Готовцев Юрий Александрович
Юрий Александрович Готовцев (1939 сыл алтынньы 7 күнэ, Өймөкөөн, Саха АССР — 2018 сыл от ыйын 4 күнэ, Дьокуускай) — сэбиэскэй уонна Арассыыйа судаарыстыбаннай диэйэтэлэ, 1981—1989 сылларга Саха АССР эргиэҥҥэ миниистирэ, Саха АССР Үрдүкү Сэбиэтин уонна Саха Өрөспүүбүлүкэтин Судаарыстыбаннай Мунньаҕын (Ил Түмэн) дьокутаата.
Олоҕун олуктара
1939 сыл алтынньы 7 күнүгэр Өймөкөөн улууһун I Бороҕон нэһилиэгин Өймөкөөн сэлиэнньэтигэр төрөөбүтэ[1].
1958 сыллаахха Дьокуускайдааҕы потребкооперация техникумун бүтэрбитэ. Хаҥалас улууһугар тыа кооперациятыгар, онтон Аллараа Халыма улууһугар судаарыстыба эргиэнин тиһигэр үлэлээбитэ.
1966 сыллаахха Г. В. Плеханов аатынан Москватааҕы норуот хаһаайыстыбатын институтун бүтэрбитэ. Салгыы Муома уонна Орто Халыма улуустарын эргиэн тэрилтэлэрин салайбыта[1].
1970-с сылларга Саха АССР Миниистирдэрин Сэбиэтин хааччыйыы уонна батарыы дьаһалтатыгар үлэлээбитэ. 1978 сыллаахха Дьокуускай куорат бырамыысыланнаска аналлаах эргиэн салаатын салайааччытынан анаммыт.
1981—1989 сылларга Саха АССР эргиэҥҥэ миниистирин дуоһунаһыгар сылдьыбыт. 1989 сылтан ССРС уонна РСФСР тас экэнэмиичэскэй сибээстэргэ министиэристибэлэрин Саха сиринээҕи бэрэстэбиитэлинэн буолбут.
1992 сылтан Саха Өрөспүүбүлүкэтин нэһилиэнньэни үлэнэн хааччыйыыга уонна социальнай көмүскэлгэ уорганнарыгар, кэлин Биэнсийэ сулууспатын департаменыгар үлэлээбит[1].
Саха АССР Үрдүкү Сэбиэтин X—XII ыҥырыыларын уонна Саха Өрөспүүбүлүкэтин Судаарыстыбаннай Мунньаҕын (Ил Түмэн) II уонна III ыҥырыыларын дьокутаатынан талыллыбыта. Үлэҕэ уонна социальнай бэлиитикэҕэ парламеннар хамыыһыйаларын салайан үлэлэппитэ[1].
2018 сыл от ыйын 4 күнүгэр Дьокуускайга өлбүтэ[1].
Наҕараадалара уонна ытык ааттара
- РСФСР эргиэнин үтүөлээх үлэһитэ;
- Саха Өрөспүүбүлүкэтин норуотун хаһаайыстыбатын үтүөлээх үлэһитэ;
- Саха Өрөспүүбүлүкэтин «Гражданскай килбиэн» бэлиэтэ;
- Өймөкөөн, Муома уонна Орто Халыма улуустарын Ытык олохтооҕо[1].
Аатын үйэтитии
- 2019 сыллаахха Дьокуускайга Киров уулуссатын 15 №-дээх дьиэтигэр Ю. А. Готовцевка мэҥэ бэлиэ туруорбуттара;
- Ити сыл кини аатын Дьокуускайдааҕы сервис технологическай техникумугар иҥэрбиттэрэ[1].