Коростелев Сергей Петрович

1923 сыллаахха Пермь губерниятыгар Архангело-Пашийскай собуот бөһүөлэгэр (билигин Пермь кыраайын Горнозаводскай оройуонун Пашия (нууч.) (сах. куорат тииптээх бөһүөлэк) бааһынай дьиэ кэргэҥҥэ төрөөбүт.

1939 сыллаахха ситэтэ суох орто оскуоланы бүтэрэн, цемент-металлургическай собуокка слесарынан үлэлээн саҕалаабыт.

1941 сыллаахха Кыһыл Аармыйаҕа ыҥырыллыбыт. Аҕа дойду Улуу сэриитин кыттыылааҕа. Сталинград анныгар, Хотугулуу-Арҕааҥы фроҥҥа сэриилэспит. 1945 сыллаахха ыараханнык бааһырыы кэнниттэн демобилизацияламмыт.

1946—1957 сылларга Пермь кыраайыгар «Уралалмаз» байытар фабрикаҕа слесарынан, онтон маастарынан үлэлээбит.

1957 сыллаахха, Саха АССР-гар алмааһы хостуур бырамыысыланнас саҥа сайдан эрдэҕинэ, Ураалтан Мирнэй куоракка ананан тиийбит испэсэлиистэр истэригэр киирбитэ. «Якуталмаз» холбоһук 2 №-дээх байытар фабрикатыгар слесарынан, онтон старшай слесарынан үлэлээбит. Кини салайыылаах монтажниктар биригээдэлэрэ 1 уонна 2 № — дээх байытар фабрикалары туппуттар, 5 уонна 7 №-дээх фабрикалары тэриллээбиттэр. Ол кэннэ Удачнай бөһүөлэккэ командировкаҕа ыытыллан, 11 №-дээх байытар фабрика монтажтааһынын салайбыт.

1963—1964 сылларга алмаас оборудованиетын туруорууга бөдөҥ специалист быһыытынан Гвинеяҕа (Арҕаа Африка) командировкаламмыт, онно икки алмаас байытар фабрикатын тутууга кыттыбыт.

ССРС Үрдүкү Сэбиэтин Президиумун 1971 сыл кулун тутар 30 күнүнээҕи ыйааҕынан өҥнөөх металлургияны сайыннарыыга уһулуччу ситиһиилэрин иһин Коростелев Сергей Петровичка Социалистыы Үлэ Дьоруойун аата иҥэриллибит, Ленин уордьана уонна «Сиэрпэ уонна Балта» кыһыл сулус туттарыллыбыт.

1978 сыллаахха^[2], пенсияҕа тахсыбытын кэннэ, Казах ССР Алма-Ата уобалаһын Талгар куоратыгар (1991 сылтан Казахстаан) көспүт. Өлбүт күнэ-дьыла биллибэт^[1].

• Үлэ Кыһыл Знамятын Уордьана (09.06.1961);
• Социалистыы Үлэ Дьоруойа (30.03.1971);
  • «Сиэрпэ уонна Балта» 13221 № мэтээл;
  • Ленин уордьана № 410262 (30.03.1971);
• Мирнэй куорат Ытык киһитэ (03.04.1974);
• Аҕа дойду сэриитин 2-с истиэпэннээх уордьана (11.03.1985)^[1].