар Николай Павлович Унгуштаев
  • 2007 — Груз 200 — Сунька
  • 2010 — Кочегар — Саха

Скрябин ону таһынан Саха сирин режиссера Эдуард Новиковтыын бииргэ үлэлээбитэ. Скрябин сүрүн оруолга оонньообут Новиков «Бог» диэн киинэтэ Испанияҕа «Сибэтиэй Анна» бэстибээлгэ көрдөрүллүбүтэ[4].

Тыйаатырга үлэтэ

Нюрбатааҕы көһө сылдьар Драматическай тыйаатырга 18 сыл сулууспалаабыта, онно 40-тан тахса оруолу оонньообута.

1992 сылтан — П. А. Ойуунускай аатынан Саха академическай драматическай тыйаатырын артыыһа.

  • Бырдаахап — Николай Неустроев «Куһаҕан тыын» (Герасим Васильев туруоруута).
  • Баһымньы Дьаакып — Анемподист Софронов-Алампа «Олох дьэбэрэтэ».
  • Туораах — Амма Аччыгыйа «Саас» (Василий Фомин туруоруута)

Кириитикэ

Бэйэтин Саха тыйаатырыгар Король Лир оруолунан аатырбыта[5].

«Кочегар» киинэҕэ оонньооһунун иһин «Үрүҥ слон» бириэмийэҕэ түһэриллибитэ[6].

Наҕараадалара уонна ытык ааттара

  • Саха сирин Кинематографистарын сойууһун чилиэнэ[7];
  • Саха Өрөспүүбүлүкэтин култууратын туйгуна;
  • Хаҥалас улууһун Ытык олохтооҕо[2].

Быһаарыылар

  1. ↑ Умер известный актёр Михаил Скрябин — N4k.Ru. Сигэнии күнэ: 24 Ахсынньы 2013. Архивировано из оригинала 24 Ахсынньы 2013 года.
  2. ↑ 1 2 Скрябин Михаил Архипович, МБУК «ХАНГАЛАССКАЯ МЦБС» (19 Кулун тутар 2026). Сигэнии күнэ: 3 Атырдьах ыйын 2026.
  3. ↑ Эдуард Новиков: фильмография. Вокруг ТВ. Сигэнии күнэ: 17 Муус устар 2022.
  4. ↑ РИА Новости. Сигэнии күнэ: 23 Балаҕан ыйын 2013. Архивировано 26 Алтынньы 2016 года.
  5. ↑ Алексей Балабанов в фильме «Кочегар» отправил все устои кинематографа в топку. Сигэнии күнэ: 31 Ыам ыйын 2019. Архивировано 24 Сэтинньи 2020 года.
  6. ↑ Кинопресса.ру — официальный сайт Гильдии киноведов и кинокритиков России. Сигэнии күнэ: 17 Олунньу 2011. Архивировано из оригинала 3 Муус устар 2011 года.
  7. ↑ правды», Ирина РЮТИНА | Анастасия ШАРАПОВА | Сайт «Комсомольской. Скончался исполнитель главной роли в фильме «Кочегар»: Михаил Скрябин с детства боролся со страшной болезнью, irk.kp.ru - Сайт «Комсомольской правды» (10 Ыам ыйын 2011). Сигэнии күнэ: 3 Атырдьах ыйын 2026.

Сигэлэр

Эбии бу тиэмэҕэ

Категориялар