Апросимова Тамара Константиновна
Апросимова Тамара Константиновна (1943 сыл олунньу 23 күнэ, Суола — 1993 сыл ыам ыйын 20 күнэ, Хонуу, Саха сирэ) — режиссер. РСФСР уонна Саха АССР култууратын үтүөлээх үлэһитэ.
Олоҕун олуктара
Тамара Апросимова 1943 сыллаахха олунньу 23 күнүгэр Моорук нэһилиэгин Суолатыгар төрөөбүтэ.
1963 сылтан Мэҥэ-Хаҥалас улууһугар с. Суола кулуубун сэбиэдиссэйинэн үлэтин саҕалаабыта, кэлин Булуҥ оройуонугар Күһүрдээҕи норуот тыйаатырын режиссерунан үлэлээбитэ.
1975 сыллаахха Хабаровскайдааҕы култуура институтун бүтэрбитэ.
1973—1993 сылларга Муоматааҕы норуот тыйаатырын режиссера. 52 араас жанрдаах испиктээкиллэри туруорбута: «Наара Суох» И. Гоголев, «Төлөн Ньукуус» Суорун Омоллоон, «Саллаат сүрэҕэ» И. Гоголев, «Суол төрдүгэр» И. Находкин, «Суоһалдьыйа Толбонноох» И. Алексеев, «Абааһылаах сундуук» Ц. Шагжина, «Ньургун Боотур» Суорун Омоллоон, «Русалка» А. Пушкин, «Отелло» В. Шекспир уо. д. а.[1]
Ситиһиилэрэ
Муоматааҕы норуот тыйаатыра кини салайар кэмигэр икки төгүллээх бүтүн сойуустааҕы уонна арассыыйатааҕы творческай көрүүтүн лауреата буолар (Петропавловский-Камчатский, Москва, 1977; Благовещенск, 1987), өрөспүүбүлүкэтээҕи уонна зональнай норуот тыйаатырын көрүүтүн хас да төгүллээх кыайыылааҕа.
Т. Толомонов, Н. Момскай, Е. Апросимов, И. Сосин хоһоонноругар ырыа ааптара.
Наҕараадалара
- «Килбиэннээх үлэтин иһин. В. И. Ленин төрөөбүтэ 100 сылыгар» мэтээл.
- Саха АССР култууратын үтүөлээх үлэһитэ (1978);
- РСФСР култууратын үтүөлээх үлэһитэ (1984).
Аатын үйэтитии
- Муоматааҕы норуот тыйаатырыгар кини аата иҥэриллибитэ.
- Төрөөбүт нэһилиэгэр Моорукка култуура киинэ кини аатын сүгэр.