Кочнев Петр Павлович
Кочнев Петр Павлович (1925, Нөөрүктээйи нэһилиэгэ — 1990, Сангаар) — саха сэбиэскэй шахтера, Социалистыы Үлэ Дьоруойа, ССРС үтүөлээх шахтера[2].
Олоҕун олуктара
1925 сыллаахха Ленскэй оройуон Нөөрүктээйи нэһилиэгин Толоон сэлиэнньэтигэр төрөөбүт[3].
1936 с. төрөппүттэрин кытта Сангаарга көспүт. Төрөппүттэрэ онно шахтаҕа үлэлээбиттэр.
1939 сыллаахха Сангаар ситэтэ суох орто оскуолатын 5‑с кылааһын туйгуннук үөрэнэн бүтэрбит[4].
Аҕа дойду Улуу сэриитэ саҕаламмытыгар, 16 сааһыгар, шахтаҕа забойга үлэтин саҕалаабыт. Үлэлиир кэмигэр элбэх идэни баһылаабыт: бутчик, электрослесарь, бурильщик, погрузчик машиниһа, маастар–взрывник.
Алданннааҕы хайа техникумун кэтэхтэн үөрэнэн бүтэрбит. «Сангарскай» шаахтаҕа 40-ча сыл үлэлээбит.
Сэттис биэс сыллаах үлэ кэрчигин түмүгүнэн (1959-1965) Үлэ Кыһыл Знамята уордьанынан наҕараадаламмыт.
ССРС Үрдүкү Сүбэтин Президиумун 1971 сыл кулун тутар 30 күнүнээҕи Ыйааҕынан Кочнев Петр Павловичка Социалистыы Үлэ Дьоруойун аата иҥэриллибит, Ленин уордьана уонна «Сиэрпэ уонна Балта» кыһыл сулус туттарыллыбыт.
1990 сыллаахха Сангаарга өлбүт[2].
Наҕараадалара уонна ытык ааттара
- Социалистыы Үлэ Дьоруойа (1971):
- Ленин уордьана;
- «Сиэрпэ уонна Балта» мэтээл;
- ССРС Ытык шахтера (1954);
- Ытык полярник (1954);
- Саха АССР үтүөлээх горняга (1982);
- Үлэ Кыһыл Знамятын уордьана (29.06.1966);
- «1941–1945 сс. Аҕа дойду улуу сэриитин кэмигэр килбиэннээх үлэтин иһин» мэтээл (1946);
- III истиэпэннээх «Албан ааттаах шахтер» мэтээл (1956);
- Икки «Үлэҕэ килбиэнин иһин» мэтээл (02.12.1945; 24.09.1954);
- «В.И. Ленин 100 сылын көрсө үлэҕэ килбиэнин иһин» мэтээл (1970 );
- «Социалистическай күрэхтэһии кыайыылааҕа» бэлиэ (1976);
- Кэбээйи улууһун Ытык олохтооҕо (1975)[2][4].
Быһаарыылар
Литература
- История Алсиба — история моей страны / Малая акад. наук РС (Я) [и др.]. — Казань: Бук, 2023. — 142 с.