Нуучча тылынанАнал бырайыактар
Тылы уларыт
УРУБИИКИ ТУҺУНАН

Сардаана Корякина

Сардаана Корякина (1984 сыл атырдьах ыйын 25 күнэ, Бүлүү) — модель, «Мисс Якутия — 2004» өрөспүүбүлүкэтээҕи кэрэлэр күрэхтэрин кыайыылааҕа, «Мисс Россия-2004» күрэххэ «Мисс национальный костюм» номинация кыайыылааҕа[1].

Олоҕун олуктара

Сардаана Корякина 1984 сыллаахха атырдьах ыйын 25 күнүгэр Бүлүү куоракка төрөөбүт. Оҕо сылдьан музыка оскуолатыгар фортепиано кылааһыгар дьарыктаммыт, хомуска оонньуур эбит[2].

2005 сыл дааннайынан, СГУ (билиҥҥитэ ХИФУ) үп-экэниэмикэ институтун устудьуона эбит. Ийэтэ кэпсээбитинэн, 2007 сыллаахха Салайыы уонна экономика Академиятын бүтэрбит[2].

Кэрэлэр күрэхтэригэр кыттыы

2003 сыллаахха Сардаана Корякина «Мисс Виртуальная Якутия» күрэххэ кыайбыт. 2004 сыллаахха «Мисс Якутия» өрөспүүбүлүкэтээҕи күрэх кыайыылааҕа[3] буолбут.

Бу кыайыы көмөтүнэн кини «Мисс Россия — 2004» (нууч.) (сах. национальнай күрэххэ өрөспүүбүлүкэ аатыттан кыттар быраабы ылбыт. Москваҕа буолбут конкурска уон бастыҥ кыттааччы иһигэр киирбит уонна түөрт сүрүн титуллартан биирдэстэрин — «Мисс национальный костюм» диэн ааты ылбыт[4][1].

«Мисс Якутия» аатыттан матыы

2004 сыл ахсынньытыгар, «Мисс Россия» финала бүппүтүн кэннэ, тута айдаан тахсыбыт. Сардаана Корякина илии баттаабыт эбээһинэстэрин кэһэн, күрэх кэннэ ыытыллар официал тэрээһиннэри көтүтэн, доҕотторун кытта саҥа дьылы түүҥҥү кулуупка көрсө барбыт. Бу быһыыны «Мисс Россия» тэрээһин президенэ Николай Костин улаханнык сэмэлээбит, кини күрэх Саха сиринээҕи салалтатыгар маннык майгы атын кыттааччыларга куһаҕан холобур үөскэтэрин туһунан суруйбут. Балаһыанньа ыараан, «Мисс Россия» салалтата «Мисс Якутия» күрэхтэн официал лицензиятын былдьыырын туһунан боппуруоһу көрбүт[3][4].

Маны таһынан, Корякина, «Мисс Якутия» күрэх кыайыылааҕын быһыытынан, сыл устата аһымал аахсыйаларга уонна Араассыыйаҕа буолар араас тэрээһиннэргэ Саха сирин аатыттан кыттыахтаах эбит, онуоха кини бу туһунан дуогабары баттыыртан аккаастаммыт. Ол гынан баран, «Мисс Якутия» аатын туһанан, араас көрдөрүүлэргэ, ол иһигэр купальниктаах тахсыыга кыттыбыт[3].

Тэрийээччилэргэ муҥур уһугунан Сардаана Корякина «Игнат» диэн эр дьоҥҥо аналлаах сурунаалга бүтүннүү кэриэтэ сыгынньах түспүт хаартыскалара тахсыбыта буолбут. Бу түмүгэр «Мисс Якутия» күрэх салалтата кинини титулун быһарга быһаарыы ылыммыт. Хоруона I вице-мисс Туйаара Алааска тиксибит. Урукку кыайыылаах бэйэтэ айдаан кэмигэр кыраныысса таһыгар сылдьыбыт уонна балаһыанньаны ырыппатах[3].

Атын дьарыга

2006 уонна 2008 сс. Анатолий Сергеев «Тропа смерти» уонна «Тропа смерти-2» киинэлэригэр уһуллубут. Кэлин киинэҕэ уһуллубатах[5].

2015 сыллаахха флорист идэтигэр үөрэммит, Дьокуускайга сибэкки салонун арыйа сылдьыбыт[6].

Тус олоҕо

2012 сыллаахха бэлиитик Афанасий Максимовка кэргэн тахсыбыт. 2014 сыллаахха уол оҕоломмуттар. 2017 кэргэнниилэр арахсыбыттарын туһунан иһитиннэрбиттэр[7].

2024 сыллаах дааннайдарынан, уолун кытта Калининград куоракка олороллор[8].

Быһаарыылар

  1. ↑ 1 2 Первая якутская красавица провела интернет-конференцию (рус.). Регнум (16 Олунньу 2026).
  2. ↑ 1 2 Альбина Корякина – мама той самой Сарданы Корякиной… (рус.). СахаНьюс (16 Олунньу 2026).
  3. ↑ 1 2 3 4 У Мисс Якутии отняли титул (рус.). Коммерсант (16 Олунньу 2026).
  4. ↑ 1 2 Портрет идеальной мисс Якутия (рус.). Сахапресс (16 Олунньу 2026).
  5. ↑ Сардана Корякина (рус.). Кинопоиск. Сигэнии күнэ: 16 Олунньу 2026.
  6. ↑ Подборка: известные якутяне 10 лет назад (рус.). Эхо Столицы. Сигэнии күнэ: 16 Олунньу 2026.
  7. ↑ Опальный политик Якутии Афанасий Максимов разводится с женой (рус.). Якутия Медиа. Сигэнии күнэ: 16 Олунньу 2026.
  8. ↑ Сардана Корякина приехала в Якутск (рус.). Якутия Медиа. Сигэнии күнэ: 16 Олунньу 2026.

Категориялар