Нуучча тылынанПартнёрдар бырайыактараАнал бырайыактар
Тас көрүҥүн уларытТылы уларытИһитиннэрии
УРУБИИКИ ТУҺУНАН

Андреев Юрий Степанович

УРУБИИКИ иһигэр маннык араспаанньалаах дьон туһунан ыстатыйалар бааллар, көр Андреев.

Юрий Степанович Андреев (1952 ыам ыйын 5, Маалыкай, Саха АССР) — сэбиэскэй спортсмен, көҥүл тустууга ССРС уонна РСФСР успуордун маастара, Саха АССР үтүөлээх тириэньэрэ, Саха Өрөспүүбүлүкэтин физическэй култуураҕа уонна успуорка үтүөлээх үлэһитэ.

Олоҕун олуктара

1952 сыл ыам ыйын 5 күнэ Ньурба улууһун Бордоҥ нэһилиэгин Марха өрүс хочотугар сытар Улахан Күөл учаастагар холкуостаах кэргэҥҥэ төрөөбүтэ.

Маалыкай орто оскуолатыгар үөрэммитэ. 1968—1971 сылларга Чурапчыга Д. П. Коркин аатынан тустуу оскуолатыгар үөрэммитэ[1].

1975 сыллаахха Москватааҕы физкултуура институтун кыһыл дипломунан бүтэрбитэ[1].

1975 сылтан оройуон оскуолаларыгар физкултуура учууталынан уонна тириэньэринэн үлэлээбитэ. Саха судаарыстыбаннай университет физическэй үөрэхтээһин кафедратыгар ассистенынан, онтон старшай преподавателинэн үлэлээбитэ.

1989 сылтан Ньурбаҕа успуорт үрдүкү маастырыстыба өрөспүүбүлүкэтээҕи оскуолатын Ньурбатааҕы филиалын старшай тириэньэр-үөрэтээччитинэн үлэлээбитэ. 1994 сылтан Ньурба улууһун администрациятын успуорка уонна туризмҥа салаатын салайааччытынан үлэлээбитэ.

Ньурба улууһун физическэй култуураҕа уонна успуорка салаатын сэбиэдиссэйинэн, айылҕа харыстабылын улуустааҕы кэмитиэтин начаалынньыгынан үлэлээбитэ[1].

Успуорка ситиһиилэрэ

Көҥүл тустууга Саха АССР 14 төгүллээх чөмпүйүөнэ, РСФСР боруонса призера[1].

Хуреш тустууга Уһук Илин уонна Сибиир зонатын икки төгүллээх муҥутуур кыайыылааҕа[1].

1994 сыллаахха Италия Рим куоратыгар бэтэрээннэр ортолоругар аан дойду чөмпүйүөнэ буолбута[1].

Хапсаҕайга Баһылай Манчаары бирииһигэр XII (1990), XIII (1993) уонна XIV (1995) спартакиадаларга муҥутуур кыайыылаах буолбута[1].

«Өбүгэлэр оонньуулара» I, II уонна III бэстибээллэрин, Манчаары XV Спартакиадатын бэтэрээннэр ортолорун кыайыылааҕа буолбута[1].

Наҕараадалара уонна ытык ааттара

  • «Арассыыйа Федерациятыгар физкултуураны уонна успуорду сайыннарыыга үтүөлэрин иһин» бочуоттаах бэлиэ[1];
  • Саха Өрөспүүбүлүкэтин физическэй култуураҕа уонна успуорка үтүөлээх үлэһитэ[1];
  • Саха Өрөспүүбүлүкэтин үтүөлээх тириэньэрэ[1];
  • Ньурба улууһун Ытык олохтооҕо (2002);
  • Ньурба куоратын Ытык олохтооҕо;
  • Бордоҥ нэһилиэгин Ытык олохтооҕо[2].

Билинии

  • 2012 сыллаахха Ньурбаҕа Олоҥхо Ыһыаҕын чэрчитинэн Юрий Степанович Андреев бирииһигэр хапсаҕайга күрэхтэһии ыытыллыбыт[3];
  • 2023 сыллаахха Т. Д. Сидорова уонна А. М. Уларова суруйбут «Ньурба ньургуна, чулуу бөҕөс Юрий Андреев» диэн Ю. С. Андреев биографията тахсыбыта[2];
  • 2026 сыллаахха Дьокуускай куоракка «Модун» успуорт национальнай көрүҥнэрин киинигэр Юрий Степанович Андреев бирииһигэр хапсаҕайга өрөспүүбүлүкэтээҕи турнир ыытыллыбыт[4].

Дьиэ кэргэнэ

  • Кэргэнэ — Анна Михайловна Уларова.
  • Уола — Аслан Юрьевич.

Быһаарыылар

  1. ↑ 1 2 3 4 5 6 7 8 9 10 11 Андреев Юрий Степанович — вольная борьба, хапсагай (рус.). Саха спорт: энциклопедия Коротова. Сигэнии күнэ: 8 Балаҕан ыйын 2026.
  2. ↑ 1 2 “Ньурба ньургуна, чулуу бөҕөс Юрий Андреев” — МКУ "Нюрбинская МЦБС"(биллибэт). lib.nrbr.ru. Сигэнии күнэ: 9 Балаҕан ыйын 2026.
  3. ↑ Нюрба в ожидании республиканского «Ысыаха Олонхо-2012», Sakhapress.ru. Сигэнии күнэ: 9 Балаҕан ыйын 2026.
  4. ↑ Юрий Андреев бирииһигэр хапсаҕайга турнир ыытылынна. Спорт Якутии. Сигэнии күнэ: 8 Балаҕан ыйын 2026.

Категориялар