Борисов Георгий Иванович
Борисов Георгий Иванович (1918 сыл кулун тутар 4 күнэ, Арҕаа Хаҥалас улууһа, Саха уобалаһа — 2000 сыл ахсынньы 31 күнэ, Дьокуускай) — саха прозаига, тылбаасчыт. Саха Өрөспүүбүлүкэтин култууратын үтүөлээх үлэһитэ. 1995 сылтан Арассыыйа Суруйааччыларын сойууһун чилиэнэ.
Олоҕун олуктара
Георгий Борисов 1918 сыллаахха кулун тутар 4 күнүгэр Хаҥалас улууһун Иккис Малдьаҕар нэһилиэгэр төрөөбүтэ. 1938 сыллаахха Саха учительскай институт ньуучча тылын уонна литературатын салаатын бүтэрбитэ. Үөрэтээччинэн уонна кинигэ кыһатыгар тылбаасчытынан үлэлээбитэ.
1940 сыл атырдьах ыйыгар А. Н. Островскай аатынан Ленинградтааҕы театральнай институт режиссерскай салаатыгар бастакы курска үөрэххэ киирэр. Ол гынан баран 1941 сыл ыам ыйыгар албын дьыалҕа түбэһэн хаайыыга киирэр. 15 сыл устата лааҕырдарга уонна сыылкаҕа сылдьар. 1956 с. реабилитацияламмытын кэннэ Саха музыка-дыраама тыйаатырыгар уонна Норуот айымньытын дьиэтигэр үлэлиир.
1962 сылтан 1975 сылга диэри «Эдэр коммунист» хаһыакка сурналыыстыыр.
Хоһоонньут быһыытынан саҕалаабыта. Бастакы хоһооннорун 1939 сыллаахха бэчээттээбитэ. Г. Борисов олоҕун сүрүн айымньыта — биографическай трилогия: «Хараҥаттан сырдыкка», «Хатыылаах боробулуохаҕа хаайтаран» уонна «Сыылка сындааhыннаах сыллара».
Г. Борисов саха тылыгар араас драматургтар сүүрбэттэн тахса айымньыларын уонна ньуучча суруйааччыларын уонча айымньыларын тылбаастаабыта.
2000 сыл ахсынньы 31 күнүгэр өлбүтэ[1].
Наҕараадалара
- СӨ култууратын үтүөлээх үлэһитэ;
- Хаҥалас улууһун ытык олохтооҕо.
Кинигэлэрэ
- Хараҥаттан сырдыкка. — Роман. 1-кы кинигэ. — Дьокуускай, 1992.
- Хатыылаах боробулуохаҕа хаайтаран. — Роман. 2-с кинигэ. — Дьокуускай, 1993.
- Сыылка сындааhыннаах сыллара. — Роман. 3-с кинигэ. — Дьокуускай, 1994.