Нуучча тылынанАнал бырайыактар
Тылы уларыт
УРУБИИКИ ТУҺУНАН

Местников Сергей Васильевич

Местников Сергей Васильевич (1981 сыл от ыйын 22 күнэ, Бороҕон нэһилиэгэ, Саха АССР) — Арассыыйа судаарыстыбаннай диэйэтэлэ, Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы. Култуура, духуобунай сайдыы, физическэй култуура уонна спорт боппуруостарын, ону тэҥэ тыл уонна национальнай политика боппуруостарын хонтуруоллуур[1].

Олоҕун олуктара

1981 сыллаахха от ыйын 22 күнүгэр Уус-Алдан улууһун Бороҕон сэлиэнньэтигэр учуутал дьиэ кэргэнигэр төрөөбүт[1].

1987—1998 сылларга Уус-Алдан улууһун Кэптэни сэлиэнньэтигэр Лөгөй орто оскуолатыгар үөрэммит[2].

Ахсыс кылаастан саха суруйааччыларын айымньыларын ааҕыынан үлүһүйбүт. Ордук Николай Якутскай «Төлкө» арамаанын сэргээбит уонна ол кэннэ устуоруйанан интириэһиргээбит[3].

2003 сыллаахха М. К. Аммосов аатынан Саха судаарыстыбыннай университетын (билиҥҥитэ М. К. Аммосов аатынан ХИФУ) «Юриспруденция» хайысхатынан бүтэрбит[1].

Бэйэтэ бэлиэтээбитинэн, үөрэнэр сылларыгар, идэтигэр бигэ тирэхтэнэригэр судаарыстыба уонна быраап теориятын үөрэппит СГУ юриспруденцияҕа факультетын төрүттээччитэ, профессор Михаил Михайлович Федоров улаханнык дьайбыт[4].

Үлэтэ

2003—2010 сылларга СӨ баай-дуол сыһыаннаһыыларын Министиэристибэтигэр үлэлээбит:

  • 2003—2006 сс. — нормативнай-правовой хааччыйыы салаатын сүрүннүүр үлэһитэ; СӨ баайга-дуолга сыһыаннаһыыларга уонна хамсаабат баайы-дуолу арендалааһыҥҥа Департаменын сир учаастактарын приватизацияҕа салаатын сүрүннүүр үлэһитэ;
  • 2006—2008 сс. — сир сыһыаннаһыыларыгар уонна хамсаабат баайы-дуолу арендалааһыҥҥа Департамент сири судаарыстыбыннай бас билиигэ араарар салаа салайааччыта; СӨ баай-дуол сыһыаннаһыыларыгар Министиэристибэтин сир сыһыаннаһыыларыгар Департаменын салайааччытын солбуйааччы;
  • 2008—2010 сс. — СӨ баайга-дуолга сыһыаннаһыыларыгар Министиэристибэтин баай-дуол Департаменын АПК, ОДьКХ, СМИ уонна социальнай эйгэҕэ салаатын салайааччыта.

2010—2012 сылларга Саха Өрөспүүбүлүкэтин Бэрэсидьиэнин уонна Саха Өрөспүүбүлүкэтин Бырабыыталыстыбатын Дьаһалтатын салайааччытын солбуйааччынан, онтон сэкирэтээрдэрин салайааччытынан үлэлээбит.

2012—2016 сс. — Саха Өрөспүүбүлүкэтин баайга-дуолга уонна сир сыһыаннаһыыларыгар миниистирин бастакы солбуйааччыта.

2016—2020 сс. — «Саха Өрөспүүбүлүкэтин кэлэр көлүөнэлэрин тус сыаллаах пуондата» кэммиэрсийэтэ суох тэрилтэ генеральнай дириэктэрэ[1].

Саха Өрөспүүбүлүкэтин Бырабыыталыстыбатыгар

Саха Өрөспүүбүлүкэтин Баһылыгын 2020 сыл муус устар 30 күнүнээҕи 1159 №-дээх Ыйааҕынан Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччытын эбээһинэһин толорооччунан анаммыт.

Саха Өрөспүүбүлүкэтин Баһылыгын 2020 сыл сэтинньи 10 күнүнээҕи 1507 №-дээх Ыйааҕынан Бырабыыталыстыба Бэрэссэдээтэлин солбуйааччы дуоһунаһыгар бигэргэммит.

Саха Өрөспүүбүлүкэтин Баһылыгын 2023 сыл алтынньы 4 күнүнээҕи 45 №-дээх Ыйааҕынан Бырабыыталыстыба Бэрэссэдээтэлин солбуйааччы дуоһунаһыгар хос анаммыт[1].

Эппиэттиир эйгэтигэр духуобунай уонна физическэй сайдыы блоктара киирэллэр, ол иһигэр:

  • култуура уонна духуобунай сайдыы;
  • физическэй култуура уонна спорт;
  • үөрэхтээһин, билим уонна каадырдары идэлээн бэлэмнээһин;
  • тыл политикатын, төрөөбүт тыллары харыстааһын уонна сайыннарыы;
  • национальнай политика, конфессия икки ардыларынааҕы сыһыан, Арассыыйа казачествотын сайыннарыы;
  • норуоттар икки ардыларынааҕы уонна регионнар икки ардыларынааҕы бииргэ үлэлээһин.

