Третьяк Раиса Михайловна
Третьяк (Птицина) Раиса Михайловна (1926 сыл тохсунньу 20 күнэ, Чайкин[d], Благодарненское сельское поселение[d] — 2001 сыл сэтинньи 17 күнэ, Ставрополь[d]) — «Стравропольхимстрой» трест тутуу учаастагын биригэдьиирэ, Социалистыы Үлэ Дьоруойа[1].
Олоҕун олуктара
1926 сыллаахха тохсунньу 20 күнүгэр Краснодаар кыраайын Отрадненскай оройуонун Чайкин хуторыгар төрөөбүт, кыыһынан араспаанньата Птицина. Алын оскуола кэннэ Краснодаар кыраайын «Кыһыл знамя» колхуоһугар араас үлэһитинэн - ньирэй көрөөччүнэн, ыанньыксытынан үлэлээбит[1].
1955 сыллаахха Ставрополь кыраайын Невинномысскай куоратыгар көһөн, «Ставропольхимстрой» трест 3 №-дээх тутуу учаастагар киирбит. Сотору кэминэн биригэдьииринэн анаабыттар. Кини бетон оҥорор биригээдэтэ трест уонна кыраай үрдүнэн социалистыы күрэхтэһиилэргэ хаста да кыайа сылдьыбыт[2].
Социалистыы күрэхтэһиилэргэ уһулуччулаах ситиһиилэрин уонна тутааччылар коллективтарын сатабыллаахтык салайбыттарын иһин ССРС Үрдүкү Сэбиэтин Президиумун 1960 сыл кулун тутар 7 күнүнээҕи Ыйааҕынан Социалистыы Үлэ Дьоруойун аата иҥэриллибит, Ленин уордьана уонна «Сиэрпэ уонна Балта» кыһыл сулус туттарыллыбыт.
1961 сыллаахха кэргэн тахсан, араспаанньатын Третьяк диэҥҥэ уларытан, кэргэнин кытта Саха АССР Өймөкөөн улууһугар көһөн, Индигиир горнопромышленнай салалта Уолчаан (Ольчан) бириискэтигэр үлэлээбиттэр. Онно кини металлолом устааччынан, онтон киин хочуолунайга хачыгаарынан үлэлээбит. Биэнсийэҕэ тахсыан иннинэ - кладовщик-раздатчик эбит.
Невинномысскай куораттааҕы (1959) уонна Ставрополь кыраайын (1961) үлэһиттэр дьокутааттарын Сэбиэтигэр дьокутаатынан, ССРС профсоюзтарын XIII сийиэһин делегатынан (1963), Саха АССР Үрдүкү Сэбиэтин дьокутаатынан (1963) талыллан үлэлии сылдьыбыт.
Биэнсийэҕэ тахсан баран Ставропольга олорбут. Сэтинньи 17 күнүгэр 2001 сыллаахха өлбүт[1].
Наҕараадалара уонна ытык ааттара
- Социалистыы Үлэ Дьоруойа (1960);
- Ленин уордьана;
- «Сиэрпэ уонна Балта» мэтээл.
Быһаарыылар
Литература
- Владимир Пестерев. История Якутии в лицах. — Якутск: «Бичик», 2001.