Андреев Борис Николаевич
Андреев Борис Николаевич (1915 сыл тохсунньу 28 күнэ, Кутана, Саха уобалаһа — 1985 сыл бэс ыйын 22 күнэ, Элгээйи, Саха АССР) — педагог, биолог, кыраайы үөрэтээччи, таксидермист. РСФСР оскуолатын үтүөлээх учуутала. Элгээйигэ Айылҕа түмэлин олохтообут.
Олоҕун олуктара
Борис Андреев 1915 сыллаахха тохсунньу 28 күнүгэр Сунтаар улууһугар Кутанаҕа төрөөбүт.
1932 сылтан 1933 сылга диэри Күндэйэ начаалынай оскуолатын учуутала. 1936 сылтан, Дьокуускайдааҕы педтехникуму бүтэрэн баран, Элгээйи оскуолатыгар учууталлаабыт.
1941 сылтан 1953 сылга уонна 1959 сылтан 1961 сылга диэри Ньурба орто оскуолатыгар биология учууталынан үлэлээбит.
1961—1963 сс. — Дьокуускайга эдэр натуралистар станцияларыгар методиһынан үлэлээбит.
1963—1966 сс. — Сунтаар улууһугар Бүлүүчээн орто оскуолатыгар биология учуутала. 1966 сылтан 1985 сылга диэри Элгээйи орто оскуолатыгар учууталлаабыт.
Учуонай, кыраайы үөрэтээччи Борис Николаевич Сунтаар улууһугар Элгээйигэ Айылҕа түмэлин тэрийбит (1971).
«Бүлүү тардыытын көтөрдөрө» диэн кинигэ ааптара[1].
Наҕараадалара уонна ытык ааттара
- «Аҕа дойду сэриитигэр 1941—1945 сс. килбиэннээх үлэ иһин» мэтээл (1945);
- Д. Ушинскай аатынан бириэмийэ лауреата (1957);
- Октябрьскай Революция уордьана (1971);
- РСФСР оскуолатын үтүөлээх учуутала (1974);
- ВДНХ Улахан үрүҥ көмүс мэтээлэ;
- «Үлэ бэтэрээнэ» мэтээл (1975);
- Сунтаар улууһун ытык олохтооҕо (1975);
- ССРС уонна РСФСР норуотун үөрэҕириитин туйгуна (1980);
- Саха АССР култууратын үтүөлээх үлэһитэ (1985)[1].
Аатын үйэтитии
- Элгээйи эрэгийиэннээҕи экологическэй түмэл киинэ Борис Андреев аатын сүгэр, сэлиэнньэҕэ киниэхэ аналлаах боруонса пааматынньык турар (2015)[1].