Нуучча тылынанАнал бырайыактар
Тылы уларыт
УРУБИИКИ ТУҺУНАН

Михеев Михаил Алексеевич

Михеев Михаил Алексеевич (1935 сыл алтынньы 13 күнэ, Урмандеево[d], Аксубаевский район[d], Татарская Автономная Советская Социалистическая Республика[d], РСФСР, ССРС — 2006 сыл балаҕан ыйын 11 күнэ, Нүөрүҥгүрү, Саха сирэ) — Саха сирин промышленнай эбийиэктэрин тутуутугар кыттыбыт РСФСР үтүөлээх тутааччыта, Социалистыы Үлэ Дьоруойа[1].

Олоҕун олуктара

1935 сыллаахха Татарстааҥҥа Урмандеево сэл. төрөөбүт. Омугунан чуваш.

Аксубай ситэтэ суох орто оскуолатыгар үөрэммит.

Үлэтин «Уралдоммаш» трескэ тааһы уотунан уһаарааччынан (каменщик-огнеупорщик) саҕалаабыт, онтон металлургия собуотугар операторынан, Находка судоремонтнай собуотугар слесарь-монтажнигынан үлэлээбит.

1970-с сыллартан Саха сиригэр үлэлээбит. Бастаан Чернышевскай бөһүөлэккэ Бүлүүтээҕи ГЭС тутуутугар Тутуу-монтажтааһын салалтатыгар монтажниктар биригэдьиирдэринэн үлэлээбит.

Онтон Мирнэйгэ алмааһы хостуур тэрилтэлэргэ уот линияларын (ЛЭП) тардыытыгар таһаарыылаахтык үлэлээбит. Бу иһин Ленин уордьанынан наҕараадаламмыт.

Дойдутугар Татарстааҥҥа төннөн, Набережные Челныга Камскэнергострой холбоһукка монтажниктар биригэдьиирдэринэн үлэлээбит, онно кини биригээдэтэ литейнэй собуоту хара маҥнайгытыттан тутан үлэҕэ киллэрбит.

Бу кэннэ улахан таһымнаах массыыналары оҥорон таһаарар Камскайдааҕы собуот кэлимин тутуутугар үлэлээбит, бу иһин иккис Ленин уордьанынан наҕараадаламмыт.

1977 сылтан «Якутуглестрой» комбинат «Углеестрой-1» комбинатын 13 №-дээх тутуу управлениетын комплекснай биригээдэтин биригэдьииринэн үлэлээбит, онно кини биригээдэтэ сабыс-саҥаттан Нерюнгри куоракка чох хостуур фабриканы туппут.

ССРС Үрдүкү Сүбэтин Президиумун 1984 сыл бэс ыйын 29 күнүнээҕи Ыйааҕынан Михеев Михаил Алексеевичка Социалистыы Үлэ Дьоруойун аата иҥэриллибит, Ленин уордьана уонна «Сиэрпэ уонна Балта» кыһыл сулус туттарыллыбыт.

1989 сыллаахха ССРС Үрдүкү Сүбэтин депутатынан талылла сылдьыбыт.

Нерюнгри куоракка олорбут. Балаҕан ыйын 11 күнүгэр 2006 сыллаахха өлбүт[2].

Наҕараадалара уонна ытык ааттара

  • Икки «Килбиэннээх үлэтин иһин» мэтээл (04.10.1966, 10.04.1970);
  • Өктөөп Революциятын уордьана (29.03.1974);
  • Үс Ленин уордьана (12.03.1971, 15.04.1977, 29.06.1984);
  • Социалистыы үлэ Дьоруойа (29.06.1984);
  • «Сиэрпэ уонна Балта» кыһыл көмүс мэтээл (29.06.1984);
  • «Владимир Ильич Ленин төрөөбүтэ 100 сылын бэлиэтигэр» мэтээл;
  • Татар АССР үтүөлээх үлэһитэ;
  • РСФСР үтүөлээх тутааччыта;
  • Нерюнгри улууһун Ытык киһитэ (1985)[3][2].

Аатын үйэтитии

  • 2020 сыллаахха Нерюнгри 18 №-дээх орто оскуолатыгар Михаил Алексеевич Михеев аата иҥэриллибит[4];
  • 2022 сыллаахха Михаил Алексеевич Михеев аатынан «Алмазы Анабара» ААО (ПАО «АЛРОСА») «Лэһэгэр Үрэх» диэн сиртэн 2021 сыллаахха хостооммут 98,73 карат ыйааһыннаах алмаас ааттаммыт[5].

Быһаарыылар

  1. ↑ Герои Социалистического Труда | Официальный информационный портал Республики Саха (Якутия). Сигэнии күнэ: 25 Олунньу 2026. Архивировано 1 Алтынньы 2015 года.
  2. ↑ 1 2 Михеев Михаил Алексеевич. warheroes.ru. Сигэнии күнэ: 25 Олунньу 2026.
  3. ↑ Интернет-сайт муниципального образования «Нерюнгринский район» - Михеев Михаил Алексеевич. Сигэнии күнэ: 15 Сэтинньи 2014. Архивировано 3 Сэтинньи 2017 года.
  4. ↑ МБОУ "Средняя общеобразовательная школа №18" МР "Нерюнгринский район" РС(Я) (рус.). Сигэнии күнэ: 4 Олунньу 2026.
  5. ↑ Герой Социалистического Труда М.А. Михеев, алмаз - Московский геммологический центр (рус.). mgc-labs.ru. Сигэнии күнэ: 25 Олунньу 2026.

Сигэлэр

Категориялар