Хорошев Андрей Фёдорович

1959 сыллаахха бэс ыйын 27 күнүгэр Москва уобалаһын Нахабино бөһүөлэгэр төрөөбүт^[1] (атын дааннайдарынан, Өлүөхүмэҕэ төрөөбүт^[2]).

Нахабино 1 №-дээх орто оскуолатын бүтэрбит.

1977 сыллаахха аармыйаҕа ыҥырыллан, водолааһынан сулууспалаабыт. Атын дааннайдарынан, 1977 сыллаахха Москубатааҕы авиационнай (МАИ) институт устудьуона.

Бигэргэммэтэх дааннайдарынан, 1982 сыллаахха «Комсомольская правда» эспэдииссийэтин састаабыгар Семлевскай күөлгэ «Наполеон Кылаатын» көрдөспүт.

1983 сыллаахха Москубатааҕы авиационнай институту «Информация систиэмэлэрэ», «инженер-испытатель» идэлээх бүтэрбит. МАИ-га успуорт квотатынан, «спортсмен, көҥүл тустуук быһыытынан» үөрэммит.

Ол сыл ССРС мэдиссиинэ билимин Академиятын кинематография салаатыгар кинооператорынан үлэлии киирбит. Манна мэдиссиинэ эппэрээссийэлэрин документальнай киинэҕэ усталлар эбит.

1986 сылга диэри «Клуб кинопутешественников» диэн биэриигэ уу аннынаан түһэриинэн дьарыктаммыт, ону таһынан археологынан үлэлээбит. ССРС География уобсастыбатын дьиҥнээх чилиэнэ^[3].

1990 сыллаахха Бүтүн Сойуустааҕы судаарыстыбаннай кинематография институтун (нууч.) (сах. (ВГИК) режиссура салаатын Б. А. Альтшуллер уонна Б. В. Кубеев «билим-популярнай киинэ» хайысхалаах мастарыскыайдарын туйгуннук үөрэнэн бүтэрбит. Бэһис кууруска түмүк үлэтинэн «Русские меха» угуйар киинэ буолбут.

2005 сыллаахха Дьокуускайга көспүт.

Байкаллааҕы судаарыстыбыннай экономика университытын (БГУЭП) Саха сиринээҕи филиалын маркетинг уонна коммерция, туризм уонна маассабай коммуникациялар кафедраларын доцена буолбут.

2015 сылтан М. К. Аммосов аатынан Хотугулуу-Илиҥҥи федеральнай университет информационнай политика уонна коммуникация технологияларын дьаһалтатын сүрүн специалиһынан үлэлээбит.

2020 сыл муус устар ыйыттан «Саха Парламент» судаарыстыбыннай таһаарыы колумниһа^[4].

2026 сыллаахха тохсунньу 1 күнүгэр Сухумҥа (Абхазия) киһини быыһаары өлбүт^[5].

ВГИК эдэр режиссёрдарын кытта реклама ааҕыныстыбатын тэрийбит. 1990 сыл олунньутугар Звенигородка буолбут телевизионнай реклама бастакы бэстибээлигэр кыттыбыт. Барыта 30-тан тахса угуйар ролик устубут, ол иһигэр «Кампомос», «Эксима», «Procter & Gamble» хампаанньалар, «Совинторг» массыынатын угуйуктарын^[6].

1990-с сылларга туоруорааччы оператор быһыытынан үгүс бырайыакка үлэлээбит.

1997—1998 сылларга «Перехват» диэн ТВ-бырайыак уус-уран салайааччытынан, туруорааччы режиссёрынан үлэлээбит (НТВ ханаал, продюсер Дэвид Гамбург, ыытааччы Николай Фоменко).

1999 сыллаахха «Телеспецназ» диэн ТВ-биэриини толкуйдаан туруорбут (Николай Фоменконы кытта «НТВ-Телемост» хампаанньа көмөтүнэн).

2000—2002 сылларга РТР уонна РЕН ТВ ханаалларга репортаж сулууспатын салайааччытынан, биэрии ыытааччытынан үлэлээбит^[3].

