Иванов Алкивиад Исидорович
Алкивиад Исидорович Иванов(1941 сыл ахсынньы 25 күнэ, Күндэйэ, Саха АССР — 2005 сыл муус устар 8 күнэ, Дьокуускай) — сэбиэскэй уонна Арассыыйа спортсмена,көҥүл тустууга ССРС успуордун маастара, учуонай, хирург, мэдиссиинэ билимин дуоктара[1].
Олоҕун олуктара
1941 сыллаахха ахсынньы 25 күнүгэр Сунтаар улууһун Күндэйэ нэһилиэгэр төрөөбүтэ.
1959—1962 сылларга Кривой Рогтааҕы гражданскай авиация училищетыгар авиатехник идэтигэр үөрэммитэ.
1962—1965 сылларга Дьокуускай аэропордугар үлэлээбитэ. Бу кэмҥэ «Динамо» уопсастыба сүүмэрдэммит хамаандатыгар эрчиллэн, бүтүн Сойуустааҕы күрэхтэһиилэргэ кыттыбыта[2].
1965 сыллаахха Саха судаарыстыбаннай университетын (билигин Хотугулуу-Илиҥҥи федеральнай университет) мэдиссиинэ факультетыгар үөрэнэ киирбит.
Успуорка ситиһиилэрэ
- «Динамо» ДСО Киин сэбиэттэрин чемпиона (1962);
- РСФСР норуоттарын III Спартакиадатын боруонса призера (1963, Горькай);
- РСФСР чемпиона (1964, Дьокуускай).
ССРС успуордун маастарын нуорматын толорбута[1].
Медиссиинэ факультетыгар үөрэнэр сылларыгар Саха АССР үтүөлээх тренеригэр Николай Сафоновка, РСФСР уонна Саха АССР үтүөлээх тренеригэр Николай Волковка эрчиллэн үгүс ситиһиилэрдэмит[1]:
- 1966, 1969 уонна 1970 сылларга — Саха АССР чемпиона;
- РСФСР норуоттарын IV Спартакиадатын чемпиона (1967, Ленинград);
- РСФСР үрдүк үөрэх кыһаларын V Спартакиадатын кыайыылааҕа (1966, Махачкала)[1].
Университеты бүтэриэҕиттэн успуортан тэйбит.
Мэдиссиинэҕэ ситиһиилэрэ
1971—1975 сылларга Дьокуускай куорат клиническэй балыыһатын хирургия салаатыгар үлэлээбит.
1975—1978 сылларга Москубатааҕы Ленин уордьаннаах судаарыстыбаннай мэдиссиинэ институтун (билигин — Сеченов аатынан университет) аспирана буолбут.
1979 сыллаахха мэдиссиинэ билимин хандьыдаатыгар диссертациятын көмүскээбит. 1993 сыллаахха кини көҕүлээһининэн Саха судаарыстыбыннай университет Медицинскэй институтун госпитальнай хирургиятын кафедрата тэриллибит, онно кини сэбиэдиссэйинэн үлэлээбит.
1996 сыллаахха «Хронический толстокишечный стаз, основенный аномалиями развития и фиксации прямой и ободочной кишок» диэн тиэмэҕэ мэдиссиинэ билимин дуоктарыгар диссертациятын көмүскээбит. 1997 сылтан профессор.
1999—2001 сылларга — Саха Өрөспүүбүлүкэтин Мэдиссиинэ национальнай киинин хирургия клиникатын дириэктэринэн үлэлээбит.
1990 сыл ыам ыйыгар Саха Өрөспүүбүлүкэтин доруобуйа Харыстабылын Министиэристибэтин кылаабынай хируурунан анаммыт.
2001 сыл кулун тутарыгар Саха Өрөспүүбүлүкэтин Бэрэсидьиэнин ыйааҕынан Арассыыйатааҕы мэдиссиинэ Билимин Академиятын уонна Саха Өрөспүүбүлүкэтин Бырабыыталыстыбатын иһинэн саҥа тэриллибит Саха сиринээҕи билим киинин дириэктэринэн анаммыт.
Наҕараадалара уонна ытык ааттара
- Арассыыйа естественнэй наукаларын Академиятын чилиэн-кэрэспэдьиэнэ;
- Саха Өрөспүүбүлүкэтин үтүөлээх бырааһа;
- Саха Өрөспүүбүлүкэтин доруобуйа харыстабылын туйгуна;
- Саха Өрөспүүбүлүкэтин физическэй култууратын уонна успуордун туйгуна;
- Өрөспүүбүлүкэ XX үйэтин успуордун Лауреата;
- Сунтаар улууһун Ытык олохтооҕо[3].
Аатын үйэтитии
- Алкивиад Исидорович Иванов аатынан Сунтаар улууһун Сунтаар нэһилиэгэр 2006 сыллаахха аһыллыбыт олимпийскай резервэ Өрөспүүбүлүкэтээҕи оҕо-ыччат успуордун оскуолата ааттаммыт[3];
- Сунтаар улууһуттан төрүттээх түөрт чемпион — Алкивиад Иванов, Альберт Захаров, Александр Иванов уонна Николай Яковлев ааттарынан икки сылга биирдэ көҥүл тустууга Өрөспүүбүлүкэтээҕи турнир ыытыллар;
- Хотугулуу-Илиҥҥи федеральнай университекка үс бастакы маастар-профессордарын — Николай Алексеев, Николай Гоголев уонна Алкивиад Иванов бириистэригэр көҥүл тустууга ХИФУ аһаҕас турнира ыытыллар[4];
- Алкивиад Исидорович Иванов аата Хотугулуу-Илиҥҥи федеральнай университет Медицинскэй институтун госпитальнай хирургия кафедратыгар иҥэриллибит (15.06.2006);
- 2009 сылтан мэдиссиинэ билимин салаатыгар эдэр учуонайдарга А. И. Иванов аатынан сыл аайы грант бэриллэр[3].