Борисов Александр Ильич
Борисов Александр Ильич (1960 сыл атырдьах ыйын 3 күнэ, Өктөм, Саха АССР — 2019 сыл ыам ыйын 8 күнэ, Дьокуускай) — СӨ судаарыстыба уонна түмэт дьайыксыта, П. И. Дудкин аатынан СӨ Судаарыстыбаннай бириэмийэтин лауреата, СӨ сибээһин үтүөлээх үлэһитэ.
Олоҕун олуктара
Александр Борисов Орджоникидзе оройуонун Төхтүр сэлиэнньэтигэр 1960 сыллаахха атырдьах ыйын 3 күнүгэр төрөөбүтэ. Аҕата «Өктөм» сопхуос оробуочайа, ийэтэ Төхтүрдээҕи ФАП биэксэлэ.
1977 сыллаахха Покровскай орто оскуолатын бүтэрэн баран СГУ физфагар үөрэххэ киирбитэ уонна 1982 с. бүтэрбитэ. 1983—1990 сс. САССР производственнай-иехническэй сибээс управлениятыгар (ПТУС) инженеринэн үлэлээбитэ. 1990 сылга Өрөспүүбүлүкэтээҕи радиотелевизионнай передающай киин (РТПЦ) кылаабынай инженерынан анаммыта. Онтон 1992 с. начальник бастакы солбуйааччытынан анаммыта. Кини салалтатынан өрөспүүбүлүкэ тэлэбиидэнньэтин биэриилэрэ спутник нөҥүө тарҕатыллар буолбуттара, бу Арассыыйа регионнарын тэлбиидэнньэлэриттэн бастакыннан олоххо киирбитэ.
1995 с. саҥа тэриллибит «Сахателеком» Дьокуускайдааҕы радиотелевизионнай киинин (РТЦ) дириэктэринэн анаммыта. Биир сылынан СӨ «ТЦТР» ГУП генеральнай дириэктэринэн анаммыта. Бу сылларга саҥа дьиэ тутттаран, саҥа аппаратура туруортаран 2003 с. өрөспүүбүлүкэ тэлибиидэнньэтэ бүтүннүү сыыппара стандарка көспүтэ. 2004 сыллаахха эбии 255 ыстаансыйа олоххо киирэн өрөспүүбүлүкэ тэлэбиидэнньэтэ нэһилиэнньэни хабыыта 99,5 % диэри улааппыта.
2010 сыл бэс ыйыттан 2014 сылга диэри СӨ бырабыыталыстыбатын бэрэстээтэлин солбуйааччыта, сибээс, информация ньыматыгын сайдыытын уонна электрон бырабыыталыстыбаны олоххо киллэрии боппуруостарын быһаарыыны салайара. 2014 с. алтынньытыгар сибээс уонна информация ньыматыгын миниистирининэн анаммыта.
«Охота и рыбалка в Якутии» диэн тэлэбиидэнньэ биэриитин ааптара. Бу биэрии аан дойду кэккэ дойдуларыгар көстөр этэ (СНГ, Балтия, Грузия, Ближнэй Восток, Киин уонна Илин Европа)[1].
Кини көҕүлээһининэн куорат телебашнятыгар архитектурнай-художественнай иллюминация баар буолбута[2].
Дьиэ кэргэнэ
Кэргэнэ — Александра Николаевна. Оҕолоро: Илья уонна Татьяна.
Наҕараадалара
- Саха Өрөспүүбүлүкэтин сибээһин үтүөлээх үлэһитэ;
- П. И. Дудкин аатынан СӨ Судаарыстыбаннай бириэмийэтин лауреата;
- Хаҥалас улууһун ытык олохтооҕо;
- «Арассыыйа Федерациятын сибээс маастара» бэлиэ;
- «Саха сирэ Арассыыйаны кытта 370 сылыгар» бэлиэ;
- РФ Бырабыытылыстыбатын бэрэссэдээтэлин махтала (2000).
Аатын үйэтитии
- 2020 сыл ыам ыйын 7 күнүгэр Дьокуускай куоракка Александр Борисовка анаммыт өйдөбүнньүк дуоска туруоруллубута[3].