Андреев Ефрем Николаевич

Ефрем Андреев 1909 сыллаахха Үөһээ Бүлүү улууһун 2-с Үөдүгэй нэһилиэгэр төрөөбүт. Аҕата Николай Андреев 1918 с. өлбүт. Ийэтэ Агафия Гаврильевна Андреева 1941 с. өлбүт. Үс уолтан биирдэстэрэ, бииргэ төрөөбүттэрэ Терентий уонна Тарас холкуостаахтар. 1922 с. нэһилиэк оскуолатыгар киирбит, интэринээккэ олорбут.

1927 сыллаахха сэттэ кылааһы бүтэрэн баран Дьокуускайдааҕы медтехникумҥа киирбит, 1931 сылга туйгуннук бүтэрбит^[1]. Хомсомуол путевкатынан Иркутскайдааҕы мединститукка киирбит, 1937 с. бүтэрбит. Үөрэҕин бүтэрэн баран икки сыл институукка хомсомуол кэмитиэтин салайбыт (ординатураҕа сылдьан). Иркутскай горсоветын дьокутаатынан талылла сылдьыбыт.

1939 сыллаахха ЯФАШ дириэктэринэн анаммыт. 1940 с. Совнарком быһаарыытынан Москубаҕа Киин Сэллик институтугар аспирантураҕа киирбит. Онно сылдьан сэлликтээн 1941 с. уурайбыт, 5 ый эмтэммит. Онтон Дьокуускайга «Красная Якутия» диэн сэллик санаторийыгар кылаабынай бырааһынан 1943 сыллаахха диэри үлэлээбит. 1944 с. Доруобуйа харыстабылын наркомун солбуйааччытынан, онтон биир сылынан ССКП обкуомун доруобуйа харыстабылын отделын сэбиэдиссэйинэн анаммыт, 1948 с. диэри үлэлээбит, онтон дьаһал отделын сэбиэдиссэйин солбуйааччытынан 1950 сыллаахха диэри үлэлээбит.

1950 сыллаахтан ССРС Мэдиссиинэҕэ акадьыамыйатын Сэллик институтун Саха сиринээҕи филиалын дириэктэрэ.

Фтизиатрия институутун Саха сиринээҕи филиалын төрүттэниэҕиттэн дириэктэрдээбитэ, сэллик ыарыы олохтоох уратыларын үөрэтэр үлэни салайбыта уонна бэйэтэ чинчийбитэ.

1954 с. «Сэллик уонна Саха АССР-га сэллиги утары охсуһуу» диэн мэдиссиинэ билимин хандьыдаатыгар диссэртээссийэтин көмүскээбит.

Саха АССР Үрдүкү Сэбиэтин 2 ыҥырыытын дьокутаата (1955–1959 сс., 1959–1963 сс.). ССКП XXII съеһин дэлэгээтэ.

• Көһө сылдьар нэһилиэнньэ сэлликтэн харыстаныыта / Е. Н. Андреев, М. Ф. Щепетов; И. И. Артамонов тылбааһа. – Якутскай: Саха сиринээҕи кинигэ изд-вота, 1958. – 18 с^[1].

Кэргэнэ — Попова Екатерина Ильинична, Сунтаар аҕабыытын кыыһа, учуутал. 1955 с. суруйбут автобиографиятыгар үс оҕолоохпун диэбит: Люция (устудьуон), Владимир уонна Зинаида (оскуола үөрэнээччилэрэ).

Ефрем Андреев хаста да наҕараадаламмыта^[1]:

• ССРС доруобуйатын харыстабылын туйгуна;
• РСФСР уонна Саха АССР үтүөлээх бырааһа;
• «Кыһыл Сулус» уордьан;
• «Үлэ Кыһыл Знамята» уордьан;
• «Аҕа дойду Улуу сэриитигэр килбиэннээх үлэ иһин» мэтээл;
• «Үлэ килбиэнин иһин» мэтээл.

• Дьокуускай куоракка Ефрем Андреевка мемориальнай дуоска туруоруллубута^[1].