Пётр Тимофеевич Макаров
Макаров Пётр Тимофеевич (1981 сыл атырдьах ыйын 12 күнэ, Улахан-Аан, Саха АССР) — Арассыыйа киинэ уонна тыйаатыр артыыһа, Былатыан Ойуунускай аатынан Саха академическай тыйаатыр дириэктэрэ (2020 сылтан).
Олоҕун олуктара
1981 сыллаахха атырдьах ыйын 12 күнүгэр Орджоникидзе оройуонун (билигин — Хаҥалас улууһа) Улахан-Аан нэһилиэгэр төрөөбүт.
2002 сыллаахха М. С. Щепкин аатынан театральнай училищены бүтэрбит уонна Былатыан Ойуунускай аатынан Саха тыйаатырыгар артыыһынан үлэтин саҕалаабыт[1].
Тыйаатырга бастакы улахан үлэтинэн «Сааскы кэм» (Амма Аччыгыйынан) туруорууга Эрдэлиир Миитэрэй оруола буолбут[2].
Ол сылтан Саха тыйаатырын Профсойууһун бэрэссэдээтэлинэн үстэ талыыллан үлэлээбит.
Тыйаатыр дириэктэрин сүрүн боппуруостарга солбуйааччытынан үлэлээбит.
2017 сыллаахха «Г. Г. Дадамян оскуолата» диэн сыана ускуустубатын үлэһиттэрин эбии үөрэхтиир үрдүкү үөрэх кыһатын бүтэрэн, сыана ускуустубатын менеджэрин идэтин ылбыт.
2020 сыллаахха Саха тыйаатырын дириэктэринэн анаммыт[3].
Айар үлэтэ
Тыйаатырга оонньуур сүрүн оруоллара
- Исай Попов — И. Гоголев «Кэрэ көмүскэлигэр»;
- Боорчу — Н. Лугинов «Чыҥыс Хаан ыйааҕынан»;
- Ньургун Боотур — П. Ойуунускай «Туналҕаннаах ньуурдаах Туйаарыма Куо» олоҥхо;
- Чаллаайы — И. Гоголев «Дыгын Дархан»;
- Эрдэлиир Миитэрэй — А. Аччыгыйа «Сааскы кэм»;
- Касым — Ч. Айтматов «Ийэ сирэ»;
- Сиэнньэ — С. Ермолаев «Эйиэхэ сибэкки биэрээри»;
- Дэгэнэ Дугуй — И. Избеков «Сыгый Кырынаастыыр»;
- Испирдиэн — А. Софронов «Үс ини-бии»;
- таҥара үлэһитэ — А. Дойду «Мэҥэ халлаан оҕото Манчаары Баһылай»;
- Гаврил Ксенофонтов — В. Харысхал «Тэпсиллибэт үтүө аат»;
- Г. Ксенофонтов — Н. Лугинов «Максим»;
- Апанаас — Д. Наумов «Сандаарар сарыал саллааттара» уо.д.а.
Киинэҕэ оруоллара
- Дьэлмэ — «Тайна Чингис Хаана», режиссер А. Борисов (2009)[1];
- Марҕа баай — «Тыгын Дархан», режиссер Н. Аржаков (2020).
Наҕараадалара уонна үтүө ааттара
- Саха Өрөспүүбүлүкэтин култууратын туйгуна;
- Саха Өрөспүүбүлүкэтин үтүөлээх артыыһа[3].