Нуучча тылынанАнал бырайыактар
Тылы уларыт
УРУБИИКИ ТУҺУНАН

Копырина Анастасия Семёновна

Анастасия Семёновна (1930 сыл олунньу 15 күнэ, Лөгөй нэһилиэгэ, Саха АССР — 2007 сыл от ыйын 7 күнэ, Саха сирэ) — Социалистыы Үлэ Дьоруойа (1973), Уус Алдан улууһун Заболоцкий бартыһаан аатынан сопхуос ыанньыксыт[1][2].

Олоҕун олуктара

1930 сыллаахха олунньу 15 күнүгэр Уус-Алдан улууһун I-с Лөгөй нэһилиэгэр төрөөбүт.

Оскуола кэнниттэн, 1940-с сыллар бүтүүлэригэр, Уус-Алдан улууһун бартыһаан Заболоцкай аатынан сопхуоска ньирэй көрөөччүнэн үлэлии киирбит, онтон Лөгөй нэһилиэгин Даалы ферматыгар ыанньыксыт буолбут.

Саха Өрөспүүбүлүкэтин үрдүнэн орто ыам 600-800 киилэ үүккэ тэҥнэһэр эбит буоллаҕына (1940-с сыллар бүтүүлэрэ — 1950-с сыллар саҕаланыылара), кини биир ынах биир сыллаах үүтүн көрдөрүүтүн тыһыынча киилэҕэ таһаарбыта, ыанньыксыттар ортолоругар оҥорон таһаарыыга инники күөҥҥэ сылдьыбыта.

7-с биэс сыллаах кэрчик (1959-1965) үлэтин түмүгүнэн А.С. Копырина «Бочуот Бэлиэтэ» уордьанынан, 8-с пятилеткаҕа (1966-1970) Ленин уордьанынан наҕараадаламмыт.

1970-с сыллар саҕаланыыларыгар Саха сиригэр бастакынан 4 тыһыынча киилэ үүт боруогун Тунах диэн ынаҕы ыан туораабыт.

ССРС Үрдүкү Сүбэтин Президиумун 1973 сыл балаҕан ыйын 6 күнүнээҕи Ыйааҕынан Копырина Анастасия Семёновнаҕа Социалистыы Үлэ Дьоруойун аата иҥэриллибит, Ленин уордьана уонна «Сиэрпэ уонна Балта» кыһыл сулус туттарыллыбыт.

А.С. Копырина хаста да ССРС норуотун хаһаайыстыбатын ситиһиилэрин Быыстапкатын (ВДНХ) кыттыылааҕа буолбут. Сопхуоска биэнсийэҕэ тахсыар диэри ыанньыксытынан салгыы үлэлээбит.

Союз суолталаах персональнай пенсионер[1][2].

Наҕараадалара уонна ытык ааттара

Аатын үйэтитии

  • Кини аатынан Лөгөй нэһилиэгин Кэптэни сэлиэнньэтигэр уулусса ааттаммыт[3];
  • Аата Уус-Алдан улууһун киинигэр Бороҕон нэһилиэгэр 2005 сыллаахха бэс ыйын 18 күнүгэр аһыллыбыт Дьоруойдар Аллеяларыгар үйэтитиллибит[4];
  • 2022 сыллаахха «Анастасия Копырина» алмаас кини аатынан ааттаммыта («Саха дьоруойдара» кэллиэксийэ)[5].

Быһаарыылар

  1. ↑ 1 2 3 Копырина Анастасия Семёновна. Герои страны. Сигэнии күнэ: 9 Олунньу 2026.
  2. ↑ 1 2 Копырина Анастасия Семёновна. Усть-Алданская МЦБС. Сигэнии күнэ: 9 Олунньу 2026.
  3. ↑ Почтовый индекс улица им А. С. Копыриной, с. Кептени. Кодификант.ру. Сигэнии күнэ: 9 Олунньу 2026.
  4. ↑ Красные гвоздики от коммунистов — к мраморным пилонам. КПРФ (28 Бэс ыйын 2005). Сигэнии күнэ: 9 Олунньу 2026. Архивировано 31 Ахсынньы 2019 года.
  5. ↑ Память о выдающихся якутянах увековечивают в именных алмазах. 1SN.ru (23 Олунньу 2022). Сигэнии күнэ: 9 Олунньу 2026.

Литература

  • Владимир Пестерев. История Якутии в лицах. — Якутск: «Бичик», 2001.

Категориялар