Никифоров Василий Васильевич

Василий Васильевич Никифоров 1866 сыл ыам ыйын 18 күнүгэр (с.и.) Саха уокуругун Дүпсүн улууһугар (билиҥҥи Уус-Алдан улууһугар) сэниэ дьиэ кэргэҥҥэ төрөөбүтэ. Аҕата — Баһылай Никииппэрэп — Дьокуускайдааҕы уезднай училищаҕа үөрэммит киһи — 1840-с сыллар бүтүүлэригэр Дүпсүн улууһун суруксута эбит (бэйэтин төрдө — Арҕаа Хаҥалас улууһа). 1851 сыллаахха хас да нэһилиэк «ревизские сказки» дэнэр дөкүмүөнүн сатабыллаахтык оҥорон куортугунан наҕараадаламмыт^[1].

Оҕолорун (4 уол, 4 кыыс) үөрэхтээх дьон оҥороору дьиэтигэр оскуола арыйан үөрэттэрбит. Онно көскө сылдьар аҕабыыт учууталлаабыт. Ол гынан баран уола Василий ахтарынан, арыгыннан үлүһүйэр таҥара үлэһиттэрин кытта куомуннаһан, бэйэтэ арыгыһыт буолан хаалбыт, онон уола үстээҕэр өлбүт. Василийы 1872 сыллаахха улуус суруксута Даниил Федорович Охлопков иитэ ылбыт.

Василий бастакы учууталынан политсыылынайдар Н. П. Странден, П. Д. Ермолов, Д. А. Юрасов уонна П. П. Подбельскай этилэр. 1874 сыллаахтан Охлопков уолу үөрэттэрээри Страндены бэйэтин дьиэтигэр олордор. Онтон 1875 сыллаахха Охлопков уолу Нецветова диэн Странден билэр дьахтарыгар Дьокуускайга олохтуур. Нецветова бэлэмнээбитин кэннэ 1877 сыллаахха уол Дьокуускайга эр дьон прогимназиятыгар киирбит. Онтун 1885 сыллаахха бүтэрбит. Учууталын Странден дьиэтигэр Нам улууһугар көскө сылдьар медик-устудьуон А. А. Сиповичтыын билсэр. Доҕотторун А. А. Афанасьевтыын уонна В. П. Поповтуун киниэхэ дьону эмтииригэр, нэһилиэктэри кэрийэригэр көмөлөһөллөр, бу сылдьан мэдэссиинэнэн үлүһүйэллэр, уонна бары бэйэлэрин улуустарыгар балачча өр кэмҥэ биэлсэр үлэтин толороллор.

Үөрэнэ сылдьан кэлин бииргэ үлэлэспит дьонун кытта — бырааттыы Илья, Федор, Иосиф Поповтары, П. А. уонна М. А. Афанасьевтары, П. Н. Сокольниковы, В. Я. Слепцовы, Е. Д. Николаев II, онтон кэлин биллиилээх уопсастыбаннай диэйэтэл Е. Д. Николаевтыын — билсэр.

Оскуоланы бүтэрэр 1885 сылыгар ииппит аҕата дьадайан хаалан, гимназия дириэктэрэ көҥүлүнэн тохсунньуга төрөөбүт улууһугар суруксуттуу тахсар. Сайын бэс ыйыгар алта кылаастаах прогимназияны бүтэрэр, уонна салгыы үлэлиир. Бу кэмҥэ көскө сылдьар Папий Павлович Подбельскайы кытта билсэр, кини көҕүлээһининэн табаарыстарын кытта Дүпсүҥҥэ уонна Мэҥэҕэ Саха сиригэр бастакы бибилэтиэкэлэри арыйар.

1886 сыллаахха Дьокуускайга Илин Сибиир генерал-губернатора граф А. П. Игнатьев кэлэринэн ситимнээн, П. П. Подбельскай көмөтүнэн, Дүпсүн улууһун туругун туһунан дакылаат-сурук оҥорор. Онно сир барыта чааһынай билиигэ киириэ суохтааҕын туһунан этэр, олохтоохтор ыар баттыгастаах олохторун кэпсиир, түһээннэрэ наһаа үрдүгүн суруйар уонна сахаларга бэйэни салайыныыны киллэрии туһунан этии киллэрэр.

1887 сыллаахха Дьокуускайдааҕы уобалас түмэлигэр былыргы таҥастары уонна былыргы бухатыыр тимир бэргэһэтин сорҕотун бэлэхтиир. Ити маллар тустарынан этнографическэй справка оҥорор.

1889 сыл кулун тутарыгар сыылынайдар өрө турууларын кэмигэр Подбельскай өлөрүллүбүтүн кэннэ, кини архыыбын П. А. Афанасьевтыын ойуурга кистииллэр^[2].

1890 сыллаахха Дүпсүн кулубата буолар. Бу дуоһунаска үлэлии сылдьан кини сири таҥастааһыны кэҥэтэргэ, култуураны көтөҕүүгэ, дьон ыраас олоҕун туһугар, арыгылааһыны уонна хаартылааһыны утары охсуһар. Атыыһыт К. Д. Спиридоновтыын кыттыһан Дүпсүҥҥэ бастаан приход оскуолатын, онтон кини олоҕор министерскэй оскуоланы арыйтарар. Үөрэҕириигэ үлэтин иһин үрдүк наҕараадаҕа тиксэр — тохсунньу 25 күнүгэр 1895 с. импэрээтэр аатыттан Станиславскай лиэнтэлээх үрүҥ көмүс мэтээли тутар.

1894—1896 сылларга Сибиряков экспедициятын үлэтигэр кыттар.

