Васильев Степан Иннокентьевич

1925 сыллаахха Үөһээ Бүлүү улууһун Туобуйа нэһилиэгэр төрөөбүт.

1942 сылтан олохтоох «Коммунар» колхуоска биригэдьииринэ үлэлээбит. 1944 сылтан ааҕар балаҕан сэбиэдиссэйинэн үлэлээбит.

1944 сылтан Кыһыл Аармыйаҕа сулууспалаабыт.

Сэрииттэн төннөн, 1945 сылтан Үөһээ Бүлүү улууһун Молотов аатынан колхуоска үүт ферматын сэбиэдиссэйинэн үлэлээбит. 1947 сыллаахха колхуос бэрэссэдээтэлинэн талыллыбыт^[1].

Колхуоһу Үөһээ Бүлүү улууһун тыа хаһаайыстыбатын бастыҥ тэрилтэлэригэр таһаарбыт. 1948 сыллаахха колхуос сүөһү уонна сылгы иитиитигэр былаанын аһара толорбут. Ынах сүөһү ахсаана 1947 сыллаахха 208 эбит буоллаҕына, 1949 сыллаахха 320 төбөҕө диэри улааппыт.

С. И. Васильев колхуоска сылгы иитиитин сайыннарыыга ураты болҕомтотун уурбут. Сылгы ахсаанын элбэтэргэ колхуос хас биирдии убаһалаах биэҕэ анаан-минээн 25 центнер оту, хас биирдии сылгыга 15 центнер оту бэлэмниир эбит, ол түмүгэр сылгы төрөөһүнэ үрдээбит. 1946 сыллаахха колхуос 40 биэттэн 25 убаһаны ылбыт буоллаҕына, 1947 сыллаахха колхоз 60 биэттэн 54 убаһаны төрөтөн улаатыннарбыт. 1947 сыллаахха колхоз 61 биэттэн 61 кулуну төрөппүт^[2].

ССРС Үрдүкү Сэбиэтин Президиумун 1949 сыл бэс ыйын 30 күнүнээҕи ыйааҕынан, 1948 сыллаахха сүөһү иитиитигэр үрдүк көрдөрүүлэрин иһин, Степан Иннокентьевич Васильевка Ленин уордьана уонна «Сиэрпэ уонна балта» кыһыл көмүс мэтээл туттарыылаах Социалистыы Үлэ Дьоруойун аата иҥэриллибит.

1951 сыллаахха колхуостары салайар каадырдары бэлэмниир Дьокуускайдааҕы тыа хаһаайыстыбатын оскуолатын бүтэрбит. Үөһээ Бүлүү райкомун тыа хаһаайыстыбатын отделын сэбиэдиссэйинэн үлэлээбит. 1954 сылтан Үөһээ Бүлүү райсоветын исполкомун бэрэссэдээтэлин солбуйааччытынан, 1958 сылтан баартыйа райкомугар баартыйа үлэһитинэн үлэлээбит^[1].

Саха АССР Бүлүүтээҕи быыбардыыр уокуругуттан ССРС Үрдүкү Сэбиэтин 3-с ыҥырыытын (1950—1954) дьокутаатынан талылла сылдьыбыт^[3].

1960 сыллаахха, 35 эрэ сааһыгар, өлбүт^[1].

• Социалистыы Үлэ Дьоруойа (1949)^[4];
• Ленин уордьана;
• «Сиэрпэ уонна балта» кыһыл көмүс мэтээл^[1].

• Үөһээ Бүлүү улууһун Үөһээ Бүлүү сэлиэнньэтигэр С. И. Васильев аатынан ааттаммыт Герой Васильев уулуссата диэн баар^[5];
• 2022 сыллаахха Саха Өрөспүүбүлүкэтин Бырабыыталыстыбатын уонна АК АЛРОСА «Саха АССР 100 сылыгар анаан 100 ааттаах алмаас» холбоһуктаах бырайыактарын чэрчитинэн, Айхал туруупкаттан хостоммут 51 караттан тахса ыйааһыннаах ювелирнай алмааска Степан Иннокентьевич Васильев аата иҥэриллибит^[6].