Слепцов Андриан Семенович
Андриан Семёнович Слепцов (1916 сыл от ыйын 30 күнэ, Бахсы нэһилиэгэ (Чурапчы улууһа) — 1993 сыл ыам ыйын 19 күнэ) — сэбиэскэй тыйаатыр диэйэтэлэ, Саха АССР үтүөлээх артыыһа, ССРС култууратын туйгуна. Аҕа дойду Улуу сэриитин кыттыылааҕа.
Олоҕун олуктара
Чурапчы улууһун Бахсы нэһилиэгэр 1916 сыллаахха от ыйын 30 күнүгэр төрөөбүтэ. Ийэтэ үс саастааҕар өлбүт, аҕата Семён Фёдорович уонна эдьиийэ Христина Фёдоровна Слепцовтар улаатыннарбыттар.
1936 сыллаахха Саха национальнай тыйаатырын икки сыллаах устуудьуйатын үөрэҕин бүтэрбитэ уонна саҥа тэриллибит Майатааҕы 1-кы Судаарыстыбаннай холкуос тыйаатырыгар артыыһынан анаммыта.
1941 сыллаахха Аҕа дойду сэриитигэр ыҥырыллыбыта. Читаҕа байыаннай үөрэххэ сылдьан сэриигэ барар эшелоннары арыаллыыра. Онтон байыаннай-политическай училищены бүтэрэн, младшай лейтенант званиялаах политрук буолбута. Венаны, Брнону, Будапеһы, Праганы босхолооһуҥҥа кыттыбыта. Онтон Японияны кытта сэриигэ кыттыбыта. 1946 сыллаахха дойдутугар төннүбүтэ.
Сэрии кэнниттэн П. А. Ойуунускай аатынан Саха государственнай муусука-дыраама тыйаатырын артыыһынан ылыллыбыта. 1953 сыллаахха А. Островскай аатынан Ленинградтааҕы тыйаатыр ускуустубатын институтугар салайааччылар үрдүкү куурустарын бүтэрбитэ. 1958 сыллаахха Үөһээ Бүлүүтээҕи Судаарыстыбаннай көһө сылдьар тыйаатырын дириэктэринэн анаммыта, онно 1963 сылга диэри үлэлээбитэ.
1963—1971 сыллаахха П. А. Ойуунускай аатынан Саха судаарыстыбаннай дыраама тыйаатырын артыыһа буолбута. Ол кэннэ бочуоттаах сынньалаҥҥа тахсыбыта.
1993 сыллаахха ыам ыйын 19 күнүгэр өлбүтэ[1].
Айар үлэтэ
Барыта 100 тахса оруолу оонньообута, олортон сүрүннэрэ:
- Мэхээс — С. Ефремов «Ини-бии»
- Миша — «Ини-бии» (Майатааҕы театр)
- Бүөтүр — «Ситим быстыытыгар»
- Күн Чөмчүүк — «Айаал»
- Кэтириис — «Хардыылар»
- Татарин — М. Горькай «Түгэххэ»
- Бобчинскай — Н. Гоголь «Ревизор»
- Эриэн Бэргэһэ — И. Гоголев «Наара Суох»
Наҕараадалара уонна ытык ааттара
- Саха АССР үтүөлээх артыыһа;
- ССРС култууратын туйгуна;
- Аҕа дойду сэриитин II ист. уордьана;
- Мэтээллэр: «Будапешты ылыы иһин», «Венаны ылыы иһин», «Праганы босхолооһун иһин», «Германияны кыайыы иһин»;
- ССРС култууратын министиэристибэтин, Саха АССР культуратын министиэристибэтин Бочуоттаах Грамоталара[1].
Дьиэ кэргэнэ уонна аймахтара
- Өбүгэтэ — Намылдьыйа Бүөтүр;
- Аймахтара:
- Слепцов Николай Дмитриевич — Туобулаахап — драматург, Саха АССР култууратын үтүөлээх үлэһитэ;
- Слепцов Марк Дмитриевич — РСФСР норуодунай артыыһа;
- Спартак Иванович Слепцов — сэбиэскэй уонна арассыыйатааҕы тыйаатыр режиссера, артыыс; Саха АССР үтүөлээх артыыһа (1977), «Норуоттар доҕордоһуулара» уордьан кавалера.
- Кэргэнэ — Татьяна Ивановна Сергучева (1936 сыллаахха ыал буолбуттар);
- Кыыстара — Альбина Андриановна Слепцова-Борисова, Саха Өрөспүүбүлүкэтин култууратын үтүөлээх үлэһитэ, бэчээтин туйгуна, Арассыыйа Суруйааччыларын уонна Суруналыыстарын сойуустарын чилиэнэ[1].