Нуучча тылынанАнал бырайыактар
Тылы уларыт
УРУБИИКИ ТУҺУНАН

Петров Степан Дмитриевич

Степан Дмитриевич Петров (1945 сыл ыам ыйын 18 күнэ, Хаҕын нэһилиэгэ, Саха АССР) — Арассыыйа тыйаатыр уонна киинэ артыыһа, Саха Өрөспүүбүлүкэтин үтүөлээх артыыһа, Л. Я. Гермогенова аатынан Күөрдэмнээҕи норуот тыйаатырын артыыһа.

Олоҕун олуктара

1945 сыллаахха Орто Бүлүү оройуонун (билигин Бүлүү улууһа) Хаҕын нэһилиэгэр төрөөбүтэ. Төрөөбүтүн туһунан туоһу сурукка ыам ыйын 18 күнэ диэн суруллубут, ол эрээри ийэтэ от ыйыгар төрөөбүтэ диэн кэпсиир эбит.

Орто оскуола 8 кылааһын бүтэрбитэ. Ньурбатааҕы СПТУ-га тыраахтарыыс-массыньыыс идэтигэр (биир сыл) үөрэммитэ. 1964 сыллаахха Сэбиэскэй аармыйа кэккэтигэр ыҥырыллан, Владивосток куоракка үс аҥаар сыл устата сулууспалаабыта.

Аармыйаттан кэлэн баран Бүлүүгэ култуура тэрилтэтигэр (Ааҕар балаҕаҥҥа) үлэлээбитэ.

«Мастаах» сопхуоска тыраахтарыыс-массыньыыһынан үлэлээбитэ. 1979 сыллаахха суоппар кууруһун ааспыта. 1974 сыллаахха Хаҥалас улууһун Иккис Дьөппөн нэһилиэгин Күөрдэм сэлиэнньэтигэр көспүтэ уонна салгыы сопхуоска үлэлээбитэ[1].

Айар үлэтэ

Оҕо эрдэҕиттэн оскуола кэнсиэртэригэр кыттара: хоһоон, чабырҕах ааҕара, ырыа ыллыыра. 1985 сыллаахха Лидия Гермогенова Күөрдэмҥэ тэрийбит дыраама куруһуогун иһинэн сыанаҕа оонньоон саҕалаабыта. Кэлин бу куруһуок Л. Я. Гермогенова аатынан Күөрдэмнээҕи норуот тыйаатыра буолбута, онно кини 50-тан тахса сыл оонньуур.

Норуот тыйаатырын репертуарыгар 20-чэ оруоллаах, үксэ иккис былааннаах. 1986 сыллаахха Иван Гоголев «Иннэ үүтүнэн» сатирическай кэмиэдьийэтигэр сүрүн оруолу толорбута. Тыйаатыр испэктээктэрэ Хаҥалас улууһунан уонна өрөспүүбүлүкэ атын улуустарынан гастроллаабыттара, күрэхтэргэ кыттыбыттара. Тыйаатыры өрөспүүбүлүкэ норуодунай артыыһа Спартак Федотов куратордаабыта.

Киинэҕэ карьерата 2013 сыллаахха Прокопий Ноговицын «Буор Кут» диэн кылгас кээмэйдээх киинэтигэр быстах оруолу толорбутуттан саҕаламмыта[1].

Фильмографията

  • «Буор Кут» (2013) — Чолбон;
  • «Тойон кыыл» (2018, реж. Эдуард Новиков) — Микиппэр;
  • «Мин үрдүбэр күн хаһан да киирбэт» (2019, реж. Любовь Борисова) — Байбал;
  • «Дьиикэй челлендж» (2022, реж. Михаил Лукачевский) — быстах оруол;
  • «Кэрэни көрбүт» (2022, реж. Любовь Борисова) — чороон ууһа;
  • «Лоокуут уонна Ньургуһун» (2023, реж. Константин Тимофеев) — кэрийэ сылдьар оҕонньор («Сир түннүгэ»);
  • «Спид Стар» (2024, реж. Алексей Амбросьев) — көнньүүһүнэ үлэһитэ;
  • «На краю света» (2026, реж. Эдуард Новиков) — тоҥус бииһин ууһун баһылыга;
  • «Тойон Баай көмүһэ: геолог күннүгэ» (2026, реж. Владимир Аммосов) — геолог Борис Альбертович[1][2].

«Тойон кыыл» киинэ Москватааҕы норуоттар икки ардыларынааҕы киинэ бэстибээлин Гран-притын ылбыта. «Мин үрдүбэр күн хаһан да киирбэт» киинэ Москватааҕы норуоттар икки ардыларынааҕы киинэ бэстибээлигэр көрөөччүлэр биһирэбиллэрин бирииһин уонна «Азия бастыҥ киинэтэ» номинацияны ылбыта[1].

Наҕараадалара уонна ытык ааттара

  • Саха Өрөспүүбүлүкэтин үтүөлээх артыыһа (2018 сыл бэс ыйын 22 күнэ)[3];
  • Саха Өрөспүүбүлүкэтин култууратын туйгуна;
  • Хаҥалас улууһун Күөрдөм нэһилиэгин Ытык олохтооҕо;
  • Өрөспүүбүлүкэ уонна улуус тыйаатырдарын көрүү-бэстибээллэрин түмүгүнэн «Эр киһи бастыҥ оруола» уонна «Тыйаатырга бэриниилээҕин иһин» номинациялар;
  • Элбэх ахсааннаах махтал суруктар уонна бочуотунай кырааматалар, үбүлүөйдээх уонна өйдөбүнньүк мэтээллэр[1].

Дьиэ кэргэнэ уонна тус олоҕо

  • Ойоҕо — Пелагея Захаровна (1979 сылтан);
  • Үс оҕоломмуттар, ол эрэн икки улахаттара эрдэ өлбүттэр[1][4].

Быһаарыылар

  1. ↑ 1 2 3 4 5 6 «Пусть на старости лет хоть раз снимусь…»: Степан Петров о ролях, популярности и жизни (рус.). YSIA.RU. Сигэнии күнэ: 24 Бэс ыйын 2026.
  2. ↑ Актёр Степан Петров: «Посмотреть фильм полностью удалось только в Москве» (рус.). YSIA.RU. Сигэнии күнэ: 24 Бэс ыйын 2026.
  3. ↑ Петров Степан Дмитриевич (рус.). Кино-Театр.Ру. Сигэнии күнэ: 24 Бэс ыйын 2026.
  4. ↑ История деревенского старика, покоряющего международные кинофестивали (рус.). ВКонтакте. Сигэнии күнэ: 24 Бэс ыйын 2026.

Эбии бу тиэмэҕэ

Категориялар