Степанов Афанасий Егорович

1920 сыллаахха Мэҥэ Хаҥалас улууһугар 2-с Моорук нэһилиэгэр удьуор сылгыһыт дьиэ кэргэнигэр төрөөбүт.

Үс кылааһы бүтэрэн баран аҕата уонна убайа өлөннөр оскуолаттан уурайбыт, «Комбайн» холкуоска үлэлии киирбит.

1941 сыллаахха сылгыһыт буолбут, өссө биир сылынан сэбиэдиссэй буолбут.

Саас сылгыларын үрэхтэр хаар эрдэ ууллар соҕуруу эниэлэригэр аһатар эбит, сайын куйаас түһүөр диэри баай үүнүүлээх мэччирэҥнэргэ сырытыннарар эбит. Күһүн күөл мууһа тоҥуор диэри сылгы дэҥнэммэтин диэн эрдэттэн хаһаалыыр, муус кытааттаҕына эрэ кыһыҥҥы аһыыр сирдэригэр таһаарар эбит. 1944 сылтан биир да кулун өлбөтөх.

Оннук 1945 сылтан 1949 сылга диэри 26 биэттэн 121 кулуну ылбыт, таһаарыыны 93 бырыһыаҥҥа тиэрдибит^[1].

ССРС Үрдүкү Сүбэтин Президиумун 1948 сыл атырдьах ыйын 5 күнүнээҕи Ыйааҕынан Степанов Афанасий Егоровичка Социалистыы Үлэ Дьоруойун аата иҥэриллибит, Ленин уордьана уонна «Сиэрпэ уонна Балта» кыһыл сулус туттарыллыбыт.

1954 сыллаахха Норуодунай хаһаайыстыба ситиһиилэрин быыстапкатыгар (ВДНХ) бэйэтин атыыр сылгытын кытта кыттыбыт.

1956 сыллаахха өлбүт^[1].

• Социалистыы Үлэ Дьоруойа (1948)^[2];
• Ленин уордьана;
• «Сиэрпэ уонна Балта» кыһыл көмүс мэтээл^[1].

• Мэҥэ-Хаҥалас улууһун Майа сэлиэнньэтигэр А. Е. Степанов уулуссата баар;
• 2019 сыллаахха бу уулуссаҕа кини кэриэһигэр мемориал уонна искибиэр арыйбыттар;
• 2022 сыллаахха «Үбүлүөйдээх» туруупкаттан АЛРОСА хостообут 54,37 караттаах алмааһа «Саха АССР 100 сылыгар анаан 100 ааттаах алмаас» бырайыак чэрчитинэн Степанов Афанасий Егорович аатынан ааттаммыт (англ. Hero of Socialist Labor A.E. Stepanov diamond).