Нуучча тылынанАнал бырайыактар
Тылы уларыт
УРУБИИКИ ТУҺУНАН

Матчитов Николай Николаевич

Матчитов Николай Николаевич(1955 сыл олунньу 8 күнэ, Өлөчөй — 2001 сыл кулун тутар 11 күнэ) — сүүрүүк, сууккаҕа сүүрүүгэ Арассыыйа хас да төгүллээх призера, чэпчэки атлетикаҕа аан дойдутааҕы кылаастаах спорт маастара, Арассыыйа сууккаҕа сүүрүүгэ талыллыбыт хамаандатын чилиэнэ, хайыһарынан сырсыыга ССРС успуордун маастарыгар хандьыдаат.

Биография

1955 сыллаахха Мэҥэ-Хаҥалас улууһугар Өлөчөй нэһилиэгэр элбэх оҕолоох дьиэ кэргэҥҥэ төрөөбүт. Алтан аҕыс саастаах оскуолатыгар үөрэммит, ол сылларга хайыһарынан сырсыынан, чэпчэки атлетиканан, көҥүл тустуунан дьарыктаммыт. Ахсыс кылааһы бүтэрэн, Нам орто профессиональнай-техническэй үөрэх кыһатыгар киирэн, көҥүл тустууга физкультура учууталыгар М. В. Алексеевка, хайыһарынан сырсыыга Саха ЯАССР үтүөлээх тренеригэр Павел Павлович Харитоновка дьарыктаммыт.

  • 1972—1975 сылларга — көҥүл тустууга, хайыһарга, сүүрүүгэ, «ГТО» көрүҥнэригэр училище, Нам улууһун хас да төгүллээх призера, чөмпүйүөнэ;
  • 1975 сылга — аччыгый марафоҥҥа Саха АССР норуоттарын Спартакиадатын боруонса призера буолбут;
  • 1976 сыллаахха Петропавловск-Камчатскайга буолбут Уһук Илин үрдүнэн хайыһарынан сырсыы күрэхтэһиитигэр 15 км-гэ юниордар истэригэр үһүс миэстэ буолбут;
  • 1976—1978 сылларга Сэбиэскэй Армия кэккэтигэр сулууспалаабыт. Забайкальскай байыаннай уокурук чемпионатыгар чэпчэки атлетикаҕа IV миэстэ буолбут;
  • 1979 сыллаахха Пермь куоракка буолбут «Трудовые резервы» успуорт түмсүүтүн хайыһарынан сырсыы күрэхтэһиитигэр 15 км-гэ эр дьоҥҥо үһүс миэстэ буолбут;
  • 1980 сыллаахха өрөспүүбүлүкэ чемпионатыгар 30 км сүүрүүгэ чемпион аатын сүүйбүт;
  • 1980-с сылларга өрөспүүбүлүкэ чемпионнаттарыгар марафону сүүрүүгэ хаста даҕаны кыттыбыт, хайыһарга өрөспүүбүлүкэ чемпиона уонна хас да төгүллээх призера буолбут.

Сууккаҕа сүүрүүнэн бэйэтэ, тренерэ суох, дьарыктаммыт. Ол түмүгэр:

  • 1998 сыллаахха — манежка аан дойдутааҕы сүүрүүгэ 4 миэстэ (Подольскай), Арассыыйа чемпионатыгар хамаанданан 3 миэстэ уонна тус зачекка 5 миэстэ, Сибиир уонна Уһук Илин (Омскай) чөмпүйүөнэ;
  • 1999 сыллаахха — аан дойдутааҕы күрэхтэһии чемпиона (Подольскай), Арассыыйа Кубогын уонна Европа Кубогын түһүмэҕин үрүҥ көмүс призера (Москва), Арассыыйа чемпионатын үрүҥ көмүс призера (Санкт-Петербург);
  • 2000 сыллаахха — Арассыыйа Кубогын боруонса призера (Санкт-Петербург), хамаанданан үрүҥ көмүс призера, Европа чемпионатыгар тус зачекка 6 миэстэ (Уден, Голландия).

Сууккаҕа сүүрүүгэ бастыҥ көрдөрүүтэ — 258 км 391 м (1999, Москва)[1].

Мэҥэ Хаҥалас улууһун Алтан нэһилиэгин бочуоттаах олохтооҕо (1999).

Олохтон 2001 сыл кулун тутар 11 күнүгэр туораабыт[2][3].

Аатын үйэтитии

  • 2019 сыллаахха муус устар 13 күнүгэр Дьокуускай куорат думатын РЯГД-6-10 ыйааҕынан Новопортовской кыбаартал саҥа уулуссата Матчитов Николай Николаевич аатынан ааттаммыт[4];
  • Өлөчөйгө Николай Матчитов аатынан уһун дистанцияларга сүүрүүгэ күрэхтэһии ыытыллар[5].

Литература

  • Зедгенидзева А. Н. Имена на улицах Якутска : (биобиблиографический справочник) / Тихонова Н. Н.. — Дьокуускай: Бичик, 2022. — 693 с.

Быһаарыылар

  1. ↑ Статистика сверхмарафона «Сутки Бегом»: сводная таблица результатов (мужчины) (рус.). Сигэнии күнэ: 5 Тохсунньу 2026.
  2. ↑ Зедгенидзева, 2022
  3. ↑ Владислав Коротов. Матчитов Николай Николаевич – легкая атлетика (рус.). Сигэнии күнэ: 5 Тохсунньу 2026.
  4. ↑ В Якутске появилась новая улица имени Николая Матчитова (рус.). Сигэнии күнэ: 5 Тохсунньу 2026.
  5. ↑ Памяти супермарафонца (рус.). Сигэнии күнэ: 5 Тохсунньу 2026.

Категориялар