Константинов Роман Иннокентьевич

1896 сыллаахха алтынньы 14 күнүгэр Боотур Уус улууһун Бастакы Болугур нэһилиэгэр (билиҥҥи Амма улууһа) бааһынай дьиэ кэргэнигэр төрөөбүт. Эрдэ тулаайах хаалан, эбэтигэр иитиллибит^[2].

1933—1938 сылларга Константинов аатынан колхозка сылгыһыттаабыт.

1938 сылтан — М. В. Фрунзе аатынан колхоз сылгыһытынан, сылгы ферматын сэбиэдиссэйинэн үлэлээбит. Сылгы иитиитигэр үрдүк көрдөрүүлэри ситиспит: сылгы ахсаанын 168 % улаатыннарбыт, биэ төрөөһүнүн 100% тиэрдибит^[1].

ССРС Үрдүкү Сүбэтин Президиумун 1948 сыл атырдьах ыйын 5 күнүнээҕи Ыйааҕынан Константинов Роман Иннокентьевичка Социалистыы Үлэ Дьоруойун аата иҥэриллибит, Ленин уордьана уонна «Сиэрпэ уонна Балта» кыһыл сулус туттарыллыбыт^[2].

Сахалартан бастакынан бу үтүө аакка тиксибит.

Уопсастыбаннай олоххо көхтөөхтүк кыттар эбит. Саха АССР Үрдүкү Сэбиэтин дьокутаатынан иккитэ талылла сылдьыбыт: 1949 уонна 1958 сыллардаахха. 1954 сыллаахха Норуот хаһаайыстыбатын ситиһиилэрин көрдөрөр быыстапкаҕа (ВДНХ) Өрөспүүбүлүкэ аатытттан кыттыбыт.

Чурапчы улууһун Мындаҕаайытыгар олорбут. 1994 сыллаахха 98 сааһыгар өлбүт^[2].

• Социалистыы Үлэ Дьоруойа (1948);
  • Ленин уордьана (1948);
  • «Сиэрпэ уонна Балта» (1948);
• Ленин уордьана (1949);
• Чурапчы улууһун Ытык киһитэ^[2].

• Р. И. Константинов аата Чурапчы улууһун Амма орто оскуолатыгар иҥэриллибит (2003)^[3];
• 2016 сыллаахха Мындаҕаайыга Р. И. Константиновка бааматынньык туруорбуттар^[4];
• Чурапчы улууһугар Констатинов аатынан бириэмийэ олохтоммут;
• 2021 сыллаахха Чурапчы улууһугар ыытыллыбыт Өрөспүүбүлүкэтээҕи Сылгыһыт күнэ Роман Константинов 125 сыллаах үбүлүөйүгэр анаммыт;
• Ол сыл үбүлүөйдээх тэрээһиннэр чэрчилэринэн Роман Константинов олоҕор, үлэтигэр аналлаах фотоальбом бэчээттэммит, «Дьоруой Арамаан» кинигэтэ саҥаттан бэчээттэнэн тахсыбыт^[5].