Костас Марсаан

1976 сыл муус устар 5 күнүгэр Горнай улууһун Бэрдьигэстээх сэлиэнньэтигэр төрөөбүтэ. М. К. Аммосов аатынан Хотугулуу-Илин федеральнай университеты бүтэрбитэ, онтон Сценаристар уонна режиссёрдар үрдүкү куурустарыгар үөрэммитэ^[1].

Бастакытын киинэ эйгэтигэр «Сайсары күөлгэ» (2016) диэн детективтии дырааманан киирбитэ, бу үлэтин иһин 2017 сыллаахха «Уот иччитэ» XV норуоттар икки ардыларынааҕы киинэҕэ бастакы холонуу бэстибээлигэр «Бастыҥ режиссёр» аатын ылбыта.

2020 сыллаахха иккис киинэтэ — «Иччи» тахсыбыта. Киинэ сүрэхтэниитэ Лиссабоҥҥа буолбут MOTELX хоррор-бэстибээлгэ 2020 сыл балаҕан ыйын 9 күнүгэр буолбута. 2020 сыл алтынньытыгар бу киинэ Сиджескэ буолбут жанровай киинэ бэстибээлигэр кыттыбыта. Арассыыйаҕа быракаакка 2021 сыл ыам ыйын 27 күнүгэр тахсыбыта, 24 мөл. солк. бюджеттаах буолан баран, сэттэ мөл. солк. тахса суумманы хомуйбута^[2][3][4].

2022 сыллаахха үһүс киинэтэ — «Детектор» мистическэй триллер экраннарга тахсыбыта. Бу Данилов Саха сирин тас өттүгэр уhуллубут бастакы киинэтэ буолбута. «Детектор» режиссера буоларга кинини М. Горькай аатынан киинэ устуудьуйата мэктиэлээбитэ. Кини Арассыыйа устуудьуйатын кытта бииргэ үлэлээбит уопутун маннык диэн сыаналаабыта:

Уопсайынан бу продюсерскай бырайыак этэ, ол эрээри сорох боппуруостарга сөбүлэһиэххэ, бэйэҥ көрүүгүн хаалларыахха син уонна киинэни атмосфератынан уонна форматынан биллэр гына оҥоруохха сөп эбит. Мин сэрэйэрбинэн, продюсер уонна ааптар киинэлэрин үчүгэйдик холбуохха с6п: араас элеменнэрдээх ураты, элбэх араҥалардаах детектив — триллер, хоррор, мистика^[5].

• 2016 — «Сайсары күөлгэ түбэлтэ»: режиссёр, сценарист, монтажёр.
• 2018 — «Кэрэхсэбиллээх олох»: сценарист, артыыс.
• 2020 — «Иччи»: режиссёр, сценарист, монтажёр.
• 2022 — «Детектор»: режиссёр.

«Сайсары күөлгэ» киинэҕэ:

• «Режиссёр бастыҥ үлэтэ», «Уот тыына» XV норуоттар икки ардыларынааҕы киинэҕэ бастакы холонуу бэстибээлэ (2017)^[6].
• Москватааҕы XXXVIII норуоттар икки ардыларынааҕы киинэ бэстибээлин (2016) күрэхтэһии таhынан «Саҥа Арассыыйа киинэтэ» бырагырааматын кыттыылааҕа.
• IV Норуоттар икки ардыларынааҕы Саха киинэтин бэстибээлин «Бастыҥ киинэ» анал аакка Гран-при (2016).
• IV Норуоттар икки ардыларынааҕы Саха киинэ бэстибээлин «Бастыҥ дьахтар оруола» анал аакка Галина Тихонова (2016).
• II-Asian World Film Festival (Лос-Анджелес, АХШ, 2016) күрэхтэһии бырагырааматын кыттыылааҕа.
• «Уот иччитэ» XV норуоттар икки ардыларынааҕы киинэ бэстибээлигэр (2017) Вячеслав Лавернов «Эр киһи бастыҥ оруола» анал аата.
• VIII «Дубль дв@» киинэ онлайн-бэстибээлигэр Вячеслав Лавернов "Эр киhи бастыҥ оруола"анал аата.
• XIX Норуоттар икки ардыларынааҕы детектив киинэлэр бэстибээллэрин дьүүллүүр сүбэтин анал бирииһэ (2017).
• Варшаваҕа буолбут Арассыыйа киинэлэрин «Спутник над Польшей» бэстибээлин күрэхтэһии бырагырааматын кыттыылааҕа (2017).

«Сноб» сурунаал кириитигэ Дмитрий Елагин Константин Данилов хоррор киинэлэрин маннык быһаарбыта: «Марсаан киинэлэрэ Саха Өрөспүүбүлүкэтин култууратын интэриэһиргээбэтэх да көрөөччүгэ өйдөнүмтүө, тоҕо диэтэххэ ааптар Саха сирин тус кыһалҕаларын ырыппат, кини тугунан да уратыта суох, жанровай конструкцияларынан туһанар. Көмүллүбэтэх дьон үөрэ, фантомнай игирэлэр, түүн уһуктар абааhылар — бу сюжетнай хайысхалары бары дойдулар киинэлэригэр көрүөххэ сөп^[7].»