Алымов Тимофей Моисеевич

Тимофей Алымов 1888 сыллаахха олунньу 19 күнүгэр (кулун тутар 2 күнэ) Асрахань губерниятын Царевскай уездын Капустиноярскай слободатыгар төрөөбүтэ.

Сыр-Дарья уобалаһын Перовск куорат училищетын бүтэрэн бастаан Ташкеҥҥа, онтон Оренбурга үлэлии барар.

1908 сыллаахха Перовска төннөн полиция кэтэбэлигэр киирэр. Ол сылга «Перовск анархистарын бөлөхтөрүн» туһунан дьыала тэриллибитэ, онтон «бөлөх тэрийээччитэ уонна салайааччыта Т. М. Алымов этэ» диэн түмүк тахсыбыта. Маны таһынан, Ташкенҥа уонна Киин Арассыыйа хас да куоратыгар өрөбөлүүссүйэ тэрилтэлэрин кытта сибээһи олохтообута уонна тутуһара диэн буруйдаммыта. Т. Алымов хаайыыга быраҕыллыбыта. Ташкент хаайыытыттан 1910 сыллаахха саас босхолонон көскө Саха Уобалаһыгар ыытыллыбыта. Ново-Николаевское сэлиэнньэҕэ (билиҥҥи Маҕан) олороро. Ол сылга сэтинньи ыйыгар Байаҕантай улууһугар онтон Танда диэн сэлиэнньэҕэ көһөрүллүбүтэ. 1912 сыллаахха тохсунньу ый 15 күнүгэр «ураты наадаттан сылтаан» Дьокуускайга айанныыр уонна Ново-Николаевскайга олорор.

1913 сыллаахха олунньу ый 21 күнүгэр Романовтар династиялара 300 сыл туолбутун иһин ыраахтааҕы ыйааҕынан көскө ыытыллыбыт хаайыылаах болдьоҕо аҕыйаабыта.

1918 сыллаахха Ленско-Витимскай көмүс хостуур сиригэр былаас Сэбиэккэ көһөр. Сэбиэт иһигэр уон сэттэ киһи баара, сүрүнэн большевиктар. Сэбиэккэ Тимофей Моисеевич баара. Бодойбоҕа Кыһыл Гвардия 2-с Бодойбо этэрээтэ үөскүүр. Бу этэрээти Тимофей Алымов салайбыта.

Тимофей Алымов 1918 сыллаахха атырдьах ый 18 күнүгэр Половинка дэриэбинэҕэ Колчаков дьонугар билиэҥҥэ түбэһэн ытыллар^[1].

• 1920 сыллаахха ахсынньы 31 күнүгэр Половинка сэлиэнньэ аатын Алымовкаҕа уларыппыттар.
• 1929 сыллаахха Алымовка сэлиэнньэҕэ «Партизан Алымов» диэн колхоз тэриллибитэ.
• 1938 сыллаахха Алымов аатынан тыа бибилэтиэкэтэ тэриллибитэ^[1].
• Тимофей Моисеевич Алымов аатынан Дьокуускай куорат уокуругун Маҕан сэлиэнньэҕэ уулусса ааттаммыт.

• Имена на улицах Якутска : (биобиблиографический справочник). — Якутск: ЦГБ, 2022. — С. 16—17. — 697 с.