1900 сыллаахха быраас Сокольниковтыын кылгас саха-нуучча тылдьытын оҥорорго сахалартан харчы хомуйар. Кинилэр көрдөһүүлэринэн тылдьыт матырыйаалын хомуйууну политсыылынай Э. К. Пекарскай бэйэтигэр ылыммыт, онтон бу дьыалаҕа атын сыылынайдары уонна саха үөрэхтээхтэрин кытыннарбыт.

1906 сыллаахха Сахалар сойуустарын (Союз якутов) тэрийэр. Сойуус аатыттан Миниистирдэр сэбиэттэрин бэрэссэдээтэлэ С. Ю. Витте аатыгар ирдэбиллэрин ыытар. Арассыыйа импиэрийэтин ис дьыалаҕа миниистирин Дурново П. Н. бирикээһинэн тохсунньу 19 (билиҥҥиннэн олунньу 1) күнүгэр хаайыыга угуллар. Бу сытан «Манчаары түөкүн» диэн дырааматын суруйар. От ыйын 25 күнүгэр (билиҥҥиннэн атырдьах ыйын 7) суут буолуор диэри босхолонор. Алтынньыга «үөрэххэ тардыһар сахаларга» анаан «Саха кулууба» диэни тэрийэр. Бу кулуупка сахалыы ааҕыылары ыытар, «Манчаарытын» туруорар.

1907 сыллаахха Саха сиригэр холуобунай буруйдаахтары көскө ыытары утарар ыстатыйата «Якутский край» хаһыакка тахсыбыт.

1923 сыллаахха Москубаҕа Бүтүн Арассыыйатааҕы тыа хаһаайыстыбатын I быыстапкатыгар Саха АССР павильонун тэрийбит. Балаҕан ыйын 30 күнүгэр үөрүүлээх аһыллыыга тыл эппит.

1927 сыллаахха Дьокуускайга кэлэ сылдьан конфедералистар дьыалаларынан тыллаабатаҕын иһин тутуллар. 1928 сыл атырдьах ыйын В. В. Никифоров ытылларга ууруллубут, онтон бу бириигибэри лааҕырга 10 сылга ыытыынан солбуйбуттар. 1928 сыллаахха балаҕан ыйын 15 күнүгэр Новосибирскай куорат түрмэтин балыыһатыгар өлбүтэ^[3]. 1992 сыл олунньутугар реабилитацияламмыта.

• Манчаары (Манчаары түөкүн); Киһинэн үтүгүннэрэн көрдөрөр кэпсээн. Биэс оонньуулаах /Изд. И. Н. Эверстова — Якутск: типография В. В. Жарова, 1908 — 65 с.
• Манчаары (Манчаары түөкүн); Киһинэн үтүгүннэрэн көрдөрөр кэпсээн. Биэс суол оонньуулаах /Саха Респ. Наукатын академиятын Гуманитарнай чинчийии института — Дьокуускай: ООО «Литограф», 1996 — 40 с.
• Тоҕо итиэннэ хайдах суруллубутай «Манчаары» диэн оонньуу? / В. В. Никифоров // «Чолбон». — 1991. — № 5. — С. 25—29
• Н. Г. Чернышевскай туhунан; К. Г. Неустроев-Урсик туhунан; Кэриэс сурук: Ахтыылар уонна кэриэс сурук / Бэчээккэ бэлэмнээтэ, тылбаастаата И. Федосеев// «Чолбон». — 1991. — № 5. — С. 29—34

• Толстой Л. Н. Хараҥа суол күүһэ (Власть тьмы)\\ Саха саҥата. — 1912. — № 2 1913, — № 2, 3.
• Гоголь Н. «Ревизор», «Женитьба»

• С. В. Сыроватская. В. Никифоров быыстапканы тэрийээччи: [I Бутун Союзтаа5ы ТХБ-гар Саха Сирин кыттыыта]/ С. Сыроватская// «Чолбон». — 1992. — № 11. — С. 161—164
• Ушницкай, И. Кэнчээри кэпсээнэ, Ороhу олоҥхото буолуоҕа: [В. В. Никифоровы уйэтитии]/ И. Ушницкай // «Чолбон». — 1992. — № 11. — С. 141—143
• Клиорина, И., Федосеева, И. Умнуллубат үтүөлээх киhи: [Саха биир бастыҥ драматура, журналиhа уонна учуоайа В. В. Никифоров төрөөбүтэ 125 сылын туолуутугар] // «Чолбон». — 1991. — № 5. — С. 5—7
• Копырин, Николай Захарович. В. В. Никифоров-Күлүмнүүр : (олоҕо, үлэтэ, айымньыта) / Н. З. Копырин. — Дьокуускай: [и. с.], 1996. — 185, [10] с.
• Василий Васильевич Никифоров / Уус-Алдан оройуонун дьаһалтата, Уус-Алданнаа5ы оройуон Сэбиэтэ, Оройуоннааҕы киин б-ка; [хомуйан оҥордо З. В. Мигалкина]. — Бороҕон: [б. и.], 1993. — 34 с.

• Ойунский П. Никифоров В. В. // Литературная энциклопедия: В 11 т. Т. 8. — М.: ОГИЗ РСФСР, 1934. — Стб. 76—77.
• Пестерев В. И. История Якутии в лицах. — Якутск: Бичик, 2001. — С. 168—171. — 464 с. — ISBN 5-7696-1606-7
• Копырин Н. З. В. В. Никифоров — Күлүмнүүр (Олоҕо, үлэтэ, айымньыта). — Дьокуускай: ООО «Литограф», 1996. — 196 с.