Шадрина Ньургуйаана Николаевна
Шадрина Ньургйаана Николаевна (1981 сыл тохсунньу 13 күнэ, Болугур нэһилиэгэ, Саха АССР) — тыйаатыр уонна киинэ артыыһа, педагог. П. А. Ойуунускай аатынан академическай Саха тыйаатырын сүрүннүүр артыыһа.
Олоҕун олуктара
1981 сыллаахха тохсунньу 13 күнүгэр Саха АССР Амма улууһун Болугур нэһилиэгэр төрөөбүт. Аҕатынан араспаанньата — Барабанова.
2002 сыллаахха М. С. Щепкин аатынан Үрдүкү тыйаатыр училищетын саха устуудьуйатын бүтэрбит.
Тыйаатырга карьерата
2002 сылтан П. А. Ойуунускай аатынан Саха академическай тыйаатырыгар үлэлиир.
Сыллар устата саха уонна аан дойду классика айымньыларынан испэктээктэргэ элбэх араас оруоллары толорбут, олор истэригэр:
- Аанчык — «Сааскы кэм», Амма Аччыгыйа;
- Леди Капулетти — «Арай биирдэ куоракка», У. Шекспир;
- Леди Макбет — «Макбет», Э. Ионеско;
- Туйаарыма Куо — «Туйаарыма Куо» (олоҥхо);
- Аҕа Хобороос — «Хара кыталык», И. Гоголев;
- Исмиэнэ — «Антигона», Софокл;
- Итэҕэл — «Кэрэни көмүскүүргэ»;
- Тыал — «Мэник мэник»;
- Клара — «Кэт Марсден. Эдьиий амарах санаалаах»;
- Линь (кыталык) «Бырастыы гын, аҕаа, бырастыы гын!», В. Харысхал;
- Ньургун Боотур — «Таптал куората»;
- Оля — «Дьикти дьахтар», Н. Садур;
- Сосо — «Күн көрөбүн», Н. Думбадзе;
- Дьүөгэ — «Таптаа миигин, таптаа», В. Красногоров;
- Кыыс — «Солко кыыһа»;
- Балбаара — «Чуораан уолаттара», С. Барахова;
- Даайыс «Дьадаҥы Дьаакып», Алампа;
- Үөрэнээччи — «Учуутал», В. Харысхал;
- Боккуой — «Оҕо Баҕалаах», П. Ойуунускай;
- Маайа — «Төлөй», Н. Якутскай;
- Диаманте — «Хайа аарымалар», Л. Пиранделло;
- Секретарь Анна — «Тимир Баасса», М. Горькай;
- уонна да атын оруоллар.
2012 сылтан Олоҥхо тыйаатырын туруорууларыгар оонньуур.
Артыыс үлэтиттэн ураты, «Күн оҕолоро» оҕо студия үлэтин салайар, онно учууталлыр.
Киинэҕэ үлэтэ
Киинэҕэ аан бастаан 2006 сыллаахха Сергей Потапов «Тыын…» драматыгар көстүбүт. Итинтэн салгыы «Лыах» (2012) киинэҕэ, Любовь Борисова «Мин үрдүбэр күн хаһан да киирбэт» (2019) драматыгар уһуллубут.
2021 сыллаахха киинэҕэ сүрүн оруолу бастакытын толорбут — режиссер Татьяна Эверстова «Замыкание» психологическай триллеригэр.
Ол сыл улахан экраҥҥа 1942 сыллаахха Саха сиригэр буолбут түбэлтэлэр тустарынан «Тымныы көмүс» историческай драма тахсыбыт, онно Шадрина тэттик оруолу толорбут.
2024 сыллаахха Михаил Лукачевскай «Кыталыктаах кырдалым» драматыгар сүрүн герой ийэтин оонньообут.
Фильмография
- 2006 — Тыын (реж. Сергей Потапов);
- 2012 — Лыах (реж. Вячеслав Семенов);
- 2019 — Мин үрдүбэр күн хаһан да киирбэт (реж. Любовь Борисова);
- 2020 — Тиэтэйбит (реж. Роман Дорофеев);
- 2021 — Тымныы көмүс (реж. Любовь Борисова);
- 2021 — Замыкание (реж. Татьяна Эверстова);
- 2021 — Нуучча (реж. Владимир Мункуев);
- 2021 — Саллаат сүрэҕэ (реж. Руслан Тараховскай);
- 2022 — Кэрэни көрбүт (реж. Любовь Борисова);
- 2023 — Дикая (реж. Алексей Луканев);
- 2023 — Кандидат (реж. Дмитрий Шадрин);
- 2024 — Триумф (реж. Михаил Лукачевский)
- 2024 — Кыталыктаах кырдалым (реж. Михаил Лукачевский).
Тус олоҕо
Кэргэнэ — киинэ артыыһа, «ДетСат» устуудьуйа тэрийээччитэ, «Сахафильм» хампаанньа генеральнай продюсера Дмитрий Шадрин (2002 сылтан). Дьиэ кэргэн икки уол, биир кыыс оҕолоохтор.
Ньургуйаана — түөрт эдьиийдии-балыстартан биирдэстэрэ, олортон улаханнара документалист, режиссер Сардаана Барабанова, оттон ортоку балтылара — Лия Федулова, «Мисс-Якутия-2005» күрэх кыттыылааҕа, «Мисс Фото» номинация кыайыылааҕа.
Быһаарыылар
Эбии бу тиэмэҕэ
 |
|---|