2002 сыллаахха Бастакы ханаал билим-популярнай биэриилэрин дирекциятын дириэктэрин Андрей Цвинтарный ыҥырыытынан нэдиэлэ аайы тахсар «Искатели» биэрии ыытааччыта буолбут. 2002 сыл күһүнүттэн 2008 сыл бүтүөр диэри 150-ча биэрии тахсыбыт, ол эрэн ханаал салалтата бырайыагы уһаппатах^[7].

2010 сыллаахха «Искатели» биэрии саҥардыллан «Культура» ханаалга тахсыбыт. 2013 сыл сайыныгар дылы 73 сиэрийэҕэ уһуллубут, онтон бырайыакка интэриэһин сүтэрэн, уурайбыт^[8].

2006 сыллаахха «Саха» НКИХ ханаалыгар «Искатели Якутии» биэрии ааптара уонна ыытааччыта буолбут^[2].

2008 сылтан «Навигатор» тус айар устуудьуйатын салайан үлэлэппит^[2].

2016 сыллаахха «Якутск-ТВ» ханаалга «Үһүс харах» телешоуга кастинг ыыппыт.

2019 сыллаахха доҕотторун кытта «Два страТпера» диэн видеоблог арыйбыт.

2022 сыллаахха оҕо киинэ устуудьуйатын арыйбыт^[9].

2014 сыл балаҕан ыйыгар Саха Өрөспүүбүлүкэтин баһылыгын быыбарыгар Егор Борисов туһугар үлэлээбит.

2017 сыллаахха Дьокуускай куорат баһылыгын дуоһунаһыгар «Биир Ньыгыл Россия» праймериһыгар кыттыбыт, ол гынан баран иккис миэстэни ылбыт (7,38 %), оттон бастакы миэстэни Айсен Николаев (86,25 %) ылбыт^[4][11].

2018 сыллаахха ЛДПР баартыйатыттан Марха быыбардыыр уокуругуттан Саха Өрөспүүбүлүкэтин норуодунай дьокутааттарыгар тура сылдьыбыт (ааспатах).

2018 сыллаахха Сардаана Авксентьева Дьокуускай баһылыга буоларын өйөөбүт.

2007 сылтан Арассыыйа тэлэбиидэнньэтин Академиятын чилиэнэ.

Саха сиригэр «Шергин шаахтата» федеральнай суолталаах устуоруйа пааматынньыгын сөргүтүү бырайыагын ааптара буолбут. «Кавалерия Заполярья» диэн буойун табаһыттар ааттарын үйэтитэр таба сүүрдүүтүн көҕүлээччитэ уонна кыттыылааҕа (2010)^[2].

Туризм эйгэтигэр «Тепло якутского холода» (2009) уонна «Тепло якутского холода-2» (2012) билим-практическай бырайыактар ааптардара. Бу иһин Ю. Сенкевич аатынан национальнай туристическай бириэмийэ дипломана буолбут (2009)^[4].

2011 сылтан Саха Өрөспүүбүлүкэтин Уопсастыбаннай палаататын чилиэнэ, имидж уонна туризм сайдыытыгар хамыыһыйа бэрэссэдээтэлэ.

2012 сыллаахха Арассыыйа суруйааччыларын Сойууһун чилиэнэ буолбут^[12].

Аҕата Фёдор Алексеевич Хорошев (1920 с.т.) — Иркутскай уобалаһыттан төрүттээх байыаннай инженер, Аҕа дойду Улуу сэриитин кыттыылааҕа, ССКП чилиэнэ^[13].

Быраата Алексей (1963 с.т.) — уруккута спортсмен, кэлин адвокат буолбут^[14].

Бастакы кэргэнэ — Марина Хегай-Шамшурина (05.02.1970-21.12.2005), суруйааччы Юрий Шамшурин сиэнэ; Москваҕа поезд анныгар түбэһэн соһумардык өлбүт^[15].

Иккис кэргэнэ — Эльмира Туканова, турфирма үлэһитэ; 2008 сыллаахха ыал буолбуттар, ол эрэн сотору кэминэн арахсыбыттар.

Үһүс кэргэнинээн Ирина Соловьевалыын 2010 сыллаахха билсибиттэр, 2013 сыллаахха холбоспуттар.

Үс уол оҕолоох: Федор (2004 с.т.), Андрей (2012 с.т.), Алексей (2013 с.т.); төрдүс оҕото кыыс^[16].