Нуучча тылынанАнал бырайыактар
Тылы уларыт
УРУБИИКИ ТУҺУНАН

Күннэй (ырыаһыт)

Күннэй (дьиҥнээх аата — Ульяна Георгиевна Ли-Фу, төрөөбүт араспаанньата Сергучева) — саха ырыаһыта, композитор, ырыа айааччы, урбаанньыт. Саха Өрөспүүбүлүкэтин култууратын туйгуна. 1986 сыллаахха олунньу 6 күнүгэр[1] Мэҥэ-Хаҥалас улууһун Майа нэһилиэгэр[2] «Чороон» рок-бөлөх музыканнарын — Татьяна уонна Георгий Сергучевтар дьиэ кэргэннэригэр төрөөбүтэ[3].

Оҕо сааһа уонна музыкаҕа бастакы хардыылар

Кыра эрдэҕиттэн төрөппүттэрин репетицияларга, гастролларга арыаллыы айар эйгэҕэ сылдьыбыт. Икки сааһыттан буукубалары билэр буолан эрдэ ааҕарга үөрэммит. Алта сааһыттан хоһооннору ритмҥэ, нотаҕа көһөрөн, музыка айан саҕалаабыт. Сэттэ сааһыгар аан бастаан ырыаһыт быһыытынан сыанаҕа тахсыбыт[3]. 1995 сыллаахха республикатааҕы эдэр композитордар күрэхтэригэр кыайан, бастакы биһирэбилин ылбыт[4]. Музыка оскуолатын уонна Дьокуускай куорат национальнай гимназиятын бүтэрбит. Кэлин Саха государственнай университет Финансовай-экономическай институтугар үрдүк үөрэҕи ылбыт[3].

Айар үлэтэ

Айар үлэтин муҥутуур чыпчаала 2000 сыллардаахха түбэспит. Бу кэмҥэ Күннэй саха биллиилээх поэттарын Күннүк Уурастыырап, Сэмэн Данилов, Наталья Михалева-Сайа уонна Тумус Мэхээлэ хоһоонноругар элбэх ырыа суруйбут. Кини музыкатыгар ырыалары араас кэмнэргэ Ньургуйаана Кычкина, Мария Белоцерковская, Ый кыыһа, Сахая, Игорь Егоров, Анатолий Бурнашев, Лэгэнтэй, Jeada, Далаана, Галя Виноград толорбуттар[5]. Уопсайа 200 тахса ырыаны айбыт[2]. 2010 сыллаахха «Саха сирин култууратын туйгуна» аат иҥэриллибит. 2016 сыллаахха Күннэй Саха эстрадатын тыйаатарын уус-уран салайааччытынан анаммыта[6]. 2025 сыллаахха Күннэй айар үлэтин 30 сылын Өрөспүүбүлүкэтээҕи «Триумф» успуорт киинигэр «Galo 30» үбүлүөйдээх кэнсиэринэн бэлиэтээбитэ[5].

Киинэ

2007 сыллаахха Константин Барашков «Кэскил» комедиятыгар быстах оруолу толорбут[7], оттон 2018 сылга — «Чээкэ» диэн кэргэнэ Виктор Ли-Фу режиссер быһыытынан бастакы киинэтигэр оонньообут[8].

Урбаан уонна покер

2018 сыллаахха Дьокуускайга косметика маҕаһыынын арыйбыт[9]. 2023 сылтан покерга профессионаллар күрэхтэһиилэригэр көхтөөхтүк кыттар. 2023 Владивосток куоракка Russian Poker Cup турнирыгар Ladies Event турнирын кыайбыт. 2024 сыллаахха Дьокуускайга Amber Poker Championship уонна Минскэйгэ Russian Poker Tour турнирдарга бириистээх миэстэлэри ылбыт[10][11].

Тус олоҕо

2009 сыллаахха фотограф уонна режиссер идэлээх Виктор Ли-Фуга кэргэн тахсыбыт[3][12]. Икки оҕолоохтор[3].

Быһаарыылар

  1. ↑ Ульяна Ли-Фу - личная страница (рус.). Сигэнии күнэ: 17 Ахсынньы 2025.
  2. ↑ 1 2 Певица из Якутии – о победе в покерном турнире и перерыве в музыке (рус.). Сигэнии күнэ: 17 Ахсынньы 2025.
  3. ↑ 1 2 3 4 5 nlrs. ru/80428/96839 Интервью с мамой: Татьяна Афанасьевна Сергучева (рус.). Блоги Якутии (26 Алтынньы 2020). Сигэнии күнэ: 16 Ахсынньы 2025.
  4. ↑ Многоликая Кюннэй: новый артист студии ZAVOD (рус.). Sakhaday (30 Сэтинньи 2019). Сигэнии күнэ: 16 Ахсынньы 2025.
  5. ↑ 1 2 Ошеломительный триумф Ули Сергучевой – Куннэй! (рус.). Сигэнии күнэ: 16 Ахсынньы 2025.
  6. ↑ Новая работа Ули Сергучевой (рус.). Сигэнии күнэ: 16 Ахсынньы 2025.
  7. ↑ Кэскил (рус.). Кинопоиск. Сигэнии күнэ: 16 Ахсынньы 2025.
  8. ↑ Как художник-постановщик «Сахафильма " стал Чээкэ (рус.). ЯСИА (30 Алтынньы 2018). Сигэнии күнэ: 16 Ахсынньы 2025.
  9. ↑ Уля Сергучева-Кюннэй, г. Якутск (рус.). Сигэнии күнэ: 16 Ахсынньы 2025.
  10. ↑ Якутская певица Уля Сергучева победила на покерном турнире в Калининграде (рус.). Сигэнии күнэ: 16 Ахсынньы 2025.
  11. ↑ Звезда якутской эстрады за покерным столом (рус.). Сигэнии күнэ: 16 Ахсынньы 2025.
  12. ↑ Самые красивые звездные пары по версии «Светского " (рус.). Сигэнии күнэ: 16 Ахсынньы 2025.

Категориялар