Неустроев Алексей Михайлович
Алексей Михайлович Неустроев (төр. 1987 от ыйын 29 күнэ, Танда, Саха АССР) — ефрейтор, Илиҥҥи байыаннай уокурук 5-с гвардейскай бүттүүн сэбилэниилээх аармыйатын 127-с мотострелковай дивизиятын 218-с тааҥка полкатын 2-с танковай ротатын танковай взводун оператор-наводчига. Анал байыаннай эпэрээссийэ кыттыылааҕа, «Алёша» тааҥка экипажын чилиэнэ. Арассыыйа Федерациятын Дьоруойа.
Биография
1987 сыл от ыйын 29 күнүгэр Саха Сиригэр Тандаҕа элбэх оҕолоох дьиэ кэргэҥҥэ (биэс оҕоттон улаханнара) төрөөбүтэ. Ийэтэ интэринээккэ учууталлаабыта, аҕата тракторист этэ[1].
2004 сыллаахха Алексей оскуоланы бүтэрэн, тута аармыйаҕа барбыта. Уһук Илиҥҥи байыаннай уокурук танковай чаастарыгар Т-62 тааҥка суоппарынан икки сыл сулууспалаабыта[2].
2006 сыллаахха запаска уурайан кэннэ, Нам улууһун Граф Биэрэгэр СПТУ-га үөрэнэ киирбитэ. Механик идэтигэр үөрэммитэ, онтон бэйэтэ туспа сварщик идэтин баһылаабыта. Дьокуускайга тутууга рабочайынан үлэлээбитэ, онтон 10-ча сыл доҕоро тэрийбит мотоцикл оҥорор тэрилтэтигэр сварщигынан үлэлээбитэ[3].
2021 сыллаахха Неустроев аҕата инсультаабыт; улахан уола кинини көрөрө, ону таһынан дьиэ кэргэн олорор дьиэтин саҥардыбыта[3].
2022 сыл күһүнүгэр, быстах мобилизация кэмигэр, Арассыыйа Федерациятын сэбилэниилээх күүстэригэр ыҥырыллыбыта; Кутузов уордьаннаах 127-с мотострелковай дивизия танковай полкатыгар Т-80 тааҥка оператор-наводчигынан ыҥырыллыбыта[4].
2024 сыллаахха Алексей Неустроев Арассыыйа Федерациятын Бырабыытылыстыбатын Үп университетын экэниэмикэ уонна бизнес факультетыгар үөрэнэ киирбитэ[5].
АБДь-ҕа кыттыы
2023 сыл ыам ыйыгар Запорожье хайысхатыгар өстөөх контрнаступлениета Времевскай чорбоҕор саҕаламмыта. Алексей Неустроев киирэр тааҥка экипажыгар Новодаровкаҕа чугаһынааҕы сири ыраастыыр сорудах бэриллибитэ[6]. Салгыы түгэннэр «Алёша» таанка кыргыһыыта диэн ааттаммыттара. Экипаж барыта Эр буолуу Уордьаныгар туруоруллубута, ол гынан баран дойду барыта кыргыһыы видеотын көрөн баран, бириэмийэҕэ анаан оҥоһуллубут түһэриини атынынан солбуйар туһугар төннөрбүттэрэ.
Арассыыйа Президенын 2023 сыл атырдьах ыйын 8 күнүнээҕи ыйааҕынан, байыаннай эбээһинэһи толорууга көрдөрбүт хорсун быһыытын иһин, ефрейтор Алексей Неустроевка РФ Дьоруойун аата иҥэриллибитэ. 2024 сыл атырдьах ыйын 23 күнүгэр Курскай куоракка Курскай кыргыһыытын 80 сылыгар аналлаах кэнсиэргэ В. В. Путин экипажы «Кыһыл көмүс Сулус» мэтээллэринэн наҕараадалаабыта[7]. Алексей Неустроев Тандаттан төрдүс, Уус-Алдан улууһугар тохсус Дьоруой буолбута. Сарсыныгар тааҥка экипажа Арассыыйа бэрэсидьиэнин кытта Кириэмилгэ көрүспүттэрэ[8].
2023 сыл атырдьах ыйын 6 күнүгэр Донецкай Норуодунай Өрөспүүбүлүкэ баһылыгын эбээһинэһин толорооччу Денис Пушилин «Алёша» тааҥка бары экипажын чилиэннэрин «ДНӨ Дьоруойа» сулустарынан наҕараадалаабыта[9].
2023 сыл балаҕан ыйыгар Алексей Неустроев Саха Сиригэр кэлэригэр Уус-Алдан улууһун нэһилиэктэр баһылыктара үөр сылгы биэрбиттэрэ: 10 кулун уонна биир атыыр[10]. Доҕотторо Дьокуускайга сир учаастагын бэлэхтээбиттэрэ, оттон Уус-Алдан улууһун баһылыга УАЗ массыынаны бэлэхтээбитэ[11]. Саха Өрөспүүбүлүкэтин баһылыга Айсен Николаев Алексей Неустроев ыҥырыытынан дьиэ кэргэнигэр ыалдьыттыы кэлбитэ[12].
2024 сыл олунньу 22 күнүгэр РФ Уопсастыбаннай палаататыгар «Саллаат аҕата» уопсастыбаннай билинии мэтээллэрин туттарыы бастакы сиэрэ-туома ыытыллыбыта. Наҕараадаламмыт 40 киһи ортотугар Алексей аҕата, Михаил Михайлович Неустроев баара[13].
Алексей Неустроев демобилизация кэнниттэн Саха Сириттэн Хотугу АБДь зонатыгар гуманитарнай көмөнү тиэрдиини саҕалыырга быһаарыммыта[8].
2025 сыл бэс ыйыгар Алексей Неустроев уонна «Алёша» таанка экипажын атын чилиэннэрэ (Расим Баксиков, Александр Леваков, Филипп Евсеев) «Миротворец» диэн украинскай ситим-сир базатыгар киллэриллибиттэрэ[14].
Дьиэ кэргэнэ
Алексей Неустроев ийэтэ оскуола-интэринээт иитээччитин көмөлөһөөччүтүнэн үлэлиир. Аҕата II группалаах инбэлиит[15].
Кэргэнэ — Аня Заболоцкая, Саха сирин норуодунай артыыһын Владимир Заболоцкай племянницата[16].