Спиридонов Леонид Николаевич
Леонид Николаевич Спиридонов (1980 сыл ахсынньы 16 күнэ, Күөрдэм, Саха АССР) — Арассыыйа бэлиитичэскэй деятелэ, көҥүл тустууга норуоттар ардыларынааҕы кылаастаах спорт маастара. XXVIII Сайыҥҥы Олимпия оонньууларын (Атина 2004) уонна ХХIХ Олимпия оонньууларын (Пекин 2008) кыттыылааҕа. 2022 сыл олунньу 3 күнүттэн Саха Өрөспүүбүлүкэтин физическэй култуура уонна успуорт миниистирэ.
Биография
Леонид Спиридонов 1980 сыл ахсынньы 16 күнүгэр Саха АССР Орджонидзевскай оройуонугар Күөрдөм сэлиэнньэтигэр төрөөбүтэ. Дьиэ кэргэн үс оҕолооҕо: Евгений, Алёна уонна кыра Леонид; кэлин кыралара Пётр төрөөбүтэ. Аҕа уолаттарын кыра эрдэхтэриттэн көҥүл тустууга уһуйбута[1].
Леонид Спиридонов Өрөспүүбүлүкэтээҕи физико-математическай оскуолатыгар (билигин Өрөспүүбүлүкэтээҕи лицей-интернат) үөрэммитэ. Оскуола кэннэ СГУ-ҕа хайа факультетыгар үөрэнэ киирбитэ.
Тустууга дьарыктанара; бастакы тренерэ — Олег Лебедев, онтон Будимир Яковлевка дьарыктаммыта[2][3].
1999 сыллаахха юниордар ыккардыларыгар чемпионакка үрүҥ көмүс мэтээли ылбыта. 2000 сыллаахха студеннар ортолоругар аан дойду чөмпүйүөнэ буолбута. 2002 сыллаахха Арассыыйа Кубогын кыайыылааҕа.
2003 сылтан Казахстан аатыттан күрэстэһэрэ. 2004 сыллаахха Афинаҕа ыытыллыбыт Олимпийскай оонньууларга 4 миэстэ буолбута. 2006 сыллаахха Азия чөмпүйүөнэ буолбута. 2008 сыллаахха Пекиҥҥэ ыытыллыбыт Олимпийскай оонньууларга кыттыбыта эрээри, 5-с эрэ буолбута. 2009 сыллаахха Аан дойду чөмпүйэнээтигэр боруонса мэтээли ылбыта. Азия оонньууларыгар 2010 сыллаахха боруонса призера буолбута.
«Үрдүк успуорт маастарыстыба оскуолатыгар» СӨ судаарыстыбаннай бүддьүөт тэрилтэтигэр көҥүл тустууга спортсмен-инструктор дуоһунаһыгар 2010 сылтан 2012 сылга диэри үлэлээбитэ, 2013 сыллаахха тренер-педагог дуоһунаһыгар киирбитэ[4].
2013 сылтан 2017 сылга диэри «Р. М. Дмитриев аатынан олимпийскай резервэ өрөспүүбүлүкэтээҕи орто анал училищета» СӨ судаарыстыбаннай бүддьүөт тэрилтэтин дириэктэрин бастакы солбуйааччы дуоһунаһыгар үлэлээбитэ[4].
2017—2018 сылларга «Үрдүк успуор маастарыстыба оскуолата» диэн Саха Өрөспүүбүлүкэтин судаарыстыбаннай бүддьүөт тэрилтэтин дириэктэрин солбуйааччыта.
2019—2021 сылларга «Талыллыбыт хамаандалары успуор бэлэмнээһин өрөспүүбүлүкэтээҕи киинэ» диэн Саха Өрөспүүбүлүкэтин судаарыстыбаннай бүддьүөт тэрилтэтин дириэктэрэ[4].
Бэлиитикэҕэ үлэтэ
2018—2019 сылларга Мэҥэ-Хаҥалас улууһун баһылыгын солбуйааччыта[4].
2021 сылтан 2022 сылга диэри — Саха Өрөспүүбүлүкэтин физическэй култуураҕа уонна успуорка миниистирин бастакы солбуйааччыта. 2022 сыл олунньу 3 күнүгэр Саха Өрөспүүбүлүкэтин баһылыга Айсен Николаев Леонид Спиридоновы Саха Өрөспүүбүлүкэтин физическэй култуураҕа уонна успуорка миниистиринэн анаабыта[5][4].
Дьиэ кэргэнэ
Аҕата — электригынан үлэлээбитэ, онтон өрүс уҥуор баар хампаанньа «Якутскэнерго» филиалын салайааччыта этэ. Үлэтин түмүктээн баран, биэнсийэҕэ тахсыбыта[1].
Ийэтэ — уһуйааҥҥа иитээччинэн үлэлээбит. Биэнсийэҕэ тахсыбыта[1].
Эдьиийэ — Алёна, үөрэҕинэн учуутал[1].
Убайа — Евгений, электрик этэ. Саахалга өлбүтэ[1].
Инитэ — Пётр, урбаанньыт[1].
Наҕараадалара
- Көҥүл тустууга норуоттар ыккардыларынааҕы кылаастаах успуор маастара.
- Арассыыйа Федерациятын успуор маастара.
- Саха Өрөспүүбүлүкэтин физичэскэй култууратын уонна успуордун үтүөлээх үлэһитэ.
- Хаҥалас улууһун ытык олохтооҕо.
- Г. В. Ксенофонтов аатынан Хаҥалас улууһун бириэмийэтин лауреата.
Быһаарыылар
Литэрэтиирэ
- Саха халандаара, 2009, Диодорова-Лаврентьева С. В. — Дь.: Бичик, 2008.
Сигэлэр
- Леонид Спиридонов — олимпийская статистика на сайте Sports-Reference.com(ааҥл.)
- Леонид Спиридонов. профиль на сайте International Wrestling Database(биллибэт). Сигэнии күнэ: 7 От ыйын 2025. Архивировано из оригинала 10 Ыам ыйын 2024 года.
- Спиридонов Леонид Николаевич. Хангаласская ЦБС. Сигэнии күнэ: 6 От ыйын 2025. Архивировано из оригинала 4 Кулун тутар 2016 года.
- Хаҥалас хатана Леонид Спиридонов. https://sportyakutia.ru. Сигэнии күнэ: 7 От ыйын 2025. Архивировано из оригинала 23 Кулун тутар 2025 года.
Эбии бу тиэмэҕэ
 |
|---|