Култуура уонна духуобунай сайдыы Министиэристибэтин, физическэй култуура уонна спорт Министиэристибэтин, ону тэҥэ судаарыстыбаннай тутуу уонна дьиэ-уот кэтээн көрүүтүн Дьаһалтатын үлэтин хонтуруоллуур[1].

Тыл политикатын уонна култууратын эйгэтигэр үлэ

Саха сиригэр төрөөбүт тыллары харыстааһыҥҥа уонна сайыннарыыга судаарыстыбыннай бырагырааманы хонтуруоллуур. 2022 сыллаахха Өрөспүүбүлүкэ Баһылыга Айсен Николаев сорудаҕынан бырагыраама үбүлээһинэ 100 мөл.солк. диэри үрдээбит. Бырагыраама чэрчитинэн 55 араас бырайыак олоххо киирэр, ол иһигэр интернет-ситимҥэ контены оҥоруу[1].

Үлэтин биир хайысхатынан оҕолорго аналлаах сахалыы тыллаах анимацияны сайыннарыы буолбут. Ол чэрчитинэн 2024 сыллаахха сахалыы саҥалаах «Тооку» оҕо телеканала үлэҕэ киирбит[5].

Үлэ атын хайысхалара

Устуоруйа өйдөбүлүн харыстааһыҥҥа туһуламмыт тэрээһиннэргэ кыттар.

2022 сыллаахха Дьокуускай 2 №-дээх оскуолатыгар судаарыстыбыннас уруогар Өрөспүүбүлүкэ үөскээһинин устуоруйатын, судаарыстыбыннас төрүттээччилэрин Максим Аммосов уонна Платон Ойуунускай тустарынан үрдүкү кылаас оҕолоругар кэпсээбит[3].

2025 сыл балаҕан ыйыгар саха литературатын төрүттээччи Алексей Кулаковскай — Өксөкүлээх Өлөксөй өйдөбүнньүгүн, Таатта улууһугар профессор М. М. Федоровка өйдөбүнньүк мэҥэ таас арыйыыларыгар кыттыбыт[4].

Агропромышленнай комплекс сайдыытын боппуруостарынан дьарыктанар. 2025 сыл сэтинньитигэр 2024 сыллаахха култуура 16 эбийиэгэ (култуура дьиэлэрэ, бибилэтиэкэлэр, түмэллэр) тутуллубутун, оттон тыа хаһаайыстыбатын өйөөһүҥҥэ 2024 сыллаахха 15 млрд солк. көрүллүбүтүн бэлиэтээбит[6].

Тыл политикатын эйгэтигэр регионнар икки ардыларынааҕы бииргэ үлэлээһини көхтөөхтүк сайыннарар. 2025 сыл сэтинньитигэр Судаарыстыбыннай Сүбэ бэрэссэдээтэлин солбуйааччы Марат Ахметов салайааччылаах Татарстаан Өрөспүүбүлүкэтин дэлэгээссийэтин кытта төрөөбүт тыллары харыстааһын уонна сайыннарыы боппуруостарын дьүүллэһэн көрсүһүүлэри ыыппыт[7].

Наҕараадалара уонна ааттара

  • Саха Өрөспүүбүлүкэтин 3 кылаастаах дьиҥнээх судаарыстыбыннай сүбэһитэ;
  • «Уус-Алдан улууһун социальнай-экономическай сайдыытыгар кылаатын иһин» түөскэ кэтиллэр бэлиэлээх[1].

Тус олоҕо

Аҕата Василий Семенович Местников — математика учуутала.

Айылҕаны кэрэхсиир, бултуурун, балыктыырын сөбүлүүр. Норуоттар култуураларын уонна ускуустубаларын умсугуйан үөрэтэр[2].

Кэргэннээх, үс оҕолоох[8].

Быһаарыылар

  1. ↑ 1 2 3 4 5 6 7 8 Глава Якутии внес в парламент кандидатуру Сергея Местникова на должность  зампреда Правительства Якутии (рус.). SakhaGov. Сигэнии күнэ: 10 Кулун тутар 2026.
  2. ↑ 1 2 Сергей Местников (рус.). VK. Сигэнии күнэ: 10 Кулун тутар 2026.
  3. ↑ 1 2 Сергей Местников: чем больше читаешь, тем лучше понимаешь окружающий мир (рус.). Якутия24 (1 Ыам ыйын 2022). Сигэнии күнэ: 10 Кулун тутар 2026.
  4. ↑ 1 2 Михаил Федоров төрөөбүтэ 105 сылыгар Мэҥэ таас турда (рус.). Улус Медиа. Сигэнии күнэ: 10 Кулун тутар 2026.
  5. ↑ В Якутске открылся первый республиканский фестиваль анимации (рус.). ТАСС (14 Алтынньы 2023). Сигэнии күнэ: 10 Кулун тутар 2026.
  6. ↑ Заместитель председателя правительства Якутии Сергей Местников ознакомился с работой АГАТУ (рус.). АГАТУ. Сигэнии күнэ: 10 Кулун тутар 2026.
  7. ↑ Сергей Местников встретился с делегацией Республики Татарстан | Якутия24(биллибэт). yk24.ru. Сигэнии күнэ: 10 Кулун тутар 2026.
  8. ↑ Местников Сергей Васильевич - официальные декларации. Правительство республики Саха (Якутия) (рус.). rosdek.org. Сигэнии күнэ: 10 Кулун тутар 2026.

Категориялар