Нуучча тылынанПартнёрдар бырайыактараАнал бырайыактар
Тас көрүҥүн уларытТылы уларыт
УРУБИИКИ ТУҺУНАН

Калитин Николай Романович

УРУБИИКИ иһигэр маннык араспаанньалаах дьон туһунан ыстатыйалар бааллар, көр Калитин.

Калитин Николай Романович (1940 сыл бэс ыйын 1 күнэ, Орджоникидзевскай оройуон, Саха АССР — 2024 сыл от ыйын 12 күнэ, Дьокуускай) — сахалыы суруйар эбэҥки суруйааччыта, бэйиэт, прозаик, литератураны ырытааччы, Арассыыйа суруйааччыларын Сойууһун чилиэнэ (1994).

Олоҕун олуктара

1940 сыллаахха бэс ыйын 1 күнүгэр Хаҥалас улууһугар Буотама үрэх кытыытыгар Дьикимдэ сэлиэнньэттэн чугас сиргэ көс олохтоох булчут-табаһыт дьиэ кэргэнигэр төрөөбүт.

Оҕо сааһыгар идэтийбит булчут буолар ыра санаалааҕа. Ол оннугар, А. М. Горькай аатынан Литературнай институту бүтэрэн, суруйааччы буолбута.


Тыа сирин Сэбиэтиттэн Өрөспүүбүлүкэ Үрдүкү Сэбиэтигэр тиийэ үлэлээбит.
Өр сыллар устата Саха сирин хоту омуктарын Ассоциацияларын вице-президенэ этэ.

Айар үлэтэ

Бастакы хоһоонноро 1958 сыллаахха оройуон «Сэбиэттэр знамялара» хаһыатыгар бэчээттэммиттэр. Бастакы кинигэтэ «Эркээйи» 1978 сыллаахха күн сирин көрбүтэ. Айымньылара өрөспүүбүлүкэ уонна киин сирдэр сурунаалларыгар, хомуурунньуктарыгар, «Литературнай хаһыакка», нэдиэлэ аайы тахсар «Литературная Россия» хаһыакка о. д. а. таһаарыыларга бэчээттэммитэрэ. Бастыҥ айымньылара нуучча, казах уонна английскай тылларга тылбаастаммыттара. Ону таһынан, суруйааччылар айымньыларын ырытан, кириитикэ ыстатыйаларын суруйара.

«Тоомоо» сэһэн

Биир биллибит, сүҥкэн айымньыта. 2011 сыллаахха Россия Улахан литературнай бириэмийэтинэн бэлиэтэммитэ. Сэһэн нуучча, француз, эбээн уонна эбэҥки тылларыгар тылбаастаныахтаах эбит[1]. Сэһэн сүрүн геройун обраһа хас да сыл чочуйуллубут, кини хотугу аҕыйах ахсааннаах омуктартан — эбэҥкилэртэн — төрүттээх тайҕа уола.

Наҕараадалара уонна ытык ааттара

  • 1994 сылтан Арассыыйа Федерациятын Суруйааччыларын сойууһун чилиэнэ;
  • Саха Өрөспүүбүлүкэтин култууратын үтүөлээх үлэһитэ;
  • Хаҥалас улууһун Ытык олохтооҕо;
  • Арассыыйа Улахан литературнай бириэмийэтин лауреата (2011) — «Тоомоо» кинигэтин иһин[2][3].

Библиография

  • Эркээйи: хоһооннор — Дь.: Кинигэ кыһата, 1978. — 64 с.
  • Булчут: рассказы — кэпсээннэр — Якутск: Полиграфист, 1991. — 60 с.
  • Байанайым ымыытын ыллатан: хоһооннор, кэпсээннэр — Дь.: Бичик, 2004. — 76 с.
  • Слушай, моя тайга: стихи / худож. А. Герасимов. — Якутск: Кн. изд-во, 1982. — 24 с.
  • Бултамни: рассказы на эвенк., рус. яз. /худож. Е. Бельмач. — Красноярск: Кн. изд-во, 1998. — 51 с.

Быһаарыылар

  1. ↑ ЯСИА:Поэт Николай Калитин дал мастер-класс студентам СВФУ
  2. ↑ Ассоциация поздравляет с наступающием юбилеем Николая Калитина. Ассоциация народов Севера СССР (2020).
  3. ↑ Калитин Николай Романович, Национальная библиотека РС(Я). Сигэнии күнэ: 16 От ыйын 2026.

Сигэлэр

Категориялар