Нуучча тылынанАнал бырайыактар
Тылы уларыт
УРУБИИКИ ТУҺУНАН

Павлов Владимир Гаврилович

УРУБИИКИ иһигэр маннык араспаанньалаах дьон туһунан ыстатыйалар бааллар, көр Павлов.

Павлов Владимир Гаврилович (1929 сыл атырдьах ыйын 15 күнэ, Бүлүүчээн, Саха АССР — 1999 сыл атырдьах ыйын 12 күнэ, Дьокуускай) — Дьокуускай куорат баһылыга буола сылдьыбыт, 1980-90 сылларга «Сахамебель» Холбоһук салайааччыта.

Олоҕун олуктара

1929 сыллаахха атырдьах ыйын 15 күнүгэр Сунтаар оройуонугар төрөөбүтэ.

1956 сыллаахха Дьокуускайдааҕы педагогическай институту (билигин Хотугу-Илин федеральнай университет) бүтэрэн баран, Бүлүүчээн орто оскуолатыгар учууталынан уонна директорынан үлэлээбитэ, онтон төрөөбүт улууһугар комсомольскай үлэҕэ сылдьыбыта. Кэлин КПСС райкомун бастакы секретарынан үлэлээбитэ, онно бэйэтин дьоҕурдаах салайааччы уонна тэрийээччи быһыытынан көрдөрбүтэ — кини үлэлиир сылларыгар Сунтар улууһа тыа хаһаайыстыбатын сүрүн хайысхаларыгар үрдүк көрдөрүүлэри ситиспитэ[1].

Ону таһынан Саха АССР сырдатыы миниистиринэн, КПСС КК инструкторынан, Саха АССР Миниистирдэрин Сэбиэтин бэрэссэдээтэлин солбуйааччытынан, КПСС Саха обкомун секретарынан уонна КПСС Дьокуускайдааҕы горкомун бастакы секретарынан үлэлээбитэ. 1973 сылтан 1976 сылга диэри Владимир Павлов Саха АССР Уот-түөс промышленноһын управлениетын начальнигын дуоһунаһын туппута. 1977 сылтан республика бөдөҥ тэрилтэтин — «Якутмебель» производственнай холбоһук директорынан буолбута. Кини сыралаах үлэтин түмүгэр Саха сиригэр аныгылыы мебел оҥорон таһаарыы тэриллибитэ, итинэн сибээстээн Павлов республика Судаарыстыбаннай бириэмийэтин лауреата буолбута.

1999 сыллаахха атырдьах ыйын 12 күнүгэр Дьокуускайга өлбүтэ.

20 сыл «Сахамебель» тэрилтэ дириэктэринэн үлэлээбит.

Наҕараадалара уонна ытык ааттара

  • «Үлэ Кыһыл Знамята» уордьан;
  • Арассыыйа Федерациятын үтүөлээх экэнэмииһэ;
  • Саха Өрөспүүбүлүкэтин норуотун хаһаайыстыбатын үтүөлээх үлэһитэ;
  • «Хотугу сулус» уордьан бастакы кавалера (1997);
  • Сунтаар улууһун ытык олохтооҕо;
  • «Саха Өрөспүүбүлүкэтин үөрэҕириитин туйгуна» бэлиэ;
  • Саха Өрөспүүбүлүкэтин Бэрэсидьиэнин Бочуоттаах грамотата.

Аатын үйэтитии

  • В. Г. Павлов аата «Сахамебель» Холбоһукка иҥэриллибитэ[2] (1999);
  • Сунтаардааҕы бастакы таһымнаах оскуола кини аатын сүгэр[3];
  • «Бичик» кинигэ кыһатыгар «Владимир Павлов» кинигэ нууччалыы уонна сахалыы тылларынан бэчээттэнэн тахсыбыт (2004);
  • Сунтаарга киниэхэ анаан түмэл тэриллибитэ.

Быһаарыылар

  1. ↑ Павлов Владимир Гаврилович. Сигэнии күнэ: 11 Сэтинньи 2019. Архивировано из оригинала 10 Сэтинньи 2019 года.
  2. ↑ Саха Өрөспүүбүлүкэтин Президенэ М. Николаев 1999 сыл балаҕан ыйын 21 күнүнээҕи «О присвоении имени В. Г. Павлова государственному производственному объединению „Сахамебель“» Дьаһайыыта
  3. ↑ «Сахамебель» требует исполнения всех 22 пунктов «РАСПОРЯЖЕНИЯ» Вице-президента РС(Я). Сигэнии күнэ: 11 Сэтинньи 2019. Архивировано 11 Сэтинньи 2019 года.

Сигэлэр

Категориялар