Нуучча тылынанАнал бырайыактар
Тылы уларыт
УРУБИИКИ ТУҺУНАН

Солдатов Алексей Анатольевич

Солдатов Алексей Анатольевич (1983 сыл балаҕан ыйын 11 күнэ, Черскэй, Саха АССР) — Арассыыйа ырыаһыта, Г. М. Кривошапко аатынан Саха сирин судаарыстыбыннай Филармониятын симфоническай хорун толорооччута (тенор), «Русь» норуот фольклорун ансаамбылын солиһа. Саха Өрөспүүбүлүкэтин култууратын туйгуна.

Олоҕун олуктара

1983 сыллаахха балаҕан ыйын 11 күнүгэр Мэҥэ-Хаҥалас улууһун Майа нэһилиэгэр төрөөбүт. Икки ыйдааҕар төрөппүттэрэ Аллараа Халыма улууһун Черскэй бөһүөлэгэр көспүттэр, онон төрөөбүтүн туһунан туоһу суругар төрөөбүт сиринэн Черскэй ыйыллыбыт.

Оҕо сааһа Аллараа Халымаҕа ааспыт. Сыл аайы ийэтин өттүнэн эбэтигэр Аллараа Бэстээххэ сайылыыр эбит.

Кэлин дьонун кытта Дьокуускай куоракка көспүт, онно Оҕо ускуустубатын 1 №-дээх оскуолатын аккордеон хайысхатынан кыһыл дипломнаах бүтэрбит. Ону тэҥэ, оскуолаҕа үөрэнэр сылларыгар уолаттар хордарыгар ыллыыр эбит.

Тохсус кылаас кэнниттэн Жатайдааҕы техникумҥа үөрэнэ киирбит, 4 разрядтаах повар-кондитер идэтин баһылаабыт. Бу кэннэ Дьокуускайдааҕы эргиэн-экэниэмикэ колледжыгар «уопсастыбаннай аһылык технолога» идэҕэ үөрэммит, 2004 сыллаахха бүтэрбит.

Устудьуон сылларыгар, сайыҥҥы сынньалаҥ кэмигэр, үлэлээн саҕалаабыт. Аҕата «Анаабыр Алмаастара» хампаанньаҕа үлэлиир буолан, кинини бириискэҕэ ас астааччынан илдьэ барбыт. Нөҥүө сыл хайа үлэтигэр хаһааччынан барсыбыт.

Бэйэтэ кэпсээбитинэн, ол сайын өлөрбүт харчытынан Дьокуускайга таһаҕаһы тиэйэр массыына атыыласпыт уонна онтон ыла атыы-эргиэн эйгэтигэр араас дуоһунастарга үлэлээбит: табаар таһааччыттан супервайзерга диэри. 2015 сылтан 2018 сылга диэри транспорт компаниятыгар суоппарынан үлэлээбит.

2019 сыллаахха Арктикатааҕы судаарыстыбаннай култуура уонна ускуустуба институтугар (АГИКИ) Айталина Саввична Адамоваҕа академическай вокал кууруһугар үөрэнэ киирбит. Бу сыл Г. М. Кривошапко аатынан Саха сирин судаарыстыбыннай Филармониятыгар ырыаһытынан ылыллыбыт[1][2].

Айар үлэтэ

2002 сылтан «Русь» норуот ырыатын ансаамбылын толорооччута (салайааччыта — Вера Васильевна Помогаева), норуот уонна фольклор ырыаларын ыллыыр. Ансаамбылы кытта норуоттар икки ардыларынааҕы фестивалларга үгүстүк кыттыбыт. «Даймонд» норуот инструменнарыгар оонньуур бөлөх доҕуһуоллаах нуучча норуодунай ырыатын (нууч.) (сах. уонна үҥкүүтүн көрдөрөр бырагыраамалаах Мексикэҕэ кэнсиэрдээбит.

Г. М. Кривошапко аатынан Саха сирин судаарыстыбыннай Филармониятын хорун толорооччутун быһыытынан аан бастаан 2019 сыл тохсунньутугар ыллаабыт. Репертуарыгар нууччалыы уонна омуктуу ырыалар, классическай айымньылар, норуот ырыалара — уопсайа 140-тан тахса ырыа киирэр[1][2].

Араас айар бөлөхтөр састааптарыгар, ол иһигэр Аrco ARTico струннай ансаамбыл доҕуһуоллаах ыллыыр[3].

2023 сыллаахха кулун тутар 18 күнүгэр Саха судаарыстыбыннай Циркэтин саалатыгар «Вечер с кумиром» диэн бырайыак чэрчитинэн бастакы айар киэһэтэ буолан ааспыт[4].

Наҕараадалара уонна ытык ааттара

  • Арктикатааҕы судаарыстыбаннай култуура уонна ускуустуба институтун бастыҥ устудьуоннарыгар бэриллэр Анастасия Саввична Сыромятникова аатынан стипендия тутааччыта (2020 сыл)[5];
  • Саха Өрөспүүбүлүкэтин култууратын туйгуна (2023)[6].

Тус олоҕо

2003 сылтан кэргэннээх, икки кыыс оҕолоохтор (улахан кыыстара 2003 сыллаах төрүөх, кырата — 2018)[1].

Ийэтэ Ольга Робертовна Солдатова «Русь» норуот ырыатын ансаамбылын ырыаһыта[2].

Быһаарыылар

  1. ↑ 1 2 3 Роль среди множества профессий: солист филармонии Алексей Солдатов о поиске себя (рус.). bezformata.com (30 Тохсунньу 2023).
  2. ↑ 1 2 3 Народный вокальный ансамбль «Русь» (рус.). ddnykt.ru. Сигэнии күнэ: 23 Олунньу 2026.
  3. ↑ Струнный ансамбль Arco ARTico Филармонии Якутии празднует 11-й день рождения (рус.). minkult.old.sakha.gov.ru. Сигэнии күнэ: 23 Олунньу 2026.
  4. ↑ «Вечер с кумиром» с Алексеем Солдатовым (рус.). diamond-circus.ru (21 Кулун тутар 2023).
  5. ↑ В Якутске состоялась встреча со стипендиатами имени Анастасии Сыромятниковой (рус.). ysia.ru. Сигэнии күнэ: 23 Олунньу 2026.
  6. ↑ Поздравляем Валентину Готовцеву и Алексея Солдатова с вручением почетного звания «Отличник культуры РС(Я)»! (рус.). filarmony.ru (6 Олунньу 2023).

Категориялар