Багынанова Зоя Петровна
Багынанова Зоя Петровна (1942 сыл муус устар 22 күнэ, Далыр, Саха АССР) — тыйаатыр артыыһа, Саха Өрөспүүбүлүкэтин норуодунай артыыһа.
Олоҕун олуктара
Зоя Багынанова 1942 сыллаахха муус устар 22 күнүгэр Үөһээ Бүлүү оройуонугар Үөдүгэй нэһилиэк Далыр сэлиэнньэтигэр төрөөбүтэ[1].
1961—1966 сс. — М. С. Щепкин аатынан Москватааҕы тыйаатыр училищеҕа үөрэммитэ. Үөрэҕин бүтэрээт, Ньурбатааҕы Судаарыстыбаннай көһө сылдьар драматическай тыйаатырга үлэлээбитэ.
1969—1983 сс. — П. А. Ойуунускай аатынан Саха академическай тыйаатырыгар үлэлээбитэ.
1983 сылтан Ньурба драматическай тыйаатырыгар, Нерюнгри куукула тыйаатырыгар үлэлээбитэ.
Ньурба көһө сылдьар драматическай тыйаатырын олохтообут дьонтон биирдэстэрэ. 1969—71 сс. П. А. Ойуунускай аатынан Саха драматическай тыйаатырын артыыһа, 1991 сылтан П. А. Ойуунускай аатынан Саха академическай тыйаатыр артыыската[2].
Айар үлэтэ
Кэргэнин Федот Потаповы кытта Нерюнгри куоракка куукула театрын, республикаҕа соҕотох оҕо театырын, иилээн-саҕалаан үлэлэппиттэрэ. Оҕолорго анаан И. Гоголев остуоруйалара, П. Ойуунускай, Н. Заболоцкай айымньыларыттан быһа тардыылар оонньоноллор.
Хойукка кэмҥэ Зоя Багынанова театр сүгүрүйээччилэригэр Александр Пушкин, Михаил Лермонтов, Анна Ахматова, Борис Пастернак, Өксөкүлээх Өлөксөй, Анемподист Софронов, Платон Ойуунускай, Иван Арбита, Семен Данилов, Леонид Попов, Петр Тобуроков, Иван Гоголев айымньыларыттан иһиллибит моноспектакль толорор. Итини таһынан, Зоя Багынанова толоруутугар Варвара Потапова, Наталья Харлампьева, Саргылана Гольдерова, Антонина Гаврильева, Александра Григорьева, Анна Парникова, Дархаана, Венера, Умсуура хоһоонноро театр үрдүкү сценатыттан ааҕыллаллар.
Кэргэнин, Ф. Ф. Потапов, сырдык кэриэһигэр анаан «Дьээбэ» куукула тыйаатырын тэрийэн үлэлэтэр. Тыйаатыр оҕо тэрилтэлэригэр, оскуолаларга оонньуур. Улуустары кэрийэн, инбэлиит-оҕолорго, тулаайах оҕолорго босхо спектакль көрдөрөр.
Дьиэ кэргэнэ уонна аймахтара
Кэргэнэ — Ф. Ф. Потапов, драматург, режиссер.
Биэс оҕолоох.
Улахан уола Геннадий Багынанов (1964 - 2023) - киинэ уонна тыйаатыр режиссера[3].
Ииппит кыыһа — Потапова Елизавета Федотовна, Саха Өрөспүүбүлүкэтин үтүөлээх артыыһа.
Наҕараадалара уонна ытык ааттара
- Саха АССР үтүөлээх артыыһа (1981);
- Саха Өрөспүүбүлүкэтин норуодунай артыыһа (2001);
- П. А. Ойуунускай аатынан судаарыстыбаннай бириэмийэтэ (2022)[2].