Кириллин Егор Егорович

1951 сыллаахха от ыйын 21 күнүгэр Мэҥэ-Хаҥалас улууһун Хочо нэһилиэгэр төрөөбүтэ.

1979 сыллаахха Хабаровскайдааҕы култуура уонна ускуустуба институтун «Норуодунай тыйаатыр режиссера» салаатын бүтэрбитэ. Үөрэҕин бүтэрээт биир сыл Саха тыйаатырыгар үлэлээбитэ.

1980 сылтан 2008 сыллаахха олохтон барыар диэри Ньурбатааҕы судаарыстыбаннай көһө сылдьар дыраама тыйаатырыгар үлэлээбитэ.

2008 сыл атырдьах 12 күнүгэр өлбүтэ^[1].

Тыйаатырга маҥнайгы оруола — «Аймалҕан» диэн Михаил Догордуров испэктээкэлигэр Ньуолбардаах баһылык уобараһа.

И. Дмитриев-Сиэн Чолбодук «Тойукпун торумнааҥ, иһирэхпин истиҥ» испэктээгэр Анемподист Софронов уобараһын арыйбытын туһунан өрөспүүбүлүкэ бэчээтигэр сырдаппыттара. В. Протодьяконов «Манчаары» испэктээгэр режиссер ассистенын быһыытынан үлэлэспитэ, оттон А. Кулаковскай «Преступник Манчаары» айымньытынан СӨ ускуустубатын үтүөлээх диэйэтэлэ Юрий Макаров туруорбут испэктээгэр Чоочо оруолун ылыннарыылаахтык толорбута.

Барыта алта уонча араас хабааннаах уобарастары толорбута, олор истэригэр:

• П. Тобуруокап «Алаас ырыата» — Тыҥкыылап;
• Ч. Ойдоб «Бэлэн Сэнгээ» — Жалбуу;
• И. Егоров «Хобороос» — Кыра Алеша;
• Далан «Хааннаах Илкээни» — Нэлэкэ Ойуун;
• Сиэн Чолбодук «Халлаан дьайҕара халлыах тустаах» — Суоратап;
• Н. Якутскай «Араҥ уонна таптал» — Бэдьэкэ.

Үлэтин таһынан Ньурба улууһун «Ньурба» телестудиятын «Кэрчик» биэриитин ааптарынан, ыытааччытынан үлэлээбитэ.

«Майа-фильм» Манчаары Баһылай туһунан уһулбут киинэтигэр улуус баһылыгын оруолун толорбута.

1994 сыллаахха «Херсонесские игры» (Севастополь) уонна «Золотой лев» (Львов) бэстибээллэргэ кыттыбыта^[1].

Ньурба тыйаатырын туһунан матырыйааллары хомуйан саҕалаабыта уонна тыйаатыр түмэл-хоһун тэрийэн бастакы салайааччытынан буолбута. «Ньурба театра» диэн кинигэни хомуйан таһаартарбыта.

Тыйаатыр идэлээх сойууһугар хас да сыл үлэлэспитэ, тыйаатыр уус-уран сэбиэтин чилиэнэ этэ^[1].

• Саха Өрөспүүбүлүкэтин култууратын туйгуна;
• Саха Өрөспүүбүлүкэтин үтүөлээх артыыһа (2006)^[1].