Нуучча тылынанАнал бырайыактар
Тылы уларыт
УРУБИИКИ ТУҺУНАН

Быканов Прокопий Иннокентьевич

Быканов Прокопий Иннокентьевич (1938 сыл алтынньы 27 күнэ, Бүлүү улууһа, Саха АССР — 2014 сыл тохсунньу 4 күнэ, Дьокуускай) — сэбиэскэй горянк, бульдозерист, Социалистическай Үлэ Дьоруойа. ССРС норуодунай дьокутаата.

Олоҕун олуктара

Прокопий Быканов 1938 сыллаахха алтынньы 27 күнүгэр Халбаакы нэһилиэгэр төрөөбүт. Сэттэ кылаастаах орто оскуоланы бүтэрбитэ.

Оскуола кэнниттэн колхуоска үлэлээбитэ. 1959 сылтан 1961 сылга диэри ССРС Сэбилэниилээх Күүстэригэр сулууспалаабыта. 1962 сыллаахха Дьокуускайдааҕы тыа хаһаайыстыбатын механизациялыыр оскуолатын (билигин — Дьокуускайдааҕы индустриальнай-педагогическай колледж) бүтэрэн, «киэҥ профиллаах тракторист-машинист» идэтин ылбыта.

Үөһээ Халыма оройуонугар үлэлээбитэ. 1967 сыллаахха Усуйаана оройуонугар көһөн тиийэн, «Силиэннээх» совхозка үлэҕэ киирбитэ. 1974 сыллаахха «Депутатскай» приискэ бульдозериһынан үлэҕэ киирбитэ, сотору кэминэн «Центральнай» карьер бульдозеристарын биригэдьиирэ буолбута.

Биригээдэ техника биир кэмигэр үрдүк таһаарыылаахтык үлэлиири ситиспитэ, ирбэт тоҥ усулуобуйатыгар саҥа техниканы уонна албастары баһылаабыта уонна олоххо киллэрбитэ[1].

ССРС Үрдүкү Сэбиэтин Президиумун 1985 сыл тохсунньу 15 күнүнээҕи ыйааҕынан, көрдөрбүт үрдүк ситиһиилэрин, Саха сирин кыһыл көмүһү хостуур промышленноһын сайдыытыгар улахан үтүөлэрин уонна үлэҕэ дьоруойдуу быһыытын иһин Быканов Прокопий Иннокентьевичка Социалистическай Үлэ Дьоруойун аата иҥэриллибитэ.

Депутатскайдааҕы хайа-байытар комбинакка 23 сыл тухары үлэлээбитэ, онтон биэнсийэҕэ тахсыбыта.

ССРС норуодунай дьокутаатынан, ССРС өҥнөөх металлургиятын профсоюһун Киин Комитетын чилиэнинэн талыллан үлэлээбитэ, уопсастыбаннай олоххо көхтөөхтүк кыттара. Дьокуускайга олорбута.

Быканов 2014 сыллаахха тохсунньу 4 күнүгэр Дьокуускайга өлбүтэ[2].

Наҕараадалара уонна ытык ааттара

  • Социалистическай Үлэ Дьоруойа (1985 сыл тохсунньу 15 күнэ);
  • Ленин уордьана;
  • ССРС МЦМ бочуоттаах горняга;
  • «Бочуот Знага» уордьан;
  • Бүлүү улууһун ытык олохтооҕо[3];
  • Усуйаана улууһун ытык олохтооҕо[4]
  • Норуоттар доҕордоһууларын уордьана;
  • Усуйаана улууһун Ытык олохтооҕо[5].

Аатын үйэтитии

  • П. И. Быканов аатын Бүлүү улууһун Халбаакы орто уопсай үөрэхтээһин оскуолата сүгэр. Сыл аайы оскуолаҕа Быканов ааҕыылара ыытыллаллар, бастыҥ үөрэнээччилэргэ истипиэндийэ туттарыллар.
  • Дьокуускайдааҕы индустриальнай-педагогическай колледжка (урукку СПТУ-1, онно Быканов үөрэммитэ) бастыҥ үөрэнээччилэргэ сылын аайы Социалистическай Үлэ Дьоруойа Прокопий Быканов аатынан диплом туттараллар.
  • 2013 сыллаахха Бүлүүгэ Геройдар Аллеяларыгар П. И. Быкановка тыыннааҕар бүүс туруоруллубута.
  • 2023 сыл балаҕан ыйын 22 күнүгэр, Быканов төрөөбүтэ 85 сылыгар, Тоһуу нэһилиэгэр стела арыллыбыта.
  • АК АЛРОСА Саха сиригэр «Удачная» туруупкаттан хостоммут 68,06 караттаах ювелирнай алмааска Социалистическай Үлэ Геройа Прокопий Иннокентьевич Быканов аатын иҥэрбитэ[6].

Быһаарыылар

  1. ↑ Славим Героя труда — Быканова Прокопия Иннокентьевича(биллибэт). Якутский индустриально-педагогический колледж. Сигэнии күнэ: 8 Тохсунньу 2014. Архивировано 8 Тохсунньу 2014 года.
  2. ↑ Ушёл из жизни почётный гражданин Усть-Янского района Якутии Прокопий Быканов(биллибэт). Информационное агентство «SakhaNews». Сигэнии күнэ: 8 Тохсунньу 2014. Архивировано 7 Тохсунньу 2014 года.
  3. ↑ Почётные граждане Вилюйского улуса(биллибэт). Сайт Правительства Республики Саха. Сигэнии күнэ: 14 Кулун тутар 2014. Архивировано 9 Муус устар 2014 года.
  4. ↑ Почётные граждане Усть-Янского улуса(биллибэт). Сайт Правительства Республики Саха. Сигэнии күнэ: 8 Тохсунньу 2014. Архивировано 14 Ахсынньы 2013 года.
  5. ↑ Официальный информационный портал Республики Саха (Якутия): Усть-Янский улус: Почетные граждане
  6. ↑ 27 октября – 85 лет со дня рождения БЫКАНОВА ПРОКОПИЯ ИННОКЕНТЬЕВИЧА – советского горняка, бульдозериста, Героя Социалистического Труда — МКУ "Усть-Янская МЦБС"(биллибэт). dptbibl.ru. Сигэнии күнэ: 30 От ыйын 2026.

Сигэлэр

Категориялар