Андросов Гаврил Гаврильевич
Андросов Гаврил Гаврильевич — Хабырыыс Ондороос (1985 сыл ыам ыйын 6 күнэ, Таатта улууһа, Саха АССР) — бэйиэт, Арассыыйа суруйааччыларын Сойууһун чилиэнэ, Саха Сирин Суруйааччыларын сойууһун бэрэссэдээтэлэ (2023-2025).
Олоҕун олуктара
1985 сыл ыам ыйын 6 күнүгэр Таатта улууһун Баайаҕа нэһилиэгэр төрөөбүтэ.
2007 сыллаахха М. К. Аммосов аатынан Саха судаарыстыбаннай университетын Саха тылын уонна культурологиятын факультетын үөрэнэн бүтэрэн, саха тылын уонна литературатын учууталын сэргэ литература эрэдээктэрэ уонна кириитигэ идэни ылбыта.
Үлэтэ
2007—2015 сылларга «Саха сирэ» хаһыат «Эдэр саас» сыһыарыытын, Норуот духуобунай барҕарыытын кыһалҕаларын салаатын кэрэспэдьиэнинэн, устуоруйаҕа уонна духуобунай сайдыыга анаарааччынан үлэлээбитэ. 2015 сыл ыам ыйыттан «Чолбон» сурунаал сүрүн эрэдээктэрин солбуйааччынан үлэлээбитэ.
2020 сыл от ыйын 2 күнүттэн «Чолбон» уус-уран сахалыы сурунаал сүрүн эрэдээктэрэ[1].
2013-2023 сс. Саха сирин Суруйааччыларын сойууһун бэрэссэдээтэлин солбуйааччыта этэ.
2023 сыллаахха Саха сирин Суруйааччыларын сойууһун бэрэссэдээтэлинэн талыллыбыта. Бу дуоһунаска 2025 сыл бэс ыйыгар дылы үлэлээбитэ.
Айар үлэтэ
Гаврил Андросов үс хоһоон, үс кыраайы үөрэтии уонна публицистика кинигэлэрин ааптара.
2025 сыллаахха «Муустаах муҥ» айымньыта «Муздак муҥ» диэн ааттаах казахтыы тылынан «Фолиант» кинигэ кыһатыгар бэчээттэнэн тахсыбыта[2].
Наҕараадалара
- СӨ бочуоттаах бэлиэтэ.
- Лев Гумилев аатынан Казахстан Евразиятааҕы национальнай университетын мэтээлинэн наҕараадаламмыта.
- СӨ култууратын туйгуна.
- Намжил Нимбуев аатынан норуоттар икки ардыларынааҕы поэзия турнирын призера (2009).
- «Кыһыл көмүс бөрүө» СӨ Суруналыыстарын сойууһун бириэмийэтин лауреата (2012).
- «Сахабыт тылын кэскилин туруулаһарыҥ иһин» уопсастыбаннай бириэмийэ лауреата (2019).