Борисова Альбина Андриановна
Альбина Андриановна Борисова (төр. 1952 сыл бэс ыйын 12 күнэ, Дьокуускай) — идэтийбит уус-уран тылбаасчыт. 1999 сылтан Арассыыйа Суруйааччыларын сойууһун чилиэнэ.
Олоҕун олуктара
Альбина Борисова Дьокуускай куоракка бэс ыйын 12 күнүгэр 1952 сыллаахха артыыс Андриан Слепцов дьиэ кэргэнигэр төрөөбүтэ[1].
1969 сылга орто оскуоланы бүтэрэн баран П. А. Ойуунускай аатынан Саха драматын тыйаатырыгар синхроннай тылбаас дикторынан үлэлээбитэ. Оскуолаҕа үөрэнэр сылларыттан нууччалыы тылынан хоһооннору суруйара, Пионердар Дыбарыастарыгар литературнай-творческай куруһуокка дьарыктанара, кини хоһоонноро оҕолорго аналлаах өрөспүүбүлүкэ хаһыатыгар бэчээттэнэллэрэ. Тыйаатырга үлэлиир кэмигэр үгүс саха суруйааччыларын пьесаларын нууччалыы тылбаастаабыта.
1979 сылга Альбина Борисова А .М. Горькай аатынан Литературнай институт уус-уран тылбаас салаатын ситиһиилээхтик бүтэрбитэ. Институту бүтэрэн баран 8 сыл устата кини ВТО саха салаатын эппиэттээх сэкиритээринэн үлэлээбитэ, тыйаатыр репертуарын барытын кэриэтэ спектакллар синхроннай тылбаастарыгар анаан сахалыыттан нуучча тылыгар тылбаастаабыта. Онон нуучча тыллаах көрөөччүлэр бу аатырбыт коллектив айар үлэтин кытта билсэр кыахтаммыттара.
1995 сылтан «Бичик» национальнай кинигэ кыһатыгар бастаан кылаабынай эрэдээктэринэн, онтон дириэктэри солбуйааччынан үлэлээбитэ.
Кэлин Ил Түмэҥҥэ старшай референта этэ.
А. Борисова саха классик суруйааччыларын үлэлэрин — Өксөкүлээх Өлөксөй «Былыргы саха алгыһын» уонна Былатыан Ойуунускай «Улуу Кудаҥсатын» — нууччалыы тылбаастаабыта[2]
2021 сылга «Услышь, Россия, наши голоса» уус-уран тылбаас бүтүн Арассыыйатааҕы куонкуруһугар «Перевод прозы» номинацияҕа Василий Васильев «Таптал түөрт муннуга» диэн айымньытын тылбаастаабытын иһин бастакы миэстэни ылбыта[3].
Наҕараадалара
- Саха Өрөспүүбүлүкэтин култууратын үтүөлээх үлэһитэ;
- Саха Өрөспүүбүлүкэтин бэчээтин туйгуна.